ភ្នំពេញ ៖ លោក ថាច់ ផែន រដ្ឋលេខាធិការ និងជាគណៈកម្មាធិការអេដស៍ក្រសួងព័ត៌មាន បានជំរុញឱ្យប្រព័ន្ធផ្សព្វផ្សាយបន្តសហការជួយផ្សព្វផ្សាយ ឱ្យប្រជាពលរដ្ឋយល់ដឹងកាន់តែច្បាស់អំពីគ្រោះថ្នាក់ នៃជំងឺអេដស៍ មេរោគអេដស៍។
នៅក្នុងសិក្ខាសាលាស្តីពី ការត្រួតពិនិត្យស្ថានភាពជំងឺអេដស៍ មេរោគអេដស៍ ក្រោមការរៀបចំរបស់គណៈកម្មាធិការប្រយុទ្ធជំងឺអេដស៍ក្រសួងព័ត៌មានព្រឹកថ្ងៃទី ២៨ ខែកុម្ភៈនេះ នៅទីស្តីការក្រសួងព័ត៌មាន លោក ថាច់ ផែន រដ្ឋលេខាធិការ និងជាគណៈកម្មាធិការអេដស៍ក្រសួងព័ត៌មានថ្លែងថា បើទោះជាតួលេខរបស់អាជ្ញាធរជាតិប្រយុទ្ធប្រឆាំងនឹងជំងឺអេដស៍ មេរោគអេដស៍បង្ហាញថា បញ្ហាអេដស៍មានការថយចុះក៏ពិតមែន ប៉ុន្តែយើងកុំភ្លេចខ្លួនឱ្យសោះ« អេដស៍មិនដែលភ្លេចយើងទេ មានតែយើងទេច្រើនភ្លេចអេដស៍នោះ»។
លោករដ្ឋលេខាធិការក៏បានជំរុញឱ្យប្រព័ន្ធផ្សព្វផ្សាយ ទាំងប្រព័ន្ធផ្សព្វផ្សាយរបស់រដ្ឋ និងឯកជនបន្តធ្វើការផ្សព្វផ្សាយឱ្យបានជាចាំដូចកាលក្រសួងព័ត៌មានធ្លាប់ធ្វើកន្លងមក ដើម្បីឱ្យប្រជាជនយើងទូទាំងប្រទេសយល់ដឹងកាន់តែច្បាស់ ពីហានិភ័យប្រកបដោយគ្រោះថ្នាក់ នៃជំងឺអេដស៍ មេរោគអេដស៍ រួមចំណែកជាមួយរាជរដ្ឋាភិបាលឈានទៅលុបបំបាត់ឱ្យបានជោគជ័យ ពីការឆ្លងរាលដាលថ្មី ការស្លាប់ និងការរើសអើងដោយសារជំងឺអេដស៍នៅឆ្នាំ២០២៥។
លោក ថុល ប៊ុនថៃ អនុប្រធាននាយកដ្ឋានទទួលបន្ទុកផ្នែកផលិតកម្មវិធីសន្ទនាមតិផ្សាយវិទ្យុជាតិកម្ពុជា នៃក្រសួងព័ត៌មានបានលើកឡើងថា លោកនៅតែមានឆន្ទៈ ក្នុងការផ្សព្វផ្សាយអំពីបញ្ហាជម្ងឺអេដស៍ មេរោគអេដស៍ ទៅដល់ប្រជាពលរដ្ឋដដែល បើទោះបីកិច្ចការងាររបស់យើងបានធ្វើកន្លងមក និងកំពុងបន្តធ្វើដោយមិនមានថវិកាគាំទ្រក្តី យើងតែងតែមានស្មារតីចូលរួមក្នុងនាមជាប្រព័ន្ធផ្សព្វផ្សាយ ក្នុងនាមជាអ្នកចូលរួមជាមួយរាជរដ្ឋាភិបាលនៅក្នុងការទប់ស្កាត់ និងកាត់បន្ថយ ឬក៏លុបបំបាត់ជំងឺអេដស៍ មេរោគអេដស៍នេះ ស្របតាមផែនការគោលនយោបាយរបស់រាជរដ្ឋាភិបាលដែលបានកំណត់៕
Source: Kampuchea Thmey Daily
0 Comments