ប្រើវិធានញុះញង់ ទាញយកមុខសញ្ញាចែកចាយ បានចំនួន២នាក់

បាត់ដំបង ៖ ជនសង្ស័យចំនួន២នាក់ ដែលល្បីថាជាមុខសញ្ញាចែកចាយថ្នាំញៀនដ៏សកម្មប្រចាំខេត្តកំពង់ចាម ត្រូវបានកម្លាំងសមត្ថកិច្ចខេត្តបាត់ដំបង ប្រើវិធានញុះញង់អូសទាញព្រមទាំងបានដេញប្រផិតប្រភីង រហូតឈានដល់ការឃាត់ខ្លួន ដែលមុខសញ្ញានេះ មានទាំងកាំភ្លើងខ្លីថែមទៀត រួមជាមួយនឹងថ្នាំញៀនជាង១ខាំផងដែរ នៅពេលដែលមុខសញ្ញានេះ បានបង្ហាញខ្លួននៅលើទឹកដី ខេត្តបាត់ដំបង។

បើតាមប្រភពមួយចំនួនបានលើកឡើងថា នៅវេលាម៉ោង ១០ និង ២០ នាទី ព្រឹកថ្ងៃទី២៦ ខែមិថុនា ឆ្នាំ២០១៨ នៅលើកំណាត់ផ្លូវជាតិលេខ ៥ ត្រង់ចំណុច ក្រុមទី៣ភូមិព្រៃដំរី ឃុំព្រៃតូច ស្រុកមោងឫស្សី ខេត្តបាត់ដំបង មានការដេញស្ទាក់រថយន្ត១គ្រឿងពីសំណាក់សមត្ថកិច្ច ដែលរថយន្តនោះម៉ាក លុចស៊ីស RX 300 ព៌ណស ពាក់ស្លាកលេខ ភ្នំពេញ 2S-7747 ដែលការប្រដេញនេះ បានធ្វើអោយរថយន្តខាងលើ ធ្លាក់ចេញពីផ្លូវជាតិ ទៅក្បែរមាត់ស្រះទឹក ឯជនសង្ស័យចំនួន២នាក់ ដែលនៅខាងក្នុងរថយន្តបានរត់គេចខ្លួន ដោយមានកាន់កាំភ្លើងខ្លីនៅក្នុងដៃទៅជាមួយផង តែទីបំផុតគេសង្កេតឃើញថា ត្រូវបានកម្លាំងសមត្ថកិច្ចចាប់ខ្លួនបាន។

ដោយឡែកលោក វរសេនីយ៍ទោ ស៊ាន សុណាល់ នាយការិយាល័យ នគរបាលប្រឆាំងគ្រឿងញៀន បានរៀបរាប់ថា ការិយាល័យជំនាញបានប្រើប្រាស់វិធានញុះញង់អស់រយៈពេលជាច្រើនថ្ងៃមកហើយ ដើម្បីទាញយកមុខសញ្ញាធំមួយនេះ ហើយនៅពេលប្រតិបត្តិការ គឺលោកបានប្រើប្រាស់កម្លាំងជំនាញ សហការជាមួយកម្លាំងអន្តរាគមន៍ប្រឆាំងបទល្មើស និងកម្លាំងអធិការដ្ឋាន នគរបាលស្រុកមោងឫស្សី ផងដែរ។

លោកនាយការិយាល័យបានបន្តថា ដំបូងការណាត់ទីតាំងដើម្បីធ្វើការដោះដូរទំនិញនេះ
( ថ្នាំញៀន ) គឺមុខសញ្ញាសង្ស័យបានជ្រើសយករង្វង់មូល ព្រាបស ប៉ុន្តែនៅពេលកម្លាំងចេញដំណើរ គឺជនសង្ស័យបានផ្លាស់ប្តូរ និងរំកិលទីតាំងជាបណ្តើរៗ រហូតសន្យាថា នឹងយកហាងគុយទាវមួយកន្លែង នៅក្នុងភូមិព្រៃដំរី ឃុំព្រៃតូច ស្រុកមោងឫស្សី។

ទីបំផុតកម្លាំងបានស្ទាក់ពីមុខពីក្រោយ ដោយសារតែកំណត់មុខសញ្ញារថយន្ត និងស្លាកលេខ បានច្បាស់ហើយ ប៉ុន្តែជនសង្ស័យបានបើករថយន្តបម្រុងគេច ក៏ជ្រុលទៅជាប់នឹងមាត់ស្រះទឹក ខាងមុខផ្ទះប្រជាពលរដ្ឋ ទើបពួកគេបានបើកទ្វាររថយន្តរត់សំដៅទៅខាងក្រោយភូមិដោយកាន់ទាំងកាំភ្លើងខ្លីទៅជាមួយផង ដូច្នេះហើយ ទើបសមត្ថកិច្ចបានផ្ទុះអាវុធឡើងចំនួន២គ្រាប់ ដើម្បីបំបាក់ស្មារតី ទីបំផុតជនសង្ស័យបានបោះកាំភ្លើងនោះចោលទៅក្នុងដីចំការមួយកន្លែង ទើបសមត្ថកិច្ចចាប់ខ្លួនបាន។

ក្រោយពេលត្រួតពិនិត្យទាំងនៅលើដងខ្លួន និងក្នុងរថយន្ត សមត្ថកិច្ចបានដកហូតនូវ វត្ថុតាងមួយចំនួនរួមមាន ៖ ថ្នាំញៀនប្រភេទម៉ាទឹកកក មួយចំនួនស្មើនឹងទម្ងន់ ១១២,៩៤ក្រាម ( ទាំងសំបក ) កាំភ្លើងខ្លីម៉ាករ៉ូឡូ ១ ដើម( ៦ អ៊ីញ ) គ្រាប់ចំនួន ១២ គ្រាប់ ទូរស័ព្ទដៃ ១ គ្រឿង និង ជញ្ជីងអេឡិចត្រូនិក សម្រាប់ថ្លឹងគ្រឿងញៀន ១ គ្រឿង។

ដោយឡែកជនសង្ស័យទាំង២នាក់នោះមានឈ្មោះ មឿន សេងអ៊ូ ហៅសារ៉ាត ភេទប្រុសអាយុ៣៣ឆ្នាំ រស់នៅភូមិ៦ ឃុំ ស្វាយឃ្លាំង ស្រុកក្រូចឆ្មារ ខេត្តត្បូងឃ្មុំ និងឈ្មោះឡេង តេងឡុង ភេទប្រុស អាយុ៣៣ឆ្នាំ រស់នៅភូមិត្រពាំងថ្លឹង សង្កាត់ចោមចៅខណ្ឌពោធិ៍សែនជ័យ រាជធានីភ្នំពេញ។

បច្ចុប្បន្នក្រោយពេលឃាត់ខ្លួន និងធ្វើការសាកសួររួចមក កម្លាំងសមត្ថកិច្ចជំនាញ បាននិងកំពុងរៀបចំឯកសារ និងកសាងសំណុំរឿង ដើម្បីបញ្ជូនខ្លួនជនសង្ស័យ រួមជាមួយវត្ថុតាង ទៅកាន់សាលាដំបូងខេត្ត ក្នុងការចាត់វិធានការតាមផ្លូវច្បាប់៕