ចៅក្រមអាមេរិកបានបញ្ជាឲ្យក្រុមគ្រួសារអន្តោប្រវេសន៍ដែលបំបែកនៅតាមព្រំដែនជាប់ប្រទេសម៉ិកស៊ិកក្រោមគោលនយោបាយ “គ្មានការអត់ឱន” របស់លោកប្រធានាធិបតី Donald Trump ត្រូវបង្រួបបង្រួមគ្នាវិញក្នុងរយៈពេល៣០ថ្ងៃ។
សម្រាប់កុមារដែលមានអាយុក្រោម៥ឆ្នាំ, ការបង្រួបបង្រួមត្រូវតែធ្វើឡើងក្នុងរយៈពេលពីរសប្តាហ៍នៃបទបញ្ជានេះដែលដាក់ចេញកាលពីថ្ងៃអង្គារដោយចៅក្រមសង្កាត់អាមេរិកលោក Dana Sabraw នៅទីក្រុង San Diego ។
លោក Sabraw បានសម្រេចចិត្តបែបនេះដើម្បីឆ្លើយតបទៅនឹងពាក្យបណ្តឹងដែលដាក់ដោយសហភាពសេរីភាពស៊ីវិលអាមេរិកក្នុងនាមកុមារីអាយុ៧ឆ្នាំម្នាក់ដែលត្រូវបានបំបែកចេញពីម្តាយជនជាតិកុងហ្គោនិងក្មេងប្រុសអាយុ១៤ឆ្នាំម្នាក់ដែលត្រូវបំបែកចេញពីម្តាយជនជាតិប្រេស៊ីល។
ចៅក្រមរូបនេះក៏បានចេញដីកាមួយប្រឆាំងនឹងការបំបែកគ្រួសារបន្តទៀតផងដែរដែលជាផ្នែក នៃគោលនយោបាយមួយដែលចែងថា អ្នកណាម្នាក់ដែលឆ្លងកាត់ព្រំដែនដោយខុសច្បាប់នឹងត្រូវបានឃាត់ខ្លួនហើយត្រូវបញ្ជូនសម្រាប់ការកាត់ទោសព្រហ្មទណ្ឌ។ចៅក្រមបាននិយាយថា អាជ្ញាធរសហព័ន្ធអាមេរិកមានរយៈពេល១០ថ្ងៃដើម្បីអនុញ្ញាតឲ្យឪពុកម្តាយហៅទូរស័ព្ទទៅកូនៗរបស់ពួកគេប្រសិនបើពួកគេមិនមានទំនាក់ទំនងជាមួយគ្នា។
លោក Trump កាលពីសប្ដាហ៍មុនបានចុះហត្ថលេខាលើបញ្ជាប្រតិបត្តិមួយឲ្យបញ្ឈប់ការអនុវត្តរបស់រដ្ឋាភិបាលរបស់គាត់ក្នុងការយកកូនចេញឆ្ងាយពីឪពុកម្តាយដែលឆ្លងកាត់ព្រំដែនដោយគ្មានឯកសារសូម្បីតែស្វែងរកសិទ្ធិជ្រកកោនក៏ដោយ។ ប៉ុន្តែបទបញ្ជានោះមិនមានចែងច្បាស់លាស់ទេសម្រាប់គ្រួសារដែលត្រូវញែកចេញពីគ្នារួចទៅហើយនៅក្រោមគោលនយោបាយនោះដែលបានធ្វើឲ្យមានការរិះគន់យ៉ាងក្តៅគគុកនៅអាមេរិកនិងនៅទូទាំងពិភពលោកថាជាការអមនុស្សធម៌និងជាទម្រង់នៃការរំលោភបំពានលើកុមារ។
គួរបញ្ជាក់ថា កុមារជាង២,០០០នាក់ដែលត្រូវបានយកចេញពីក្រុមគ្រួសាររបស់ពួកគេគឺនៅតែស្ថិតក្រោមការថែទាំរបស់អាជ្ញាធរសហព័ន្ធ។ កុមារខ្លះទើបតែចេះដើរតេះតះឬជាទារក៕ AFP
Source: Kampuchea Thmey Daily
0 Comments