កំពង់ឆ្នាំង ៖ ក្រុមការងារចម្រុះថ្នាក់ខេត្ត និងថ្នាក់ស្រុក នៅព្រឹកថ្ងៃទី 19 ខែមេសា ឆ្នាំ 2019 បានសហការគ្នាចុះត្រួតពិនិត្យ និងបោះព្រំដីទីទួលប្រាសាទសក្ល ឬហៅថាប្រាសាទប្រុស ស្ថិតនៅក្នុងភូមិកង្កែប ឃុំច្រណូក ស្រុកកំពង់លែង ខណៈដែលមានប្រជាពលរដ្ឋពីរគ្រួសារ បានឈូសឆាយពង្រាបដីស្រែប៉ះពាល់ដីទីទួលប្រាសាទបុរាណដ៏ចំណាស់មួយនេះ ដែលមានអាយុកាលជាងមួយពាន់ឆ្នាំមកហើយនោះ។
លោក ហ៊ូ ប៊ុនថន អភិបាលរងស្រុកកំពង់លែងបានឲ្យដឹងថា តាមការស្រាវជ្រាវ កាលពីថ្ងៃ 13 ខែមេសា ឆ្នាំ2019 ថ្មីៗនេះ មានប្រជាពលរដ្ឋ០2គ្រួសារ រស់នៅក្នុងភូមិកង្កែប ឃុំច្រណូក ស្រុកកំពង់លែងបាននាំគ្នាឈូសឆាយពង្រាបដីស្រែវស្សារបស់ខ្លួន ប៉ះពាល់ដីទីទួលប្រាសាទសក្ល ដែលមានអាយុជាង១ពាន់ឆ្នាំហើយ។ ជាក់ស្តែងតាមការត្រួតពិនិត្យវាស់វែងរបស់ក្រុមចម្រុះពិនិត្យឃើញថា ដីប្រាសាទនៅផ្នែកខាងត្បូង ត្រូវបាន ឈ្មោះ សុខ សារីម រស់នៅភូមិកង្កែប ឈូសឆាយដីស្រែប៉ះពាល់ដីទួលប្រាសាទ ទំហំ 22 ម៉ែត្រ គុណនឹង 25 ម៉ែត្រ ចំណែកនៅផ្នែកខាងកើត មានឈ្មោះ ជៀប តិប ឈូសឆាយប៉ះពាល់ដីប្រាសាទទំហំ 12 ម៉ែត្រគុណ 04ម៉ែត្រ។
លោក សុខ ធួក ប្រធានមន្ទីរវប្បធម៌ និងវិចិត្រសិល្បៈខេត្តកំពង់ឆ្នាំង និងជាប្រធានក្រុមការងារចម្រុះ បានលើកឡើងថា ពាក់ព័ន្ធនឹងផ្លូវច្បាប់បេតិកភណ្ឌជាតិ គឺរមណីយដ្ឋានប្រវត្តិសាស្ត្រ ជុំវិញប្រាសាទ ប្រវែង1.000 ម៉ែត្រ មិនអាចជនណាប៉ះពាល់ រុករានឈូសឆាយ យកដីជាកម្មសិទ្ធិបានឡើយ ប៉ុន្តែប្រជាពលរដ្ឋដែលធ្លាប់អាស្រ័យផល គឺអាស្រ័យផលបាន តែមិនអាចឈូសឆាយប៉ះពាល់ដីទួលរបស់ប្រាសាទខុសពីទម្រង់ដើមបានឡើយ ជនល្មើសនឹងច្បាប់នេះ ត្រូវផ្ដន្ទាទោសទៅតាមបញ្ញត្តិច្បាប់។ ដោយឡែក ប្រាសាទសក្ល ឬប្រាសាទប្រុសនេះ បានកសាងឡើងនៅក្នុងរជ្ជកាល ស្តេចស្រីមួយអង្គ ព្រះនាមជ័យ ទេវី តាមរចនាប័ទ្មកំពង់ព្រះ នៅក្នុងសតវត្សទី8 ឬទី9 មុនសម័យអង្គរ។
ជាក់ស្តែងនៅព្រឹកថ្ងៃទី19មេសានេះ ក្រុមការងារចម្រុះបានវាស់វែងកំណត់ព្រំប្រាសាទសក្លឡើងវិញ ដែលមានទំហំផ្នែកខាងជើងប្រាសាទប្រវែង 36 ម៉ែត្រ ផ្នែកខាងត្បូង និងផ្នែកខាងលិចប្រវែង 26 ម៉ែត្រ ខាងកើត 34 ម៉ែត្រ និងដីតួប្រាសាទទំហំ 6 ,80 ម៉ែត្រ សរុបដីទីទួលប្រាសាទ មានទំហំ 4046 ម៉ែត្រការ៉េ។ ក្រោយពីបានបោះព្រំកំណត់រួចមក មន្ទីរជំនាញ និងអាជ្ញាធរស្រុក បានកំណត់ឲ្យមន្ត្រីការិយាល័យភូមិបាលស្រុក អាជ្ញាធរឃុំ និងឆ្មាំប្រាសាទ ត្រូវបោះបង្គោលព្រំជុំវិញប្រាសាទជាក់ស្ដែងឡើងវិញ។ ចំណែកមន្ទីរវប្បធម៌ នឹងពិនិត្យឯកសារពាក់ព័ន្ធនឹងទីតាំងប្រាសាទ ដោយធ្វើការសិក្សាតាមនីតិវិធីច្បាប់ ដើម្បីធ្វើការគ្រប់គ្រងថែរក្សាការពារទីទួលប្រាសាទមួយនេះឲ្យបានគង់វង្ស ដោយសហការជាមួយអាជ្ញាធរពាក់ព័ន្ធគ្រប់ជាន់ថ្នាក់។
ដោយឡែក ក្រុមការងារចម្រុះក៏បានកោះអញ្ជើញប្រជាពលរដ្ឋទាំង០២គ្រួសារខាងលើ ទៅសាលាឃុំច្រណូក ដើម្បីណែនាំអប់រំអំពីផ្លូវច្បាប់ និងបានធ្វើកិច្ចសន្យាបញ្ឈប់មិនឲ្យមានការឈូសឆាយដីស្រែប៉ះពាល់ដីទួលប្រសាទជាបន្តទៀត និងតម្រូវឲ្យអ្នកពាក់ព័ន្ធទាំង២លើកភ្លឺក្រវាត់ព្រំប្រទល់ប្រាសាទទៅតាមព្រំចាស់ឡើងវិញ។ ចំពោះករណីនេះ ប្រជាពលរដ្ឋទាំង២នាក់ខាងលើ ក៏បានសុខចិត្តធ្វើកិច្ចសន្យា ដោយទទួលយកទៅអនុវត្តន៍តាមការណែនាំរបស់ក្រុមការងារចម្រុះផងដែរ ដើម្បីរួមគ្នាថែរក្សាការពារប្រាសាទសក្ល ឬប្រាសាទប្រុសឲ្យបានគង់វង្សយូរអង្វែងរហូតទៅ៕
Source: Kampuchea Thmey Daily
0 Comments