អតីត​ប្រធាន​ចៅក្រម​នៃ​តុលាការ ICJ និង​អតីតមន្ត្រី​អ្នក​ជួយ​រក​សន្តិភាព​ជួប​ជាមួយ​ប្រមុខ​ការទូត​កម្ពុជា​

ភ្នំពេញ ៖ លោក Jean Davit Levitte អតីតមន្ត្រី​ជាន់​ខ្ពស់​រដ្ឋាភិបាល​បារាំង ដែល​បាន​ចូលរួម​ក្នុង​ការ​ស្វះ​ស្វែងរក​សន្តិភាព​នៅ​កម្ពុជា​កន្លងមក និង​លោក Gibert Guillaume អតីត​ប្រធាន​ចៅក្រម​នៃ​តុលាការ​យុត្តិធម៌​អន្តរជាតិ (ICJ) និង​ជា​ចៅក្រម​ចំពោះ​កិច្ច​របស់​កម្ពុជា​ក្នុងពេលដែល​កម្ពុជា​ស្នើសុំ​ឲ្យ​តុលាការអន្តរជាតិ​បកស្រាយ​សាលក្រម​ឆ្នាំ​១៩៦២ លើ​រឿង​ក្តី​ប្រាសាទព្រះវិហារ​បាន​មក​បំពេញ​ទស្សនកិច្ច​នៅ​ព្រះរាជាណាចក្រ​កម្ពុជា​រយៈពេល​១០​ថ្ងៃ ហើយ​ដំណើរ​បំពេញ​ទស្សនកិច្ច​នេះ ធ្វើ​ឡើង​តាម​ការ​អញ្ជើញ​របស់​ប្រមុខ​ការទូត​កម្ពុជា។​

នៅក្នុង​ដំណើរ​បំពេញ​ទស្សនកិច្ច​នេះ​ដែរ លោក Gibert Guillaume និង​លោក Jean Davit Levitte បាន​ចូល​ជួប​សម្ដែង​ការគួរសម​ជាមួយ​លោក​ឧបនាយករដ្ឋមន្ត្រី​ហោ ណាំហុង រដ្ឋមន្ត្រី​ក្រសួង​ការបរទេស និង​សហប្រតិបត្តិការ​អន្តរជាតិ​កម្ពុជា​កាលពី​រសៀល​ថ្ងៃទី​២០ ខែមករា ឆ្នាំ​២០១៥​លោក កុយ គួ​ង មន្ត្រី​អ្នក​នាម​ពាក្យ​ក្រសួងការបរទេស​កម្ពុ​ជា​បាន​មាន​ប្រសាសន៍​ប្រាប់ ​អ្នក​សារព័ត៌មាន​ក្រោយ​ជំនួប​នោះ​ថា នៅក្នុង​ជំនួប​នោះ លោក​ឧបនាយករដ្ឋមន្ត្រី​ហោ ណាំហុង បាន​ថ្លែង​អំណរគុណ​ចំពោះ​លោក Gibert Guillaume ដែល​លោក​បាន​ខិតខំ​តស៊ូ​យ៉ាងសកម្ម​ដើម្បី​ភាព​ជោគជ័យ​របស់​កម្ពុជា។ លោក កុយ គួ​ង បាន​បញ្ជាក់​ថា ដោយសារតែ​លោក Gibert Guillaume អតីត​ប្រធាន​ចៅក្រម​នៃ​តុលាការ​យុត្តិធម៌​អន្តរជាតិ (ICJ) ​នោះ​ទើប​លោក​មាន​ឥទ្ធិពល​ធ្វើ​ឲ្យ​តុលាការ​បាន​ទទួល​យក​ការ​ស្នើសុំ​បកស្រាយ​សាលក្រម​ឆ្នាំ​១៩៦២ លើ​រឿង​ក្តី​ប្រាសាទព្រះវិហារ​នេះ។​

លោក កុយ គួ​ង អះអាង​ថា កម្ពុជា​បាន​ដាក់​ពាក្យ​ស្នើសុំ​នេះ​កាលពី​ឆ្នាំ​២០១១ ហើយ​នៅ​ឆ្នាំ​២០១៣ ទើប​តុលាការ​យុត្តិធម៌​អន្តរជាតិ (ICJ) បាន​បើកសវនាការ ហើយ​រយៈពេល​២​ឆ្នាំនេះ​ លោក Gibert Guillaume បាន​ខិតខំ​យ៉ាង​ខ្លាំង​តាម​បទពិសោធន៍ និង​សមត្ថភាព​ដ៏​ខ្ពស់​របស់​លោក ទើប​ធ្វើ​ឲ្យ​តុលាការ​សម្រេច​ជា​វិជ្ជមាន​ជូន​កម្ពុជា ដូច្នេះ​ការ​សម្រេច​កាលពី​ថ្ងៃទី​១១ ខែវិច្ឆិកា ឆ្នាំ​២០១៣ កន្លង​ទៅ​នេះ ជា​ជោគជ័យ​ប្រវត្តិសាស្ត្រ​របស់​ប្រទេស​កម្ពុជា។ ហើយ​នៅក្នុង​ជំនួប​នោះ​ដែរ លោក​ឧបនា​យករដ្ឋមន្ត្រី ហោ ណាំហុង ក៏បាន​អរគុណ​ចំពោះ​លោក Jean Davit Levitte អតីតមន្ត្រី​ជាន់​ខ្ពស់​រ​ដ្ឋា​ភិ​បាល​បារាំង ដែល​បាន​ចូលរួម​ក្នុង​ការ​ស្វះ​ស្វែងរក​សន្តិភាព​នៅ​កម្ពុជា​កន្លងមក ហើយ​នៅក្នុង​ដំណើរការ​នេះ លោក Jean Davit Levitte បាន​ខិតខំ​ដោះស្រាយ​បញ្ហា​លំបាកៗ​ជាច្រើន ជាពិសេស​បាន​ខិតខំ​សម្របសម្រួល​ឲ្យ​គ្រប់​ភាគី​ពាក់ព័ន្ធ​ទាំងអស់​ជួបគ្នា​ជា​បន្តបន្ទាប់ រហូតដល់​មានការ​ស្រុះ​ស្រួល​គ្នា ឈាន​ទៅ​ដល់​មាន​កិច្ចព្រមព្រៀង​ទីក្រុង​ប៉ារីស​នៅ​ឆ្នាំ​១៩៩១។​

សូម​បញ្ជាក់​ថា ដំណើរ​បំពេញ​ទស្សនកិច្ច​របស់​លោក Gibert Guillaume អតីត​ប្រធាន​ចៅក្រម​នៃ​តុលាការ​យុត្តិធម៌​អន្តរជាតិ (ICJ) និង​ជា​ចៅក្រម​ចំពោះ​កិច្ច​របស់​កម្ពុជា ក្នុងពេលដែល​កម្ពុជា​ស្នើ​សុំ​ឲ្យ​តុលាការអន្តរជាតិ​បកស្រាយ​សាលក្រម​ឆ្នាំ​១៩៦២ លើ​រឿង​ក្តី​ប្រាសាទព្រះវិហារ និង​លោក Jean Davit Levitte អតីតមន្ត្រី​ជាន់​ខ្ពស់​រដ្ឋាភិបាល​បារាំង ដែល​បាន​ចូលរួម​ក្នុង​ការ​ស្វះ​ស្វែងរក​សន្តិភាព​នៅ​កម្ពុជា​កន្លងមក រយៈពេល​១០​ថ្ងៃ​នៅ​ព្រះរាជាណាចក្រ​កម្ពុជា​នេះ ធ្វើឡើង​តាម​ការ​អញ្ជើញ​របស់​លោក​ឧបនាយករដ្ឋមន្ត្រី ហោ ណាំហុង ដែល​ជា​ប្រមុខ​ការទូត​កម្ពុជា ដើម្បី​ឲ្យ​លោក​មាន​ឱកាស​ថ្លែង​អំណរ​គុណ​នូវ​កិច្ច​ខិតខំ​របស់​អ្នក​ទាំងពីរ ហើយ​រយៈពេល​១០​ថ្ងៃ​នៅ​កម្ពុជា​នេះ លោក​បាន​ទៅ​មើល​ច្រើន​កន្លែង​ដូចជា​ ប្រាសាទ​អង្គ​វត្ត​ខេត្តសៀមរាប ខេត្តបាត់ដំបង និង​ កន្លែង​ជា​ច្រើន​ទៀត ហើយ​លោក​ក៏បាន​ចាប់អារម្មណ៍​ពី​ការ​រីកចម្រើន​របស់​ប្រទេស ក៏​ដូចជា​ជីវភាព​របស់​ប្រជាពលរដ្ឋ​ផង​ដែរ៕

កោះ​កែវ​

​