ភ្នំពេញ ៖ ក្រុមចោរស្ទើរភ្លើង២នាក់នេះ ត្រូវបានកម្លាំងនគរបាលផ្នែកព្រហ្មទណ្ឌនៃអធិការដ្ឋាននគរបាលខណ្ឌដូនពេញ សហការជាមួយនគរបាលប៉ុស្តិ៍ចតុមុខកសាងសំណុំរឿងបញ្ជូនទៅតុលាការ បន្ទាប់ពីពួកគេជិះម៉ូតូធ្វើសកម្មភាពឆក់កាបូបពីស្ត្រីម្នាក់ កាលពីវេលាម៉ោង១៨និង២០នាទីព្រលប់ថ្ងៃទី២០ ខែមករា ឆ្នាំ២០១៥ នៅមុខផ្ទះលេខ១១ ផ្លូវលេខ២៤០ ភូមិសង្កាត់ចតុមុខ ខណ្ឌដូនពេញ។ សមត្ថកិច្ចបានឲ្យដឹងថា ក្រុមជនសង្ស័យដែលឃាត់ខ្លួននេះ មានឈ្មោះ ឈឹម សុវណ្ណារ៉ូ ភេទប្រុស អាយុ១៧ឆ្នាំ ជាសិស្ស ស្នាក់នៅផ្ទះលេខ៨ ផ្លូវលេខ៣៥៣ សង្កាត់បឹងកក់២ ខណ្ឌទួលគោក និងម្នាក់ទៀតឈ្មោះ លី ហុង ភេទប្រុស អាយុ១៧ឆ្នាំ មុខរបរមិនពិតប្រាកដ មានទីលំនៅភូមិបុរីកម្មករ ឃុំបែកចាន ស្រុកអង្គស្នូល ខេត្តកណ្តាល។ ចំណែកជនរងគ្រោះឈ្មោះ ជុំ កាដែតបូស៊ីយ៉ា ភេទស្រី អាយុ២៣ឆ្នាំ បុគ្គលិកធនាគារមេឃប៊ែង ស្នាក់នៅផ្ទះលេខ១៥៤ ផ្លូវលេខ១៩ សង្កាត់ចតុមុខ ខណ្ឌដូនពេញ។
ជនរងគ្រោះបានឲ្យសមត្ថកិច្ចដឹងថា មុនពេលកើតហេតុខ្លួនបានជិះម្នាក់ឯងចេញពីកន្លែងធ្វើការឆ្ពោះមកផ្ទះ ហើយបើកតាមផ្លូវលេខ២៤០ពីទិសខាងលិចទៅកើត លុះមកដល់មុខផ្ទះលេខ១១ ស្រាប់តែមានយុវជនស្ទាវពីរនាក់ជិះម៉ូតូម៉ាកឃ្លីក ពណ៌ខ្មៅលាយស បានជិះអែបខាងឆ្វេងដៃ ហើយយុវជនដែលអង្គុយពីក្រោយបានធ្វើសកម្មភាពឆក់យកកាបូបយួររបស់ខ្លួនដែលដាក់នៅប្រឡោះជើងលើម៉ូតូបានសម្រេច ហើយព្យាយាមបើកម៉ូតូគេចខ្លួន ពេលនោះរូបគាត់បានស្រែកឆោឡោដើម្បីឲ្យសមត្ថកិច្ច ក៏ដូចជាប្រជាពលរដ្ឋធ្វើដំណើរជួញដេញចាប់ជនសង្ស័យ។
បើតាមការមន្ត្រីនគរបាលផ្នែកព្រហ្មទណ្ឌខណ្ឌដូនពេញបានឲ្យដឹងថា ខណៈពេលស្ត្រីរងគ្រោះស្រែកឆោឡោក្នុងករណីចោរឆក់កាបូបនេះ កម្លាំងនគរបាលផ្នែកព្រហ្មទណ្ឌខណ្ឌដូនពេញ និងនគរបាលប៉ុស្តិ៍ចតុមុខកំពុងជិះម៉ូតូល្បាត ក៏ប្រទះឃើញ ហើយតាមប្រមាញ់ចាប់ឃាត់ខ្លួនជនសង្ស័យទាំងពីរនាក់ រួមទាំងដកហូតបានម៉ូតូមួយគ្រឿងដែលជិះធ្វើសកម្មភាព ព្រមទាំងដកហូតបានកាបូបយួរឲ្យស្ត្រីរងគ្រោះវិញផងដែរ។
នគរបាលខណ្ឌដូនពេញបញ្ជាក់ថា ក្រុមជនសង្ស័យត្រូវបានកសាងសំណុំបញ្ជូនទៅសាលាដំបូងរាជធានីភ្នំពេញ នៅព្រឹកថ្ងៃទី២១ ខែមករា ឆ្នាំ២០១៥នេះតែម្តង ដើម្បីឲ្យស្ថាប័នតុលាការចោទប្រកាន់ទៅតាមនីតិវិធីច្បាប់៕
រស្មី
0 Comments