បន្ទាយមានជ័យ ៖ កាលពីព្រឹកថ្ងៃទី១២ ខែតុលា ឆ្នាំ២០១៥មានភ្ញៀវទេសចរណ៍ជាតិពីក្នុង និងក្រៅខេត្តជាង១ម៉ឺននាក់បាននាំគ្នាទៅលេងរមណីយដ្ឋានអាងទឹកត្រពាំងថ្ម ស្ថិតនៅឃុំប៉ោយចារ ស្រុកភ្នំស្រុក ខេត្តបន្ទាយមានជ័យនាថ្ងៃបុណ្យភ្ជុំបិណ្ឌ។
លោកយ៉ត សុផលអធិការនគរបាលស្រុកភ្នំស្រុកបានឲ្យដឹងនៅថ្ងៃទី១៣ ខែតុលាថា ចំនួនភ្ញៀវទេសចរក្នុងស្រុកជាង១ម៉ឺននាក់ក្នុង១ថ្ងៃៗបានទៅលេងអាងទឹកតំបន់អភិរក្សសត្វក្រៀល អាងត្រពាំងថ្មនេះ។ ប៉ុន្តែអ្នកទៅលេងនៅអាងទឹកត្រពាំងថ្មនៅពេលបុណ្យភ្ជុំបិណ្ឌឆ្នាំនេះគឺមានចំនួនតិច បើធៀបនឹងរាល់ឆ្នាំ។
លោកយ៉ត សុផលនិយាយបន្តថា ទោះយ៉ាងណាតាមបទបញ្ជារបស់លោកឧត្តមសេនីយ៍ត្រីអាត់ ខែមស្នងការនគរបាលខេត្តក៏ដូចគណៈបញ្ជាការកងឯកភាពរដ្ឋបាលខេត្ត និងស្រុកគឺកម្លាំងនគរបាលរាប់សិបនាក់ត្រូវបានដាក់ពង្រាយថែរក្សាការពារសន្តិសុខ សណ្ដាប់ធ្នាប់ ដើម្បីបង្កលក្ខណសប្បាយរីករាយជូនភ្ញៀវ និងប្រជាពលរដ្ឋ។ ក្នុងនោះកម្លាំងកងរាជអាវុធហត្ថ ប្រជាការពារ និងមន្ត្រីអាជ្ញាធរដែនដីក៏មានប្រចាំការនៅទីនោះដែរ។
លោកយ៉ត សុផលបាននិយាយបន្តទៀតថា នៅអាងទឹកត្រពាំងថ្មក្នុងរដូវបុណ្យភ្ជុំបិណ្ឌឆ្នាំនេះ មានទឹកច្រើន។ តែមានទូក និងកាណូត ពោះវៀនកង់ឡានតិចជាងមុនសម្រាប់ភ្ញៀវជួលលេងកម្សាន្ត។ ភ្ញៀវច្រើនកុះករបានកម្សាន្តខុសៗគ្នាដោយខ្លះចុះហែលទឹកជាមួយពោះវៀនកង់ឡាន ខ្លះជិះទូក ឬកាណូត និងខ្លះទៀតចុះលេងទឹកក្រោមស្ពាន ខ្លះនាំគ្នាអង្គុយដំកង់ ជួបជុំផឹកស៊ី និងស្តាប់ភ្លេងចម្រៀងតាមអាយផេត ឬទូរស័ព្ទ និងធុងបាសតូចៗ។ល។
ដើម្បីទៅកាន់អាងទឹកកេរ្តិ៍របបកម្ពុជាប្រជាធិបតេយ្យហើយជួសជុលអភិវឌ្ឍន៍ឡើងវិញដោយរាជរដ្ឋាភិបាលកម្ពុជាដោយប្រើជំនួយជប៉ុនដំណាក់កាលទី១ និងកម្ចីធនាគារអភិវឌ្ឍន៍អាស៊ីនៅដំណាក់កាលទី២នេះគឺគេអាចធ្វើដំណើរតាមផ្លូវកៅស៊ូពីត្រង់ព្រៃមាន់ នៅចំណុចបំបែកផ្លូវជាតិលេខ៦ និងតាមផ្លូវលំក្រាលគ្រួសជាច្រើនខ្សែ ពីគ្រប់ទិសផ្សេងទៀត។
អាងនេះមានទំហំ១០គីឡូម៉ែត្រក្រឡាជាអាងធំជាងគេក្នុងប្រទេស។ នៅអាងទឹកនោះក៏ជាតំបន់អភិរក្សសត្វក្រៀលអាងត្រពាំងថ្មដោយមានសត្វកម្រជិតផុតពូជ និងសត្វស្លាបជាង២៤០ប្រភេទ សត្វល្មូន ម្រឹគ និងមច្ឆជាតិរាប់សិបប្រភេទទៀត។ លើខ្នងអាងក៏មានលក់ចំណីអាហារជាច្រើនឈ្ងុយឆ្ងាញ់ ហើយត្រូវមន្ត្រីអះអាងថា គ្រប់គ្រងតម្លៃមិនឲ្យមានការលក់ថ្លៃ កោរភ្ញៀវផងដែរ៕
ភ្ញៀវទេសចរណ៍ទៅលេងរមណីយដ្ឋានអាងត្រពាំងថ្មជិត១ម៉ឺននាក់ក្នុងឱកាសភ្ជុំបិណ្ឌ
0 Comments