សៀមរាប ៖ ផ្លូវ ហ៊ុន សែន សន្តិភាព ឬ ផ្លូវក្រវាត់ក្រុង ឬផ្លូវវាងក្រុងសៀមរាប ដែលមានចម្ងាយ១៨ គ.មចាប់ចេញពីចំណុចផ្លូវជាតិលេខ៦(ខាងកើតក្រុង) ភូមិចុងកៅស៊ូ សង្កាត់ស្លក្រាម ឆ្ពោះទៅដល់ចំណុចផ្លូវជាតិលេខ៦( ខាងលិចក្រុង) ភូមិសណ្ដាន់ សង្កាត់ទឹកវិល កសាងឡើងក្រោមរូបមន្តវិនិយោគអាជីវកម្មផ្ទេរ BOT និងប្រើប្រាស់ដោយបង់ប្រាក់អស់រយៈពេលប៉ុន្មានឆ្នាំកន្លងមកនេះ ក្រោមការគ្រប់គ្រងដោយអាជ្ញាធរអប្សរា ត្រូវបានប្រគល់ឲ្យអាជ្ញាធរខេត្តសៀមរាបគ្រប់គ្រង ថែរក្សា និងដាក់ជូនប្រជាពលរដ្ឋប្រើប្រាស់ជាសាធារណៈ។ នេះបើយោងតាមកិច្ចព្រមព្រាងមួយ ដែលបានធ្វើឡើង និងចុះហត្ថលេខា ប្រគល់ ទទួល ដោយលោក ស៊ុម ម៉ាប់ អគ្គនាយកអាជ្ញាធរជាតិអប្សរា ( ភាគីប្រគល់) ជាមួយ លោកឃឹម ប៊ុនសុង អភិបាលខេត្តសៀមរាប(ភាគីទទួល) នារសៀលថ្ងៃទី១០ ខែតុលា ឆ្នាំ២០១៥។
លោកអគ្គនាយកអាជ្ញាធរជាតិអប្សរា និងលោកឃឹមប៊ុនសុង អភិបាលខេត្តសៀមរាប បានថ្លែងថា ៖ នេះគឺជាចំណងដៃរបស់រាជរដ្ឋាភិបាលកម្ពុជា ក្នុងឱកាសបុណ្យភ្ជុំបិណ្ឌប្រពៃណីជាតិ ដើម្បីផ្ញើជូនប្រជាពលរដ្ឋខេត្តសៀមរាប ក៏ដូចជាសាធារណជនទូទៅផងដែរ ព្រោះថា ផ្លូវអាជីវកម្មផ្ទេរ BOT គឺជាប្រភេទផ្លូវដែលគេកសាងឡើងក្រោមរូបមន្តនៃការធ្វើវិនិយោគ ដែលត្រូវបានប្រើប្រាស់ថវិកាឯកជន ដែលក្នុងនោះរួមមាន៣ដំណាក់កាល គឺដំណាក់កាលសាងសង់ ដំណាក់កាលប្រតិបត្តិការអាជីវកម្ម និងដំណាក់កាលផ្ទេរជូនរដ្ឋ។ ក្រោយការសាងសង់រួច ផ្លូវនេះត្រូវបានដាក់ឲ្យប្រើប្រាស់ដោយការបង់ប្រាក់ តាំងពីដើមឆ្នាំ២០១០ លើប្រភេទបណ្ដាយានយន្តដឹកជញ្ជូនធ្វើអាជីវកម្មតែប៉ុណ្ណោះ ដូចជារថយន្តឈ្នួលដឹកអ្នកដំណើរភ្ញៀវទេសចរ និងដឹកទំនិញផ្សេងៗ ជាដើម ក៏ប៉ុន្តែចាប់ពីថ្ងៃចុះហត្ថលេខាលើកិច្ចព្រមព្រៀងនេះតទៅ គឺផ្លូវនេះ ត្រូវបានក្លាយជាផ្លូវសាធារណៈរបស់រដ្ឋ ជូនសាធារណជនប្រើប្រាស់ ដោយឥតមានបង់ប្រាក់ទៀតឡើយ។
លោកឡុង កុសល ប្រធាននាយកដ្ឋានផ្សព្វផ្សាយរបស់អាជ្ញាធរជាតិអប្សរា បានបង្ហាញអំពីសាវតារនៃការកកើតឡើងនៃផ្លូវនេះថា ៖ អាស្រ័យដោយការរីកចម្រើនរបស់ខេត្តសៀមរាប, ការធ្វើចរាចរណ៍ក្នុងក្រុងសៀមរាប មានភាពចង្អៀត,ស ការធ្វើដំណើរ និងដឹកទំនិញផ្សេងៗចូលតាមច្រកខាងលិច កាន់តែមានទំហំច្រើនឡើង, ដូចនេះ ផ្លូវមួយនេះ ត្រូវបានកសាងឡើងជាយុទ្ធសាស្ត្រដឹកជញ្ជូន ច្រកខាងលិចក្រុងសៀមរាប ក្នុងគម្រោងថវិកាវិនិយោគជាង៤លានដុល្លារអាមេរិក ចាប់ផ្តើមសាងសង់នៅក្នុងឆ្នាំ២០០៧ ដោយក្រុមហ៊ុន សូណាវ៉ិច ក្នុងភាគហ៊ុន ៥១% និងអាជ្ញាធរអប្សរា ៤៩%។ ក្រោយពីដំណើរការសាងសង់បានប្រមាណ៣០% ភាគហ៊ុននៃក្រុមហ៊ុន សូណាម៉ិច មានបញ្ហា ដូច្នេះផ្លូវនេះត្រូវបានវិនិយោគបន្តដោយអាជ្ញាធរជាតិអប្សរា ជាឯកតោភាគី។
លោកស៊ុម ម៉ាប់ អគ្គនាយកអាជ្ញាធរជាតិអប្សរា បញ្ជាក់ថា ៖ ការប្រើប្រាស់ផ្លូវតាមរូបមន្ត BOT មួយនេះ មិនទាន់ដល់កិច្ចសន្យាប្រគល់ជូនរដ្ឋនោះទេ ក៏ប៉ុន្តែដើម្បីផលប្រយោជន៍សាធារណៈ រាជរដ្ឋាភិបាល បានសម្រេច ដកចេញពីផ្លូវនេះពីគម្រោង BOT មុនកាលកំណត់៕
ផ្លូវវិនិយោគអាជីវកម្មផ្ទេរBOT ត្រូវបានប្រគល់ឲ្យអាជ្ញាធរខេត្តសៀមរាបគ្រប់គ្រងវិញ
0 Comments