ភ្នំពេញ ៖ បីថ្ងៃនៃពិធីបិណ្ឌ ភ្ជុំបិណ្ឌ គិតចាប់ពីថ្ងៃទី១០ដល់១២ ខែតុលាបទល្មើស លួចឆក់ ប្លន់ ហិង្សា និងគ្រោះថ្នាក់ចរាចរណ៍ មានការថយចុះជាងឆ្នាំមុនគឺអ្នកស្លាប់ដោយគ្រោះថ្នាក់ចរាចរណ៍មានចំនួន៣៤នាក់ របួស១៤៧នាក់ ដោយឡែកអំពើហិង្សាមានតែ១០ករណីប៉ុណ្ណោះ។
លោកគៀត ចន្ទថារិទ្ធ អគ្គស្នងការរងនគរបាលជាតិ និងជាអ្នកនាំពាក្យបានឲ្យដឹងថា គិតចាប់ពីថ្ងៃទី១០ដល់១២ ខែតុលាក្នុងឱកាសពិធីបុណ្យភ្ជុំបិណ្ឌ គ្រោះថ្នាក់ចរាចរណ៍នៅទូទាំងប្រទេសបានកើតមាន៧៤លើក បណ្ដាលឲ្យមនុស្ស៣៤នាក់ស្លាប់។ ក្នុងនោះរបួស១៤៧នាក់ របួសធ្ងន់៩៥នាក់។ ចំនួននេះមានការថយចុះជាងឆ្នាំមុនតែបន្តិចប៉ុណ្ណោះ បើប្រៀបធៀបរយៈពេលដូចគ្នា។ ឆ្នាំមុនគ្រោះថ្នាក់ចរាចរណ៍កើតមាន៧៧លើក ដែលបណ្ដាលឲ្យមនុស្សស្លាប់៣៥នាក់។ លោកបន្ថែមថា គ្រោះថ្នាក់ចរាចរណ៍កើតមានភាគច្រើនគឺបណ្ដាលមកពីការបុកប៉ះទង្គិចគ្នារវាងម៉ូតូនិងម៉ូតូ ហើយអ្នកជិះម៉ូតូនោះទៀតសោតមិនពាក់មួកសុវត្ថិភាព។
លោកអគ្គស្នងការរងបន្តថា បទល្មើស ឆក់ លួច ប្លន់ និងអំពើហិង្សា កើតមានតិចតួចបំផុតពោលគឺហិង្សាដោយចេតនាកើតមាន១០ករណី ហើយដោះស្រាយបាន៨០ភាគរយ និងចាប់បានជនបង្កមួយចំនួនចាត់ការតាមផ្លូវច្បាប់។ ចំណែក គ្រោះអគ្គិភ័យក៏គ្មានអ្វីធំដុំដែរ។ លោកបញ្ជាក់ថានិយាយជារួមរយៈពេលបីថ្ងៃនៃពិធីបុណ្យភ្ជុំ សភាពការណ៍ទូទៅគឺដំណើរការល្អ លើគ្រប់ផ្នែកទាំងអស់ ដោយសារតែសមត្ថកិច្ចប៉ូលិសជាតិបានត្រៀមលក្ខណៈជាមុនតាមរយៈការដាក់យាមកាមនៅតាមវត្តអារាមជាង៤០០០ និងផ្លូវសំខាន់ៗដើម្បីសម្រួលចរាចរណ៍។
លោកគៀត ចន្ទថារិទ្ធបញ្ជាក់ថា ក្នុងឱកាសបុណ្យភ្ជុំបិណ្ឌនៅឆ្នាំនេះអ្នកប្រើប្រាស់រថយន្តគោរពច្បាប់បានល្អ ដែលជាផ្នែកមួយកាត់បន្ថយអត្រាគ្រោះថ្នាក់ចរាចរណ៍បណ្ដាលមកពីរថយន្តច្រើនជាងម៉ូតូ។ ម្យ៉ាងទៀតការជិះលើដំបូល និងដឹកឥវ៉ាន់លើរថយន្តមិនសូវកើតមាន។
ជាមួយគ្នានេះក៏ស្នើឲ្យប្រជាពលរដ្ឋនៅពេលត្រឡប់មកភ្នំពេញវិញរក្សាទម្លាប់ដើម ពោលគឺគោរពច្បាប់ចរាចរណ៍ និងបញ្ចៀសការជិះលើដំបូលរថយន្តជាដើម។
យោងតាមរបាយការណ៍របស់នាយកដ្ឋាន សណ្ដាប់ធ្នាប់ ក្រសួងមហាផ្ទៃ បានឲ្យដឹងថា នៅក្នុងពិធីបុណ្យភ្ជុំបិណ្ឌរយៈពេល ៣ថ្ងៃចាប់ពីថ្ងៃទី ១០-១១-១២ ខែតុលា ឆ្នាំ២០១៥នេះ គ្រោះថ្នាក់ចរាចរណ៍ នៅទូទាំងប្រទេស បានកើតឡើងចំនួន ៧៤លើក ថយចុះ៣លើក (ឆ្នាំមុនកើតឡើង ៧៧លើក) ដោយបានសម្លាប់មនុស្ស ចំនួន ៣៤នាក់ បើធៀបនឹងឆ្នាំមុន ថយចុះម្នាក់ (ឆ្នាំមុនស្លាប់ចំនួន៣៥នាក់) ខណៈអ្នករងរបួសមានចំនួន ១៤៧នាក់ (ធ្ងន់៩៥នាក់ ស្រាល៥២នាក់) ថយចុះ៩នាក់ (ឆ្នាំមុនចំនួន ១៥៦នាក់)។ នេះបើតាមការចុះផ្សាយរបស់ គេហទំព័រអគ្គស្នងការ នគរបាលជាតិ។
របាយការណ៍ដដែលបញ្ជាក់ទៀតថា គ្រោះថ្នាក់ចរាចរណ៍ ទូទាំងប្រទេសទាំង៣ថ្ងៃកន្លងទៅនេះ បានបណ្ដាលឲ្យខូចខាតម៉ូតូ ៩៦គ្រឿង រថយន្តធុនតូច ២០គ្រឿង រថយន្តធុនធំ៣គ្រឿង និងយានយន្តផ្សេងៗចំនួន៨គ្រឿង ហើយមូលដែលបង្កគ្រោះថ្នាក់រួមមាន៖ ល្មើសល្បឿន ៣១លើក មិនគោរពសិទ្ធិអាទិភាព ១៦លើក ប្រជែងគ្រោះថ្នាក់៨លើក មិនប្រកាន់ស្តាំ៥លើក ស្រវឹង៦លើក បត់ឆ្វេងស្តាំ និងមិនប្រុងប្រយ័ត្ន៨លើក៕
៣ថ្ងៃនៃបុណ្យភ្ជុំបិណ្ឌ បទល្មើស ឆក់ ប្លន់ ហិង្សា និងគ្រោះថ្នាក់ចរាចរណ៍មានការថយចុះជាងឆ្នាំមុន
0 Comments