កំពង់ឆ្នាំង ៖ ផ្ទះទឹករបស់អាជីវករទិញត្រីមួយខ្នងត្រូវបានភ្លើងឆាបឆេះ ដោយសារផ្ទុះអាគុយប្រើប្រាស់ឋាមពលពន្លឺព្រះអាទិត្យ ពេលម្ចាស់ផ្ទះមិននៅ តែត្រូវបានអ្នកស្រុករស់នៅជិតខាងគាស់ទ្វារផ្ទះជួយពន្លត់ទាន់ពេលវេលា។
ហេតុការណ៍ការភ្ញាក់ផ្អើលនេះបានកើតឡើងនៅវេលាម៉ោង២និង៣០នាទីរសៀល ថ្ងៃទី១៣ ខែតុលា ឆ្នាំ២០១៥ នៅក្នុងភូមិឆ្នុកទ្រូ ឃុំឆ្នុកទ្រូ ស្រុកបរិបូណ៌ ខេត្តកំពង់ឆ្នាំង។
សមត្ថកិច្ចនគរបាលមូលដ្ឋានបាននិយាយឲ្យដឹងថា ម្ចាស់ផ្ទះរងគ្រោះមានឈ្មោះគៀត សារិន (ហៅហូយ) អាយុ៥១ឆ្នាំ ជាអ្នកទិញលក់ត្រី នៅភូមិឃុំកើតហេតុខាងលើ។ មុនពេលកើតហេតុម្ចាស់ផ្ទះបានទៅធ្វើបុណ្យនៅផ្ទះបងប្អូន ដោយបើកចរន្តឋាមពលពន្លឺព្រះអាទិត្យបញ្ចូលអាគុយចោល និងចាក់សោផ្ទះជាប់។
នៅម៉ោង២និង៣០នាទីរសៀល ស្រាប់តែគេឮស្នូរផ្ទុះអាគុយសម្រាប់ប្រើពន្លឺព្រះអាទិត្យ១៥០អំពែ២គ្រឿង បង្កឲ្យមានអគ្គិភ័យឆេះឡើង បណ្តាលឲ្យមានផ្សែងខ្មៅខ្មួលខ្មាញ់ចេញពីក្នុងផ្ទះធ្វើឲ្យមានការភ្ញាក់ផ្អើលឡើង។ ក្នុងពេលនោះដែរអ្នករស់នៅជិតខាង ក៏បាននាំគ្នាគាស់ទ្វារផ្ទះចូលទៅជួយពន្លត់ ដោយខ្លះបានប្រើម៉ាស៊ីនបូមទឹកបាញ់ពន្លត់រហូតភ្លើងបានរលត់ទៅវិញ។
សមត្ថកិច្ចបានឲ្យដឹងទៀតថា នៅក្នុងហេតុការណ៍នេះ បណ្ដាលឲ្យខូចខាតអាគុយ១៥០ អំពែចំនួន២គ្រឿង ឆេះពិតាន ជញ្ជាំងផ្ទះ និងឥវ៉ាន់ក្នុងផ្ទះអស់មួយចំនួន។ ករណីនេះបើគ្មានអ្នកជិតខាងជួយទាន់ពេលវេលានោះទេ ផ្ទះទាំងមូលពិតជាឆាបឆេះខ្ទេចអស់ស្រុងជាពុំខានឡើយ ហើយបញ្ហានេះក៏ជាដំណឹងមួយសម្រាប់អ្នកប្រើប្រាស់ អគ្គិសនីពន្លឺព្រះអាទិត្យគួរតែមានការប្រុងប្រយ័ត្នឲ្យបានខ្ពស់ នៅពេលចេញពីផ្ទះគួរតែបិតចរន្តអគ្គិសនីកុំធ្វេសប្រហែសឲ្យសោះ៕
អាគុយ២គ្រឿងប្រើឋាមពលពន្លឺព្រះអាទិត្យ ផ្ទុះឆាបឆេះផ្ទះទឹកអាជីវករទិញត្រីម្នាក់
0 Comments