រតនគិរី ៖ ផ្លូវជាតិលេខ៧៦ របស់រាជរដ្ឋាភិបាលសាងសង់ឡើងនៅឆ្នាំ២០១៣ ហើយបានសម្ពោធឲ្យប្រើប្រាស់នៅថ្ងៃទី២១ ខែវិច្ឆិកា ឆ្នាំ២០១៦ ដែលតភ្ជាប់ពីខេត្តរតនគិរី ទៅខេត្តមណ្ឌលគិរី បច្ចុប្បន្ននេះបានរងការខូចខាតជាបណ្ដើរៗស្ទើរគ្រប់ទីកន្លែងបានក្លាយជាសំបុកមាន់ និងថ្លុកទឹកបង្កឲ្យមានការលំបាកដល់អ្នកធ្វើដំណើរតាមទោចចក្រយានយន្តផ្សេងរហូតដល់កើតមានគ្រោះថ្នាក់ចរាចរណ៍ថែមទៀត។
ជាក់ស្តែងកំណាត់ផ្លូវជាតិលេខ៧៦ នៅត្រង់ចំណុច ភូមិព្រួក ស្ថិតក្នុងឃុំប៉ាតាង ស្រុកលំផាត់ដែលមានប្រវែងជាងមួយរយម៉ែត្រ បានរបើកជ័រកៅស៊ូចេញទាំងស្រុងតែម្តង នៅសល់តែដុំថ្ម និងដីសុទ្ធ ក្លាយជាជង្ហុកជ្រៅទៅៗ រហូតបង្កជាគ្រោះថ្នាក់កើតឡើង កាលពីវេលាម៉ោង៣និង៤០នាទីល្ងាច ថ្ងៃទី៨ ខែឧសភា ឆ្នាំ២០១៩។
តាមប្រភពពីកន្លែងកើតហេតុបានឲ្យអ្នកសារព័ត៌មានដឹងថា នៅវេលាម៉ោងខាងលើ ឃើញរថយន្តម៉ាកព្រូស ពណ៌សមួយគ្រឿង ពាក់ស្លាកលេខ ភ្នំពេញ 2AJ-5222 បោះពួយយ៉ាងលឿនក្នុងទិសដៅពីជើងទៅត្បូង ក្នុងគោលបំណងឆ្ពោះទៅកាន់ក្រុងសែនមនោរម្យខេត្តមណ្ឌលគិរី។ តែជាចៃដន្យខណៈមកដល់ចំណុចកើតហេតុ ត្រង់ចំណុច(កំណាត់ផ្លូវដែលរងការខូចយ៉ាងដំណំនោះ) ដោយខាងមន្ទីរសាធារណការ និងដឹកជញ្ជូនរបស់ខេត្តរតនគិរីពុំបានបិទស្លាកសញ្ញាសម្គាល់អ្វីផងនោះ ត្រូវបានរថយន្តមួយគ្រឿងនេះវ៉ាក់អើគ្រប់គ្រងស្ថានការណ៍លែងកើតស្លន់ស្លោ ក៏ជាន់ហ្វ្រាំងពេញទំហឹងបណ្តាលឲ្យរថយន្តរេចង្កូតទៅស្តាំដៃខាងលិចចិញ្ចើមផ្លូវក្រឡាប់ពីរបីត្រឡប់អ្នកដំណើរបួនប្រាំនាក់រួមទាំងតៃកុងរថយន្តរងរបួសធ្ងន់ស្រាលរណូករណែល ចំណែករថយន្តក៏រងការខូចខាតផ្នែកខាងមុខស្ទើរតែទាំងស្រុង។
ប្រភពបានបន្តថា ក្រោយពេលកើតហេតុភ្លាមៗ គេឃើញក្រុមសមត្ថកិច្ចនគរបាលប៉ុស្តិ៍ឃុំប៉ាតាងចុះមកដល់ ធ្វើការវាស់វែងបំពេញកំណត់ហេតុ និងចាត់ចែងមធ្យោបាយដឹកបញ្ជូនអ្នករងគ្រោះទៅកាន់គ្លីនិកឯកជនក្នុងក្រុងបានលុង ដើម្បីសង្គ្រោះអាយុជីវិតជាបឋម។
សមត្ថកិច្ចនគរបាលប៉ុស្តិ៍ឃុំប៉ាតាងបានឲ្យដឹងថា ជនរងគ្រោះសរុបចំនួន៥នាក់(អ្នកខេត្តសៀមរាប)ដែលជួបឧបទ្ទវហេតុខណៈនោះរួមមាន ៖
ទី១-ឈ្មោះ វង្ស មួយ ភេទស្រី អាយុ២៩ឆ្នាំ ជនជាតិខ្មែរ រងរបួសធ្ងន់ធ្ងរត្រង់ចង្កាកឺម(ប្រពន្ធ)
ទី២-ឈ្មោះ ពៅ ជីវិន ភេទប្រុស អាយុ២៨ឆ្នាំ ជនជាតិខ្មែរ(ប្តី)រងរបួសស្រាល។
ទី៣-ឈ្មោះ តាំង គីមសួ ភេទប្រុស អាយុ៣០ឆ្នាំ ជនជាតិខ្មែរ រងរបួសធ្ងន់ត្រង់ដើមទ្រូង។
ទី៤-ឈ្មោះ តាំង គីមសេង ភេទប្រុស អាយុ២៩ឆ្នាំ ជនជាតិខ្មែរ រងរបួសត្រង់ក្បាល (តៃកុងរថយន្ត)។ និងទី៥-ភេទស្រី មិនទាន់ស្គាល់អត្តសញ្ញាណរងរបួសធ្ងន់ឡើងឡានសង្គ្រោះផុត។ រីឯរថយន្តរងគ្រោះ ត្រូវបានម្ចាស់ជួលរថយន្តស្ទូចវិលត្រឡប់ទៅជួសជុលឯខេត្តសៀមរាបវិញ។
គួររំលឹកថា កំណាត់ផ្លូវ ដែលរងការខ្ទេចខ្ទាំមានប្រវែងតែជាងមួយរយម៉ែត្រប៉ុណ្ណោះ បានដង្ហោយហៅខាងមន្ទីរសាធារណការ និងដឹកជញ្ជូនខេត្តរតនគិរីឲ្យចុះធ្វើការជួសជុលឲ្យដូចដើម ព្រោះទុកចោលជិតពីរឆ្នាំកន្លងមកហើយ។ សូម្បីតែស្លាកសញ្ញាសំគាល់ក៏ពុំបានដាក់ឡើយ។
ប្រជាពលរដ្ឋទូទាំងខេត្តរតនគិរី ដាក់ការរិះគន់ចំៗទៅលើ លោក ស៊ុន ប៉ូលិន ប្រធានមន្ទីរសាធារណការ និងដឹកជញ្ជូនខេត្តរតនគិរី ក្នុងអំឡុងពេលលោកចូលកាន់ដំណែងពីឆ្នាំ២០១៦ រហូតមកទល់ឆ្នាំ២០១៩នេះ មានរយៈកាល៣ឆ្នាំ ចំពោះស្នាដៃដែលជាសមិទ្ធផលរបស់លោកនៅមានកម្រិតនៅឡើយ ពុំទាន់ឃើញលេចធ្លោ ជាដុំកំភួនឆ្លើយតបស្របទៅនឹងការប្តេជ្ញាចិត្តថ្ងៃចូលកាន់ដំណែងនោះផងដែរ។
ជាក់ស្ដែងសមិទ្ធផលថ្មីៗជាអំណោយរបស់រាជរដ្ឋាភិបាលប្រគល់ជូនខេត្តរតនគិរី គឺទី១-ផ្លូវតភ្ជាប់ពីស្រុកអូរជុំទៅ ស្រុកតាវែង លោកសាងសង់បានជាងពាក់កណ្ដាល ហើយក៏ទុកចោលដកយកគ្រឿងចក្រចាកចេញទៅធ្វើកន្លែងថ្មី។ ទី២-ផ្លូវតភ្ជាប់ពីស្រុកបរកែវទៅស្រុកអណ្តូងមាស លោកប្រធានសាងសង់បានជាងពាក់កណ្ដាលហើយ ក៏ទុកចោលរើគ្រឿងចក្រទៅធ្វើកន្លែងថ្មីទៀត ទុកឲ្យប្រជាពលរដ្ឋរងទុក្ខវេទនាក្នុងការធ្វើដំណើរទាំងរដូវប្រាំង និងរដូវវស្សាជាដើម។..ល។ ហើយពួកគាត់មានការព្រួយបារម្ភ និងភ័យខ្លាចនៅរាល់ការស្ថាបនាសាងសង់ផ្លូវពីសំណាក់មន្ទីរសាធារណការខេត្តរតនគិរី ជូនប្រជាពលរដ្ឋបានប្រើប្រាស់នៅមានកម្រិតបែបនេះ៕
Source: Kampuchea Thmey Daily
0 Comments