ភ្នំពេញ ៖ កាលពីថ្ងៃទី១៧ ខែកញ្ញា ឆ្នាំ២០១៨ លោក ជុំ សុន្ទរី រួមជាមួយឯកអគ្គរដ្ឋទូត ឯកអគ្គរាជទូតចំនួន១១ប្រទេសផ្សេងទៀត បានចូលជួបលោក ដូណាល់ ត្រាំ ប្រធានាធិបតីសហរដ្ឋអាមេរិក ដើម្បីជូនព្រះរាជសារតាំងរបស់ព្រះករុណាព្រះបាទ សម្ដេចព្រះ បរមនាថ នរោត្តម សីហមុនី ព្រះចៅក្រុងកម្ពុជាធិបតី ដែលបានតែងតាំងលោកជាឯកអគ្គរាជទូតវិសាមញ្ញ និងពេញសមត្ថភាពនៃព្រះរាជាណាចក្រកម្ពុជាប្រចាំសហរដ្ឋអាមេរិក និងព្រះរាជសារបញ្ចប់អាណត្តិបេសកម្មរបស់ឯកអគ្គរាជទូតមុន។
នៅក្នុងចំណាប់អារម្មណ៍ នាឱកាសនោះលោក ជុំ សុន្ទរី បានបញ្ជាក់ថា កម្ពុជាសម្រេចបានការរីកចម្រើនគួរឲ្យកត់សម្គាល់ក្នុងការអភិវឌ្ឍន៏សេដ្ឋកិច្ច សង្គម ក្នុងរយៈពេលពីរទសវត្សរ៍កន្លងមកនេះ បន្ទាប់ពីទទួលបានមកវិញនូវសន្តិភាព និងស្ថិរភាពទាំងស្រុង ក្នុងទសវត្សរ៍ឆ្នាំ១៩៩០។ លោកបន្តថា ការផ្លាស់ប្ដូរពាណិជ្ជកម្មទ្វេភាគី និងជំនួយអភិវឌ្ឍន៍របស់សហរដ្ឋអាមេរិក បានរួមចំណែកដ៏សំខាន់ក្នុងការរីកលូតលាស់របស់ប្រទេសកម្ពុជា ដែលនឹងត្រូវបានជំរុញបន្ថែមទៀត ដោយការចុះហត្ថលេខាកាលពីថ្ងៃទី២៣ ខែមេសា ឆ្នាំ២០១៨ របស់លោកប្រធានាធិបតី ទៅលើប្រព័ន្ធអនុគ្រោះទូទៅ (Consolidated Appropriation Act 2018) ចំពោះប្រទេសកំពុងអភិវឌ្ឍន៍ ក្នុងចំណោមនោះ ក៏មានកម្ពុជាផងដែរ សម្រាប់រយៈពេលពីថ្ងៃទី០១ ខែមករា ឆ្នាំ២០១៨ ទៅដល់ថ្ងៃទី៣១ ខែធ្នូ ឆ្នាំ២០២០។
ឆ្លើយតបចំពោះចំណាប់អារម្មណ៍របស់លោក ជុំ សុន្ទរី លោកប្រធានាធិបតីអាមេរិក បានលើកឡើងថា ការអញ្ជើញមកដល់របស់ឯកអគ្គរាជទូតកម្ពុជា នៅទីក្រុងវ៉ាស៊ីនតោន ពិតជាមានសារៈសំខាន់នៅក្នុងកម្រិតជាច្រើន។ វាមានអត្ថន័យបញ្ជាក់អំពីទំនាក់ទំនង ដែលត្រូវបានស្ដារឡើងវិញ ក្នុងរយៈកាលជាង២៥ឆ្នាំ ដែលយើងទទួលបាន បន្ទាប់ពីកិច្ចព្រមព្រៀងទីក្រុងប៉ារីស។
លោកបញ្ជាក់ថា ការអភិវឌ្ឍន៍សេដ្ឋកិច្ច ដែលប្រទេសកម្ពុជាសម្រេចបានក្នុងពេលនេះ គឺគួរឲ្យភ្ញាក់ផ្អើលណាស់ ហើយសហរដ្ឋអាមេរិក មានមោទនភាព ដែលជាដៃគូនៅក្នុងកិច្ចអភិវឌ្ឍន៍នេះ។
លោក ដូណាល់ត្រាំលើកឡើងទៀតថា “យើងដឹងថា កម្ពុជាមានសក្តានុពលសម្រាប់កិច្ចអភិវឌ្ឍន៍ធំធេងជាងនេះ នៅក្នុងអនាគត ហើយយើងមានក្តីរីករាយធ្វើការជាមួយគ្នា។ នៅចំពោះមុខការប្រឈម និងកាលានុវត្តភាពជាច្រើនអនេក។ យើងមានការរំពឹងថា នឹងមានការរីកចម្រើនក្នុងពាណិជ្ជកម្មសេរី និងត្រឹមត្រូវ សន្តិសុខតំបន់ និងអភិបាលកិច្ច ប្រកបដោយការទទួលខុសត្រូវ និងប្រជាធិបតេយ្យ ហើយយើង នឹងខិតខំ ដើម្បីពង្រឹងកិច្ចសហប្រតិបត្តិការលើផ្នែកសុខាភិបាលទូទៅ”។
នៅទីបញ្ចប់លោក ដូណាល់ ត្រាំ ប្រធានាធិបតីសាររដ្ឋអាមេរិកបានបញ្ជាក់ថា”ខ្ញុំរីករាយនឹងធ្វើការជាមួយឯកឧត្តម ដើម្បីជំរុញរបៀបវារៈរួមរបស់យើង ហើយនិងធ្វើឲ្យទំនាក់ទំនងរវាងប្រទេសទាំងពីរកាន់តែស៊ីជម្រៅថែមទៀត”៕
Source: Kampuchea Thmey Daily
0 Comments