ប្រធាន​សមាគម​អ្នកលក់​ឱសថ​កម្ពុជា ណែនាំ​ដល់​អ្នកលក់​ឱសថ​ទាំងអស់​កុំ​លក់​ឱសថ​ក្លែងក្លាយ ​ឬ​ឱសថ​គ្មាន​គុណភាព

​ភ្នំពេញ ៖ ប្រធាន​សមាគម​អ្នកលក់​ឱសថ​កម្ពុជា​ បាន​អំពាវ​ដល់​អ្នកលក់​ឱសថ​តាម​ឱសថ​ស្ថាន​នានា​ទូទាំង​ប្រទេស​ត្រូវមាន​ភាព​សុចរិត​នៅក្នុង​ការ​ប្រកប​មុខរបរ ដោយ​មិន​ត្រូវ​លក់​ឱសថ​ក្លែងក្លាយ​ឱសថ​គ្មាន​គុណភាព ឬ​ឱសថ​ដែល​ហួស​កាលបរិច្ឆេទ​ប្រើប្រាស់​ជាដាច់ខាត ដើម្បី​ចូលរួម​លើក​កម្ពស់​សុខុមាលភាព​របស់​ប្រជាជន​កម្ពុជា និង​ជៀស​ផុត​ពី​ទោសទណ្ឌ​តាមផ្លូវ​ច្បាប់​។​
​
លោក​បណ្ឌិត ឡី សុភាព ប្រធាន​សមាគម​អ្នកលក់​ឱសថ​កម្ពុជា​បានលើកឡើង​បែបនេះ​ក្នុង​វគ្គ​បណ្ដុះបណ្ដាល​ដល់​អ្នក​ដល់​ឱសថ​តាម​ឱសថ​ស្ថាន​នានា​កាលពីពេល​ថ្មីៗ​នេះ​។​
​
ចំណែក​លោក​វេជ្ជបណ្ឌិត ង៉ែត វ៉ាន​ថួ​ក ប្រធាន​សេវា​ឯកជន ​នៃ​មន្ទីរ​សុខាភិបាល​រាជធានី​ភ្នំពេញ​បានលើកឡើង​ថា​គួរ​យក​ឱសថ​ណា​ការ​ទទួលស្គាល់​ពី​ក្រសួង​ដែល​ផ្ដល់​នាយកដ្ឋាន​ឱសថ​យក​ទៅ​ចែក​ចាយ ឬ​លក់​ឲ្យ​អ្នកជំងឺ​ហើយ​សូម​កុំ​យក​ឱសថ​ណា​ដែល​គ្មាន​ការចុះបញ្ជី​ការ​ពី​ក្រសួង​សុខា​ភិបាល។​
​
ជាមួយគ្នា​នោះ​ដែរ លោក​ប្រធាន​សេវា​ឯកជន និង​មន្ទីរ​សុខាភិបាល​ក៏បាន​លើកឡើងថា នៅពេល​បច្ចុប្បន្ន​នេះ​ក៏មាន​ជនខិលខូច​មួយចំនួន​បាន​លួច​នាំយក​ឱសថ​ធ្វើការ​ចែកចាយ​ដោយ​គ្មាន​ការ​អនុញ្ញាត​ពី​ក្រសួងសុខាភិបាល​ផងដែរ។​

លោក​បាន​បញ្ជាក់ថា «​យើង​ដឹងថា មាន​អ្នក​នាំចូល​ឱសថ​ដោយ​គ្មាន​ការអនុញ្ញាត​ពី​ពី​ក្រសួង ឬ​ច្បាប់​អនុញ្ញាត។ យើង​នឹង​តាមដាន ហើយ​ចាត់វិធានការ​កុំ​ឲ្យ​មាន​ចរាចរ​នៅ​លើ​ទីផ្សារ​»។​
​
លោក​ ង៉ែត វ៉ាន​ថូ​ក ក៏បាន​លើកឡើងថា ទោះបីជា​ឪពុក ឬ​ម្ដាយ​ជា​អ្នក​ដល់​ឱសថ ហើយ​កូន​មិន​បាន​រៀនសូត្រ​តែ​រៀន​តាម​ឪពុកម្ដាយ​ធ្វើការ​ផ្សំ​ថ្នាំ​ក៏​គ្មាន​អនុញ្ញាត​នោះ គឺ​ត្រូវ​ឆ្លងកាត់​វគ្គ​បណ្ដុះ​បណ្ដាល​ជាមុនសិន បើ​មិន​ដូច្នេះ​ទេ​គ្មាន​ការអនុញ្ញាត​នោះ​ទេ ហើយ​អាច​នឹង​ពិន័យ។​

លោក​វេជ្ជបណ្ឌិត​បាន​គូស​បញ្ជាក់​ថា ប្រសិនបើ​សមត្ថកិច្ច​រកឃើញ​ការ​ដាក់​លក់​ឱសថ​ក្លែង ក្លាយ​អ្នកលក់​ត្រូវ​ទទួលទោស​ចំនួន​ពីរ​ គឺ​ទី​១- ទោស​លក់​ឱសថ​ក្លែងក្លាយ​ត្រូវ​ផ្ដន្ទាទោស​ដាក់ ពន្ធនាគារ​ពី​៥​ឆ្នាំ ​ដល់​១០​ឆ្នាំ និង​ទី​២- បើ​ក្នុង​ករណី​ឱសថ​ក្លែងក្លាយ​នេះ​បណ្ដាល​ឲ្យ​មាន មនុស្ស​ស្លាប់​ដោយ​អ​ចេតនា​ផ្អែក​តាម​មាត្រា​២០៧ អ្នកលក់​ត្រូវ​មានទោស​ជាប់ពន្ធនាគារ​ពី​១​ឆ្នាំទៅ​៣​ឆ្នាំ​បន្ថែមទៀត។​
​លោក​ឧត្ដមសេនីយ៍​ឯក ជា ប៊ុន​ថុល អនុ​ប្រធាន​នាយកដ្ឋាន​កណ្ដាល​នគរបាល​យុត្តិធម៌​បាន​លើក​ឡើង​ថា បើ​និយាយ​នៅ​ក្នុង​វិស័យ​សុខាភិបាល គឺ​មាន​ច្បាប់​ចំនួន​៣​ជា​មូលដ្ឋាន​គឺ​ទី​១-​ច្បាប់​ស្ដីពី​ការ​គ្រប់គ្រង​ឱសថ​,​ទី​២-​ច្បាប់​ស្ដីពី​ការគ្រប់គ្រង​អ្នក​ប្រកប​របរ​វេជ្ជសាស្ត្រ​អម​វេជ្ជសាស្ត្រ និង​ជំនួយ​វេជ្ជ​សាស្ត្រ និង​ទី​៣- ច្បាប់​ស្ដីពី​ការគ្រប់គ្រង​អ្នក​ប្រកប​របរ​វិជ្ជាជីវៈ​ក្នុង​វិស័យ​សុខាភិបាល​ដែល​នៅ​ក្នុង​ច្បាប់​ទាំង​៣​ខាងលើនេះ ​ទោស​ទណ្ឌ​កម្រិត​ធ្ងន់​របស់​វា គឺ​បទឧក្រិដ្ឋ​ដែល​មាន​ការ​ផ្ដន្ទាទោស​ដាក់​ពន្ធនាគារ​ពី​៥​ឆ្នាំ​ ដល់​១០​ឆ្នាំ។
​
លោក​ឧត្ដមសេនីយ៍​ឯក​ក៏បាន​គូស​បញ្ជាក់​ថា ក្នុង​ច្បាប់​ទាំង​៣​ នៃ​វិស័យ​សុខាភិបាល​ខាងលើនេះ ជាពិសេស​ច្បាប់ ​ស្ដីពី​ការគ្រប់គ្រង​ឱសថ គឺ​មាន​ទម្ងន់​ធ្ងន់​ជាងគេ​ដែល​ច្បាប់​មួយ​នេះ​មានតែ​១៥​មាត្រា​ប៉ុណ្ណោះ ហើយ​ត្រង់​មាត្រា​១២​បាន​ចែងថា ប្រសិនបើ​លក់​ឱសថ​ក្លែងក្លាយ​ត្រូវ​ផ្ដន្ទាទោស​ដាក់​ពន្ធនាគារ​ពី​៥​ឆ្នាំ​ ដល់​១០​ឆ្នាំ និង​ពិន័យ​ជា​ប្រាក់​ពី​១០​លាន​រៀល ​ទៅ​៥០​លាន​រៀល។​
​
គួរ​បញ្ជាក់​ថា នៅ​ក្នុង​វគ្គ​បណ្ដុះបណ្ដាល​អ្នកលក់​ឱសថ​តាម​ឱសថ​ស្ថាន​ក្រោម​ការរៀបចំ​ដោយ​មន្ទីរ​សុខាភិបាល​រាជធានី​ភ្នំពេញ​ សហការ​ជាមួយ​អគ្គស្នងការដ្ឋាន​នគរបាល​ជាតិ​សហព័ន្ធ​វេជ្ជសាស្ត្រ ឱសថ​សាស្ត្រ និង​ទន្តសាស្ត្រ​កម្ពុជា និង​សមាគម​អ្នកលក់​ឱសថ​កម្ពុជា៕​



​

Source: Kampuchea Thmey Daily