ទីភ្នាក់ងារអវកាសអាមេរិកបានប្រកាសកាលពីថ្ងៃចន្ទថា យានអវកាស Parker Solar Probe របស់អង្គការ NASA ដែលបាញ់បង្ហោះកាលពីដើមឆ្នាំនេះ គឺបានបង្កើតកំណត់ត្រាថ្មីមួយសម្រាប់ការក្លាយទៅជាវត្ថុដែលផលិតឡើងដោយមនុស្សទៅជិតព្រះអាទិត្យបំផុត។
អង្គការ NASA បាននិយាយក្នុងសេចក្តីថ្លែងការណ៍មួយថា “យានអវកាសនេះបានបំបែកកំណត់ត្រាបច្ចុប្បន្នដែលមានចម្ងាយ៤២.៧៣លានគីឡូម៉ែត្រពីផ្ទៃព្រះអាទិត្យនៅថ្ងៃទី២៩ខែតុលាឆ្នាំ២០១៨។ កំណត់ត្រាមុនសម្រាប់ការឈានទៅជិតព្រះអាទិត្យបំផុតគឺត្រូវបានកំណត់ដោយយានអវកាស Helios 2 នៅខែមេសាឆ្នាំ១៩៧៦”។
យានអវកាសគ្មានមនុស្សបើកតម្លៃ១.៥ពាន់លានដុល្លារមួយនេះបានបាញ់បង្ហោះកាលពីខែសីហាសម្រាប់បេសកកម្មយុទ្ធសាស្ត្រមួយដើម្បីការពារផែនដីដោយការបង្ហាញពីអាថ៌កំបាំងនៃព្យុះពន្លឺព្រះអាទិត្យដ៏គ្រោះថ្នាក់។
កំណត់ត្រាមួយផ្សេងទៀតក៏ត្រៀមបំបែកដោយយានអវកាស Parker Solar Probe ផងដែរ។
អង្គការ NASA បាននិយាយថា “យានអវកាសនេះត្រូវបានគេរំពឹងថានឹងបំបែកឯតទគ្គកម្មសម្រាប់យានអវកាសល្បឿនលឿនបំផុតដែលធ្វើដំណើរជាមួយព្រះអាទិត្យនៅថ្ងៃទី២៩ខែតុលា។ កំណត់ត្រាបច្ចុប្បន្នសម្រាប់ល្បឿនយានអវកាសគឺមានកម្រិត២៤៦,៩៦០គីឡូម៉ែត្រក្នុងមួយម៉ោងដែលកំណត់ដោយយានអវកាស Helios 2 នៅខែមេសាឆ្នាំ១៩៧៦”។
ការជួបជិតបំផុតជាលើកដំបូងរបស់យានអវកាស Parker ជាមួយព្រះអាទិត្យត្រូវបានគេគ្រោងទុកនៅថ្ងៃទី៣១ខែតុលា។
អង្គការ NASA បាននិយាយថា ការចូលជិតចុងក្រោយរបស់វា (៣.៨៣លានម៉ាយល៍ពីផ្ទៃរបស់ព្រះអាទិត្យ) ត្រូវបានគេរំពឹងថានឹងកើតឡើងនៅឆ្នាំ២០២៤៕ AFP
Source: Kampuchea Thmey Daily
0 Comments