ភ្នំពេញ ៖ តារាសម្ដែងស្រីដែលតែងជួបរឿងបរាជ័យផ្ទួនៗគ្នា ទាំងជីវិតស្នេហា និងមុខជំនួញ កញ្ញា ពេជ្រ ថាវរ៉ា បានធ្វើឲ្យមហាជនមានការរន្ធត់ចិត្ត និងភ្ញាក់ផ្អើលស្ទើរគ្រប់គ្នា ខណៈរូបថតមួយសន្លឹករបស់តារាស្រីរូបនេះត្រូវបានអ្នកនិយមលេងហ្វេសប៊ុកជាច្រើនយកមកបង្ហោះ និងShareបញ្ជូនបន្តឲ្យគ្នា បញ្ជាក់អំពីសកម្មភាពគ្រោះថ្នាក់ នៃការតាមបាញ់ប្រហារសម្លាប់ជីវិត ដែលធ្វើឲ្យរូបនាងរងគ្រាប់កាំភ្លើងហូរឈាមប្រឡាក់ពេញខ្លួន ដេកដួលភ្លាមៗនៅមុខផ្ទះ។
បើតាមការសង្កេតទៅលើរូបថតខាងលើដែលបង្ហាញពីសកម្មភាពនៃអំពើបាញ់ប្រហារកើតមកលើតារាសម្ដែង កញ្ញា ពេជ្រ ថាវរ៉ា ត្រូវបានអ្នកលេងហ្វេសប៊ុកយកបង្ហោះបង្កឲ្យមហាជនអ្នកគាំទ្រមានការភ្ញាក់ផ្អើលខ្លាំង ក្រោយពីពួកគាត់បានឃើញតារាសម្ដែងរូបនេះរងគ្រោះដោយអំពើបាញ់សម្លាប់រហូតដេកដួលនៅខាងមុខផ្ទះមានឈាមហូរស្រោចពេញខ្លួន។
ស្របពេលនៃការបែកធ្លាយដំណឹង រួមជាមួយនឹងរូបថតរបស់តារាសម្តែងមាឌធំដំបង កញ្ញា ពេជ្រ ថាវរ៉ា ដែលត្រូវបានគេបង្ហោះ និងបញ្ជូនឲ្យគ្នាបន្តនៅលើបណ្ដាញទំនាក់ទំនងសង្គមនេះដែរភ្លាមៗនេះក៏ឃើញមានអ្នកគាំទ្រ ក៏ដូចជាអ្នកនិយមលេងហ្វេសប៊ុកជាច្រើននាក់ បានសរសេរតបជាសំនួរ និងបញ្ចេញអារម្មណ៍ភ្ញាក់ផ្អើលព្រមៗគ្នាផងដែរ ជុំវិញហេតុការណ៍ នៃការតាមបាញ់សម្លាប់រហូតដល់ខាងមុខផ្ទះនេះ។
ថ្វីត្បិតតែរូបថតមួយសន្លឹកនេះបានស្តែងឲ្យឃើញថា តារាសម្តែងល្បីឈ្មោះគួរសម កញ្ញា ពេជ្រ ថាវរ៉ា បានរងរបួសត្រូវគ្រាប់កាំភ្លើងដេកដួលសន្លប់ស្ដូកស្ដឹង មិនដឹងស្លាប់ ឬមួយរស់ ព្រោះតែជនមិនស្គាល់មុខតាមបាញ់ប្រហារមកលើ។ ជាមួយគ្នានោះក៏មានមតិខ្លះបានលើកឡើងថា ទំនងហេតុការណ៍គ្រោះថ្នាក់នេះ គឺគ្រាន់តែជាការថតសម្តែងក្នុងឈុតសាច់រឿងប៉ុណ្ណោះទេ….! ដោយសារមើលទៅវាមិនដូចជាការពិតឡើយ។
មានអ្នកគាំទ្រ និងមជ្ឈដ្ឋានមហាជនខាងក្រៅជាច្រើននបានសរសេរសារចោទជាសំនួរថា តើនេះជាការពិត ឬគ្រាន់តែជាការថតសម្តែងរឿង?? ប៉ុន្តែបើទោះជាមានសំណួរចោទសួរសម្ដែងពីក្តីបារម្ភក៏ដោយ គឺពុំទាន់មានប្រភពណាមួយចេញមុខបញ្ជាក់ឲ្យច្បាស់នៅឡើយទេ ជុំវិញហេតុការណ៍កើតឡើងខាងលើនេះ។ ខណៈនៅព្រឹកថ្ងៃទី១៤ ខែសីហា ឆ្នាំ២០១៥នេះ កម្ពុជាថ្មីក៏នៅមិនទាន់បានទទួលការបកស្រាយបំភ្លឺណាមួយពីតារាសម្តែងកញ្ញា ពេជ្រ ថាវរ៉ា នៅឡើយទេ ព្រោះលេខទូរស័ព្ទដែលនាងធ្លាប់ប្រើមិនអាចធ្វើការទំនាក់ទំនងបានទេ៕
តារាសម្ដែង ពេជ្រ ថាវរ៉ា ត្រូវជនសង្ស័យតាមបាញ់សម្លាប់ដល់មុខផ្ទះ
0 Comments