ភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ បានណែនាំដល់អាជ្ញាធរ និងសមត្ថកិច្ចពាក់ព័ន្ធ ត្រូវពង្រឹងស្ថិរភាពសន្ដិសុខ និងសណ្ដាប់ធ្នាប់នៅតាមព្រំដែនឲ្យបានល្អប្រសើរ ខណៈបច្ចុប្បន្នបទល្មើសនៅតាមព្រំដែននៅតែបន្តកើតមានជាបន្តបន្ទាប់នោះ។
សម្ដេចក្រឡាហោម ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃបានជំរុញឲ្យអគ្គស្នងការនគរបាលជាតិ អគ្គនាយកដ្ឋានអន្ដោប្រវេសន៍ គណៈបញ្ជាការឯកភាពរដ្ឋបាលខេត្តជាប់ព្រំដែនត្រូវសហការឲ្យបានល្អជាមួយបណ្តាប្រទេសជិតខាងដើម្បីផ្លាស់ប្ដូរសភាពការណ៍ និងរៀបចំប្រព័ន្ធទំនាក់ទំនងទាន់ហេតុការណ៍សហការដោះស្រាយទប់ស្កាត់ និងបង្ក្រាបបទល្មើសគ្រប់ប្រភេទប្រកបដោយប្រសិទ្ធភាពពិសេសបទល្មើសឆ្លងដែនផ្សេងៗ។
ការជំរុញរបស់សម្តេចក្រឡាហោមនេះ បានធ្វើឡើងនៅក្នុងសេចក្ដីជូនដំណឹងមួយ ដែលចេញផ្សាយកាលពីល្ងាចថ្ងៃទី០៥ ខែមិថុនា ឆ្នាំ២០១៨ បន្ទាប់ពីនៅតែមានបាតុភាពកើតឡើងជារឿយៗនៅតាមព្រំដែនពាក់ព័ន្ធនឹង បទល្មើសនិងការចេញ-ចូលឆ្លងកាត់ព្រំដែនខុសច្បាប់ដែលជាបច្ច័យអាក្រក់អាចបង្កឲ្យមានអសន្តិសុខតំបន់ព្រំដែន ប៉ះពាល់ដល់មិត្តភាពសហប្រតិបត្តិការជាមួយប្រទេសជិតខាងនិងការអភិវឌ្ឍន៍សេដ្ឋកិច្ចនៃកម្ពុជា។
ដើម្បីពង្រឹងការងារទាំងនេះឲ្យបានល្អប្រសើរនោះសម្តេច ក្រឡាហោមសខេងបានណែនាំដល់អាជ្ញាធរនិងសមត្ថកិច្ចពាក់ព័ន្ធ ត្រូវយកចិត្តទុកដាក់រក្សាឲ្យបាននូវសន្តិភាព ស្ថិរភាព សន្តិសុខនិងសណ្តាប់ធ្នាប់តាមរយៈប្រមែប្រមូលព័ត៌មានជាប្រចាំដើម្បីមានវិធានការទាន់ពេលវេលាក្នុងការទប់ស្កាត់ និងបង្ក្រាបបទល្មើស្រប់ប្រភេទប្រកបដោយប្រសិទ្ធភាពដូចជាអំពើភារវកម្មការជួញដូរដឹកជញ្ជូនគ្រឿងអាវុធជាតិផ្ទុះ ការចរាចរណ៍ជួញដូរគ្រឿងញៀនខុសច្បាប់ ជួញដូរមនុស្ស ជួញដូរពលកម្មខុសច្បាប់ ការដឹកជញ្ជូនអនុផលព្រៃឈើខុសច្បាប់។
ជាមួយគ្នានេះត្រូវសហការជាមួយម្ចាស់ឬអ្នកគ្រប់គ្រងសណ្ឋាគារ ផ្ទះសំណាក់ រោងចក្រសហគ្រាស សិប្បកម្ម និងវិស័យឯកជនដើម្បីអប់រំនិងគ្រប់គ្រងនិយោជិត បុគ្គលិកនិងកម្មករនិងប្រជាពលរដ្ឋឲ្យយល់ដឹងពីច្បាប់បទបញ្ញាតិព្រំដែន របៀបរបបចេញចូលប្រទេសនិងមិនធ្វើដំណើរដោយខុសច្បាប់។
សម្តេចក្រឡាហោមសខេងបានបន្ថែមថា អាជ្ញាធរមានសមត្ថកិច្ចត្រូវពង្រឹងវិធានការការត្រួតពិនិត្យច្រកឆ្លងកាត់ចេញចូលព្រំដែនឲ្យបានហ្មត់ចត់ប្រកបដោយការទទួលខុសត្រូវខ្ពស់ក្នុងនោះត្រូវយកចិត្តទុកដាក់លើកកម្ពស់សមត្ថភាពអនុវត្តការងារប្រចាំថ្ងៃរបស់មន្ត្រីច្រកទ្វារព្រំដែន។ ត្រូវបង្កលក្ខណៈងាយស្រួលដល់ប្រជាពលរដ្ឋដែលធ្វើដំណើរឆ្លងកាត់ចេញចូលព្រំដែនស្របច្បាប់ដើម្បីប្រកបមុខរបរប្រចាំថ្ងៃ ទេសចរណ៍ ពាណិជ្ជកម្មឬមានធុរៈចាំបាច់ផ្សេងៗ។ ទន្ទឹមនឹងនេះត្រូវចាត់វិធានការទប់ស្កាត់ការចេញចូលមិនស្របច្បាប់ឲ្យមានប្រសិទ្ធភាពជាពិសេស ត្រូវលុបបំបាត់ច្រករបៀងតាមព្រំដែនទាំងអស់នៅក្នុងភូមិសាស្ត្រទទួលខុសត្រូវរបស់ខ្លួន។
ចំណែក លោក មឿង តុលា នាយកប្រតិបត្តិមជ្ឈមណ្ឌលសម្ព័ន្ធភាពការងារនិងសិទ្ធិមនុស្សបានឲ្យដឹងកាលពីថ្ងៃទី៦ ខែមិថុនាឲ្យដឹងថា «ខ្ញុំសូមអបអរសាទរចំពោះវិធានការនេះ និងស្នើឲ្យសមត្ថកិច្ចអនុវត្តឲ្យមានប្រសិទ្ធភាពដើម្បីកាត់បន្ថយបទល្មើសឆ្លងដែនផ្សេងៗ និងជួយគាំពារដល់ប្រជាពលរដ្ឋដែលឆ្លងដែនធ្វើដំណើរទៅប្រទេសជិតខាងកាន់តែមានសុវត្ថិភាពថែមទៀត»។
Source: Kampuchea Thmey Daily
0 Comments