ភ្នំពេញ ៖ ជនសង្ស័យជនជាតិវៀតណាមម្នាក់ ជាមុខសញ្ញាជួញដូរថ្នាំញៀនយ៉ាងសកម្ម ត្រូវបានកម្លាំងប៉ូលិសព្រហ្មទណ្ឌខណ្ឌឫស្សីកែវ សហការជាមួយនឹងកម្លាំងប៉ូលិសប៉ុស្តិ៍ស្វាយប៉ាក ធ្វើការស្រាវជ្រាវរហូតកំណត់មុខសញ្ញាជាក់ស្ដែងចុះទៅឃាត់ខ្លួន ខណៈពេលកំពុងចែកចាយថ្នាំញៀន ដោយដកហូតបានម្សៅក្រាមពណ៌.ស ថ្លាចំនួន១០កញ្ចប់ ក្នុងនោះមាន៧កញ្ចប់ធំ និង៣កញ្ចប់តូច។
ហេតុការណ៍បង្ក្រាប និងឃាត់ខ្លួននោះបានធ្វើឡើងកាលពីវេលាម៉ោង៥និង១៥នាទីល្ងាច ថ្ងៃទី២៣ ខែធ្នូ ឆ្នាំ២០១៥ ស្ថិតតាមផ្លូវលំ ត្រង់ចំណុចផ្ទះគ្មានលេខ ក្រុមទី៨ ភូមិលូ សង្កាត់ស្វាយប៉ាកខណ្ឌឫស្សីកែវ។
សមត្ថកិច្ចបាននិយាយថា ជនសង្ស័យមានឈ្មោះ ឡាំ ថាន់យ៉ាវ ភេទប្រុស អាយុ៣៦ឆ្នាំ មានមុខរបរមិនពិតប្រាកដ ទីលំនៅផ្ទះលេខ១២៣ ផ្លូវលំភូមិ/សង្កាត់កើតហេតុខាងលើ។
សមត្ថកិច្ចបានឲ្យដឹងថា មុនពេលឃាត់ខ្លួនជនសង្ស័យខាងលើ កម្លាំងប៉ូលិសព្រហ្មទណ្ឌខណ្ឌឫស្សីកែវ សហការជាមួយនឹងកម្លាំងប៉ុស្តិ៍ស្វាយប៉ាក ធ្វើការស្រាវជ្រាវ និងកំណត់មុខសញ្ញាជាក់ស្ដែងចុះទៅឃាត់ខ្លួន ខណៈពេលកំពុងចែកចាយ និងឆែកឆេរឃើញថ្នាំញៀនដាក់ក្នុងកញ្ចប់បារីចំនួន១០កញ្ចប់ ក៏ឃាត់ខ្លួនយកទៅសាកសួរនៅអធិការដ្ឋានខណ្ឌឫស្សីកែវ រង់ចាំកសាងសំណុំរឿងបញ្ជូនទៅតុលាការចាត់ការទៅតាមផ្លូវច្បាប់៕
ចាប់ខ្លួនបុរសម្នាក់ រួមនឹងវត្ថុតាងថ្នាំញៀន១០កញ្ចប់
0 Comments