សារឿន ច័ន្ទ អ្នកប្រដាល់ជើងចាស់ នៃក្លិបតាព្រហ្មមានជ័យ ត្រូវគេផ្គូឲ្យជួបប្រកួតសាក កណ្តាប់ដៃជាមួយអ្នកប្រដាល់ថៃឈ្មោះយ៉ត ចាក់ភេត( Yorth Chakphat) នៅលើសង្វៀនWurkz នារសៀលថ្ងៃអាទិត្យ ទី០៥ ខែឧសភា ឆ្នាំ២០១៩ នេះ។
សារឿន ច័ន្ទ និង យ៉ត ចាក់ភេត ជួបប្រកួតគ្នាក្នុងទម្ងន់៦០គីឡូក្រាម។ អ្នកប្រដាល់ថៃរូបនេះ ជាអ្នកប្រដាល់ចំណូលថ្មី មិនធ្លាប់មកប្រកួតនៅស្រុកខ្មែរនោះទេកន្លងមក។
យ៉ត ចាក់ភេត នេះ មានកម្ពស់ប្រហាក់ប្រហែលសារឿន ច័ន្ទដែរ តែប្រវត្តិប្រកួតរបស់គេ គឺតិចជាង សារឿន ច័ន្ទ ជិតពាក់កណ្ដាលឯណោះ។ យ៉ត ចាក់ភេត ប្រកួតបានចំនួន៦៣លើក ដោយឈ្នះ៥៥លើក ចាញ់០៨លើក មិនដែលស្មើ ខណៈដែលសារឿន ច័ន្ទ អ្នកប្រដាល់កម្ពុជាយើងប្រកួតបានចំនួន១០២លើក ឈ្នះ៨១លើក ចាញ់១៩លើក និង ស្មើ០២លើក។
សារឿន ច័ន្ទ ធ្លាប់ប្រកួតជាមួយថៃច្រើនលើកហើយ ដោយវាយឈ្នះច្រើនជាងចាញ់។ តែពីរប្រកួតចុងក្រោយនេះ គេមានការស្រុតធ្លាក់ចុះ ដោយវាយថៃពីរលើកជាប់ៗគ្នា។ ការប្រកួតជាមួយថៃលើកចុងក្រោយនេះ សារឿន ច័ន្ទ វាយចាញ់ឆ័យ យ៉ូ (Chhai Yo) ក្នុងទឹកទី២ កាលពីថ្ងៃទី១៧ ខែមីនា ឆ្នាំ២០១៩ ។
ស្ថានភាពប្រកួតរបស់សារឿន ច័ន្ទ នាពេលចុងក្រោយនេះ ឃើញថា មានការវិវត្តឡើងវិញគួរឲ្យកត់សម្គាល់។ នេះបើតាមការបញ្ជាក់របស់លោក ថៃ អ៊ូ ដែលជាអ្នកដឹកនាំកីឡាករថៃ មកប្រកួត និងជាអ្នកផ្គូផ្គងដែរនោះ។
ជាអ្នកប្រដាល់ដែលមានកណ្តាប់ដៃលឿន រហ័ស និង ខ្លាំងនោះ សារឿន ច័ន្ទ វាយសម្រុកមិនបណ្តាក់ដៃនោះទេ ប៉ុន្តែគេឆាប់អស់ស៊ុហ្វ នៅចុងទឹក។
ទោះជាយ៉ាងណា សម្រាប់ការប្រកួតលើកនេះ គេមិនមានទំនុកចិត្តថា សារឿន ច័ន្ទ អាចយកឈ្នះអ្នកប្រដាល់ថៃ យ៉ត ចាក់ភេត នេះបានទេ ព្រោះថាអ្នកប្រដាល់ថៃរូបនេះ ជាជើងខ្លាំងនិងជាម្ចាស់ខ្សែក្រវាត់ដល់ទៅ២ស្ថាប័នឯណោះ។ ចាំមើល តើ សារឿន ច័ន្ទ អាចយកឈ្នះ យ៉ត ចាក់ភេត បានឬអត់?។
ចំពោះ វ៉ាន់ វឿន អ្នកប្រដាល់កម្ពុជាក្លិបឃ្លាំងមឿងកីឡា នឹងជួបប្រកួតជាមួយអ្នកប្រដាល់ថៃ យ៉ត វ៉ាន់ឌី(Yorth Vandy)។ ជំនួបរបស់អ្នកប្រដាល់ទាំងពីរនាក់នេះ ជាជំនួបសងសឹករបស់យ៉ត វ៉ាន់ឌី ដែលបានវាយចាញ់វ៉ាន់ វឿន ក្នុងទឹកទី១ កាលពីថ្ងៃទី២៦ ខែមករា ឆ្នាំ២០១៩ ក្នុងការប្រកួតជម្រុះដណ្តើមខ្សែក្រវាត់ខារ៉ាបាវ ទម្ងន់៥៧គីឡូក្រាមកន្លងមកមកនេះ។
វ៉ាន់ វឿន ម្ចាស់ខ្សែក្រវាត់ខារ៉ាបាវ ទម្ងន់៥៧គីឡូក្រាមនេះ គេមានតែមនិងប្រៀបជាងយ៉ត វ៉ាន់ឌី ត្រង់គេខ្ពស់ជាងបន្តិច គឺ១,៦៧ម៉ែត្រ ខណៈដែលយ៉ត វ៉ាន់ឌី គេ១,៦៥ម៉ែត្រនោះ។ ចំពោះសមត្ថភាពវិញ គឺប្រហាក់ប្រហែលគ្នាទេ ឯបទពិសោធន៍ និងកំណត់ត្រា ក៏ប្រហែលគ្នាដែរ។
យ៉ត វ៉ាន់ឌី គេមានកំនត់ត្រាប្រកួតចំនួនតែ៧៥លើកប៉ុណ្ណោះ ក្នុងនោះឈ្នះ៥៨លើក និង ចាញ់១៧លើក មិនដែលស្មើ។ ចំណែក វ៉ាន់ វឿន គេមានកំណត់ត្រាប្រកួត៧៥លើក ឈ្នះ៦០លើក ចាញ់១៣លើក និងស្មើ០២លើក។
ទោះជាយ៉ាងណាក្តី សម្រាប់ការជួបគ្នាលើកទី២នេះ ពុំអាចសន្និដ្ឋានមុនថា អ្នកណាឈ្នះ អ្នកណាចាញ់នោះឡើយ ហើយពីរនាក់នេះ ក៏មិនអាចអ្នកណាមើលស្រាលអ្នកណាបានដែរ។
ចំពោះការប្រកួតរវាងអ្នកប្រដាល់រួមជាតិវិញ សេក គឹមរួន អ្នកប្រដាល់ក្លិបអង្គរមានជ័យខេត្តសៀមរាប ត្រូវជួបប្រកួតជាមួយ ឡុង បេនលឿន អ្នកប្រដាល់ក្លិបសាលវ័ន្តកីឡា ។ពួកគេទាំងពីរជួប គ្នាក្នុងប្រភេទទម្ងន់៦៣,៥០០គីឡូក្រាម។
ឡូញ វ៉ាន់ឌី អ្នកប្រដាល់ក្លិបវិបុលដារិទ្ធពោធិសែនជ័យ ត្រូវគេផ្គូឲ្យជួបប្រកួតជាមួយលន់ សៀកឡេង អ្នកប្រដាល់ក្លិបថ្នល់ទទឹងគុនខ្មែរខេត្តកំពង់ស្ពឺ។ អ្នកប្រដាល់ទាំងពីរនាក់នេះ ប្រកួតក្នុងទម្ងន់៥៧គីឡូក្រាម៕
Source: Kampuchea Thmey Daily
0 Comments