ឧត្ដរមានជ័យ ៖ មានការបែកធ្លាយមកថា លោកអនុសេនីយ៍ឯក ជ័យ វាស្នា មេប៉ុស្តិ៍នគរបាលរដ្ឋបាលអូស្មាច់ បានចាប់បុរសចំណាស់ អាយុ៦១ឆ្នាំម្នាក់ មកធ្វើទារុណកម្ម វាយដំតាមតែអំពើចិត្តនិងបានបាញ់គំរាម ២គ្រាប់ កាលពីវេលាម៉ោង ៣រសៀល ថ្ងៃទី២៧ ខែមេសា ឆ្នាំ២០១៩ កន្លងទៅថ្មីៗនេះ ស្ថិតនៅភូមិអភិវឌ្ឍន៍ សង្កាត់អូរស្មាច់ ក្រុងសំរោង ខេត្តឧត្ដរមានជ័យ។
ឈ្មោះ ព្រុំ រស់ ភេទប្រុស អាយុ៦១ឆ្នាំ រស់នៅភូមិអភិវឌ្ឍន៍ សង្កាត់អូស្មាច់ ក្រុងសំរោង បានប្រាប់ភ្នាក់ងារកម្ពុជាថ្មីបានឲ្យដឹងថា នៅថ្ងៃទី០២ ខែឧសភា ឆ្នាំ២០១៩ លោក ជ័យ វាស្នា មេប៉ុស្តិ៍រដ្ឋបាលនគរបាលអូរស្មាច់ និង មន្ត្រីក្រោមឱវាទ បានចាប់ធ្វើទារុណកម្ម និងបាញ់គំរាមរូបលោក។
លោកតា ព្រុំ រស់ បានឲ្យដឹងបន្តថា លោកអនុសេនីយ៍ឯក ជ័យ វាស្នា បានទៅដល់ផ្ទះរបស់គាត់បាញ់គំរាម១គ្រាប់ ពេលគាត់រត់គេចខ្លួន បានបាញ់គំរាមពីរគ្រប់ថែមទៀត។ ពេលចាប់រូបគាត់បានលោក ជ័យ វាស្នា និង មន្ត្រីក្រោមឱវាទ និង ប្រជាការពារភូមិ សរុបចំនួន៤នាក់ បានយកដែកជ្រុង វាយដំ និងទះកំផ្លៀងគាត់តាមអំពើចិត្ត រហូតគ្រាំគ្រាឈឺចុកចាប់ពេញខ្លួន។
ពាក់ព័ន្ធករណីនេះ លោកឧត្ដមសេនីយ៍ទោ ម៉ែន លី ស្នងការនគរបាលខេត្តបានប្រាប់ភ្នាក់ងារកម្ពុជាថ្មី នាថ្ងៃទី០២ ខែឧសភា ឆ្នាំ២០១៩នេះថា ករណីខាងលើនេះអត់ការពិតទេ។
លោកបានអះអាងឲ្យដឹងថា ឈ្មោះ ព្រុំ រស់ បានដេញកាប់គេ កាប់ឯងពេញភូមិ។ លោកស្នងការនគរបាលខេត្តបន្តថា ជាធម្មតាមន្ត្រីជំនាញបាញ់ឡើងលើប៉ុណ្ណោះ ដើម្បីឲ្យ ឈ្មោះ ព្រុំ រស់ នេះចោលកាំបិត និង ពូថៅរបស់គាត់ដែលកាន់នឹងដៃ។
លោកឧត្ដមសេនីយ៍ទោ ម៉ែន លី ស្នងការនគរបាលខេត្ត បានបញ្ជាក់ថា មនុស្សគាត់អញ្ចឹង ខ្លួនប្រាណគាត់ដែលល្អ យើងទៅវាយអីគាត់ មានច្បាប់ទម្លាប់គេមាន គាត់នៅតែបង្ខូចទៀត។
លោកថា បញ្ហាខាងលើនេះ ធ្វើត្រូវតែដាក់(ខ្នោះជើង) និង ឃាត់ទុកឲ្យគាត់ស្វាងស្រវឹងសិន ទើបដោះចេញ និងអប់រំ ទាល់តែក្រុមគ្រួសារគាត់មកធានាទើបសមត្ថកិច្ចដោះលែងទៅវិញ៕
Source: Kampuchea Thmey Daily
0 Comments