សរ សី អ្នកប្រដាល់ក្លិបក្រសួងការពារជាតិ នឹងជួបប្រកួតជម្រះបញ្ជីជាមួយម៉ូ រដ្ឋា អ្នកប្រដាល់ក្លិបព្រៃទទឹងខេត្តបាត់ដំបង នាព្រឹកថ្ងៃអាទិត្យទី ១៣ ខែកញ្ញា ឆ្នាំ២០១៥នេះ លើសង្វៀនGanzberg នៅSEA-TV។ នេះជាការជួបគ្នាលើកទី២របស់អ្នកប្រដាល់ទាំងពីរនេះ។ សរ សីនិងម៉ូ រដ្ឋា មានកម្ពស់ប្រហាក់ប្រហែលគ្នា ឯស្នៀតប្រដាល់វិញនោះ ក៏មិនជាលើគ្នាប៉ុន្មានដែរ។ ប៉ុន្តែម៉ូ រដ្ឋា ឡើងប្រកួតមិនសូវដែលឈ្នះគេទេដូចជាការប្រកួតលើកចុងក្រោយនេះ គេវាយចាញ់តូច ទូ អ្នកប្រដាល់សមាគមកីឡាក្រសួងការពារជាតិដោយពិន្ទុ។
ម៉ូ រដ្ឋា មិនជាខ្លាំងនោះទេ តែក៏មិនជាខ្សោយប៉ុន្មានដែរ។ អ្នកប្រដាល់រូបនេះ មានតែមឈ្នះសរ សីនៅត្រង់តែមានចិត្តប្រដាល់ធំប៉ុណ្ណោះ។ ទោះជាយ៉ាងនេះក្តី រដ្ឋាមិនប្រាកដថា ឈ្នះ សរ សី នោះទេ សម្រាប់ការឡើងប្រកួតលើកនេះ ព្រោះថាគេពុំមានកលល្បិចក្នុងការប្រកួត។ ចាំមើល ការជួបគ្នារវាងសរ សី និង ម៉ូ រដ្ឋា លើកនេះ តើនរណាជាអ្នកមានសំណាងបានឈ្នះការប្រកួតនេះ ? ។ សរ សី ប្រកួតចុងក្រោយនេះ គេវាយឈ្នះមីស្លីនអាលី ក្លិបអាស៊ីកីឡា។
ឡុង ប៊ុនយីម អ្នកប្រដាល់ក្លិបសាលវ័ន្តកីឡា ក៏នឹងជួបប្រកួតជម្រះជាមួយយិន បូរិន អ្នកប្រដាល់ក្លិបអាស៊ីកីឡាដែរ។ ពីរនាក់នេះ ជួបគ្នាក្នុងប្រភេទទម្ងន់៥៧គីឡូក្រាម។ ប៊ុនយីម ធ្លាប់វាយចាញ់បូរិន ដោយពិន្ទុម្តងហើយ កាលពីក្នុងឆ្នាំ២០១៣កន្លងមក ហើយមកដល់ពេលជួបគ្នានាថ្ងៃទី២៦កក្កដា២០១៥ ពួកគេទាំងពីរវាយស្មើពិន្ទុគ្នា។
ប៊ុនយីម គេមានស្នៀតប្រដាល់មិនសូវច្បាស់ ដោយវាយច្រើនអាងកម្លាំងបាយ តែដល់ចុះខ្សោយកម្លាំងនៅចុងទឹក ក៏ត្រូវចាញ់ដៃគូប្រកួតតែម្តង។ ប្រកួតចុងក្រោយនេះ គេវាយឈ្នះសេង កំសត់ អ្នកប្រដាល់ក្លិបគីសែមានរិទ្ធដោយពិន្ទុ។
ចំណែក យិន បូរិន គេមានស្នៀតប្រដាល់មិនជាលើប៊ុនយីមនោះទេ គ្រាន់តែគេមានចិត្តប្រដាល់ធំ និងស៊ូចំពោះការប្រកួតតែប៉ុណ្ណោះ។ អ្នកប្រដាល់រូបនេះ ទាបពេក ។ប្រកួតចុងក្រោយនេះ បូរិនវាយចាញ់បឺត សង្ឃឹម អ្នកប្រដាល់ក្លិបរ៉ាហាប់ស្វាយប៉ាកដោយពិន្ទុ។ យ៉ាងណាសម្រាប់ការជួបគ្នាលើកទី៣នេះ ទោះជាអ្នកណាឈ្នះ ក៏ឈ្នះដោយតឹងតែងនិងលំបាកដែរ។ ជួប ជាង អ្នកប្រដាល់ក្លិបនិរោធមានជ័យ នឹងជួបប្រកួតជាមួយប្រាក់ ស៊ីណាត អ្នកប្រដាល់ក្លិបតាឯកដំបងដែកមានរិទ្ធប្រកួតក្នុងប្រភេទទម្ងន់៥៤គីឡូក្រាម ។ពីរនាក់នេះ មិនដែលជួបគ្នាដែរពីមុនមក។
ប្រាក់ ស៊ីណាត បាត់មុខមួយរយះហើយ។ គេវាយខ្លាំង តែមិនសូវឆ្លាតទេ ហើយមួយទៀតគេមានចិត្តប្រដាល់មិនសូវធំថែមទៀត។ ការប្រកួតចុងក្រោយនេះ គេវាយឈ្នះព្រឿង សុជាតិ អ្នកប្រដាល់សមាគមកីឡាក្រសួងការពារជាតិដោយពិន្ទុ។ ជួប ជាង ជាអ្នកប្រដាល់វ័យក្មេងម្នាក់ ដែលប្រកួតមានលក្ខណៈច្បាស់លាស់អត់ធ្មត់ ហើយមានស្នៀតប្រដាល់ល្អ និងរឹងមាំណាស់ ។ ជួប ជាងប្រកួតមិនសូវដែលចាញ់គេទេ ទើបតែឡើងប្រកួតលើកចុងក្រោយនេះ គេប៉ះជើងខ្លាំងម៉ន រដ្ឋា ក្លិបការិយាល័យទី៥ កងទ័ពជើងគោក គេចាញ់ដោយពិន្ទុ។ ទោះជាយ៉ាងណា សម្រាប់ការជួបគ្នារវាងប្រាក់ ស៊ីណាត និង ជួប ជាងនេះក្រុមអ្នកវិភាគប្រដាល់ ពួកគេពុំហ៊ានទាយថា អ្នកណាជាអ្នកឈ្នះនោះឡើយ? ។ តែយ៉ាងណា អ្នកប្រដាល់ជួប ជាង គេមានបទពិសោធន៍ច្រើនណាស់ក្នុងការប្រកួត ។ អ៊ុល រាត្រី អ្នកប្រដាល់ក្លិបពន្លឺវិបុលរិទ្ធី នឹងត្រូវជួបប្រកួតជាមួយអ្នកប្រដាល់រៀវ ចំណាប់ ក្លិបមជ្ឈមណ្ឌលកីឡាខ.ភ.ម ដោយប្រកួតក្នុងទម្ងន់៥១គីឡូក្រាម ។ នេះជាការជួបប្រកួតលើកដំបូងរបស់ពួកគេទាំងពីរ។ ចំណែក លីន ចំរើន ក្លិបបូរីរាជសីហ៍មានរិទ្ធ នឹងជួបប្រកួតជាមួយផាន រះ ក្លិបតាព្រហ្មមានជ័យ ។ ពួកគេប្រកួតគ្នាក្នុងទម្ងន់៥៧គីឡូក្រាម។ អ្នកណាឈ្នះ អ្នកចាញ់នោះ មិនអាចទាយមុនបានទេ៕
សរ សីជម្រះបញ្ជីជាមួយម៉ូ រដ្ឋា ខណៈប៊ុន យីមជម្រះបញ្ជីជាមួយបូរិននៅSEA-TV
0 Comments