បាត់ដំបង ៖ នៅវេលាម៉ោង១១និង២៥នាទី យប់ថ្ងៃទី១០ ខែកញ្ញា ឆ្នាំ២០១៥ នៅចំណុចជាប់មន្ទីរពេទ្យធ្មេញនោរ៉ា ស្ថិតក្នុងភូមិ២០ឧសភា សង្កាត់ស្វាយប៉ោ ក្រុងបាត់ដំបង ទល់មុខស្ថានីយរថភ្លើងមានអគ្គីភ័យមួយបានឆាបឆេះនៅលើបង្គោលភ្លើងដែលបង្កឲ្យមានការដាច់ធ្លាក់ ខ្សែភ្លើងទាំងនោះមកលើផ្លូវទាំងអស់ នៅក្នុងខណៈនោះដែរ កម្លាំងអឺដេសេ របស់អគ្គិសនីខេត្តបានចុះយ៉ាងបន្ទាន់ដើម្បីផ្តាច់ចរន្ត។
ដោយឡែកកម្លាំងអគ្គីភ័យនៃស្នងការនគរបាលខេត្ត ក៏បានចេញប្រតិបត្តិការយ៉ាងបន្ទាន់ផងដែរ ដែលមានការបារម្ភចំពោះខ្សែចរន្តដែលមានការរាយប៉ាយជុំវិញផ្លូវហើយរហូតមកដល់ពេលនេះរយៈពេលប្រមាណជាង១០នាទីស្ថានភាពនេះត្រូវបានកម្លាំងអគ្គិសនីគ្រប់គ្រងបានទាំងស្រុងហើយ។
លោកគឹម ប៊ុន ធឿន នាយការិយាល័យបង្ការពន្លត់អគ្គីភ័យបានអះអាងថា ការឆ្លងចរន្តដែលបណ្ដាលឲ្យមានអណ្តាតភ្លើងឆេះឡើងនេះគឺពុំមានរាលដាលដល់ផ្ទះប្រជាពលរដ្ឋនោះទេ។ ខណៈពេលដែលលោកទទូលបានសេចក្តីរាយការណ៍គឺប្រភពបានបញ្ជាក់ថា មានការឆេះរាលដាល២០%ទៅលើលំនៅដ្ឋានតែធាតុពិតគឺឆេះនៅលើបង្គោលភ្លើងសុទ្ធសាធ ប៉ុន្តែមិនបានបង្កឲ្យគ្រោះថ្នាក់ដល់នរណាម្នាក់ដោយសារតែខ្សែដែលធ្លាក់មកនេះ ត្រូវបានក្បាលអគ្គិសនីគ្រប់គ្រង បានហើយ៕
នៅខណៈពេលនេះ ផ្លូវដែលមានបង្គោលភ្លើងធ្លាក់រាយប៉ាយនោះ សមត្ថកិច្ចចរាចរបានដាក់កម្លាំងផ្អាកមិនឲ្យធ្វើចរាចរបណ្ដោះអាសន្ន ដើម្បីឲ្យខាងអគ្គិសនីតភ្ជាប់ខ្សែចរន្តដែលធ្លាក់រាយប៉ាយពេញផ្លូវ៕
អគ្គីភ័យឆាបឆេះខ្សែភ្លើងលើបង្គោលភ្លើងបង្កឲ្យធ្លាក់ខ្សែភ្លើងរាយប៉ាយពេញផ្លូវ
0 Comments