កីឡាករ Tiger Woods ដែលបានធ្វើឲ្យមានការភ្ញាក់ផ្អើលចំពោះការវិលត្រឡប់ពីរបួសជាមួយនឹងការឈ្នះជើងឯក Masters កាលពីខែមុននោះ គ្រោងនឹងទទួលបានមេដាយសេរីភាពប្រធានាធិបតី ពីប្រធានាធិបតីសហរដ្ឋអាមេរិក លោកដូណាល់ ត្រាំ។
លោកស្រី Sarah Sanders គឺជាអ្នកនាំពាក្យសេតវិមាន បាននិយាយថា លោកត្រាំ នឹងប្រគល់រង្វាន់មេដាយមួយនេះ ដែលជាមេដាយកិត្តិយសស៊ីវិលខ្ពស់បំផុតរបស់ជាតិ ល់កីឡាករវាយកូនហ្គោលដ៏អស្ចារ្យ Tiger Woodsនៅឯសួនច្បារផ្កាកុលាបក្នុងសេតវិមាន។
លោក Woodsវ័យ៤៣ឆ្នាំ បានឈ្នះជើងឯក Mastersកាលពីខែមេសា សម្រាប់ជើងឯកធំលើកទី១៥របស់គាត់ និងជាជើងឯកលើកដំបូងចាប់តាំងពីឈ្នះជើងឯក US Openឆ្នាំ២០០៨។
លោកត្រាំ ដែលស្រលាញ់ចូលចិត្តកីឡាវាយកូនហ្គោល និងជាម្ចាស់ទីលានវាយកូនហ្គោលជាច្រើនកន្លែងនៅជុំវិញពិភពលោកនោះ បានផ្ញើសារអបអរសាទរបស់គាត់តាម Twitter បន្ទាប់ពីជ័យជំនះរបស់ Woodsនៅ Augusta ។
គួររំឭកថា អតីតប្រធានាធិបតីសហរដ្ឋអាមេរិកលោក Barack Obama បានផ្តល់រង្វាន់មួយនេះ ដល់លោក Charlie Sifford កាលពីឆ្នាំ២០១៤ ដែលជាកីឡាករវាយកូនហ្គោលកូនកាត់អាមេរិក-អាហ្វ្រិកលើកដំបូងគេ បានលេងនៅ PGA Tour ៕
Source: Kampuchea Thmey Daily
0 Comments