ភ្នំពេញ ៖ អាជ្ញាធរខណ្ឌជ្រោយចង្វាបានកោះហៅម្ចាស់ភោជនីយដ្ឋាននានាដែលមានទីតាំងនៅតាមដងទន្លេមេគង្គនៅក្នុងភូមិសាស្ត្រខណ្ឌជ្រោយចង្វា មកប្រជុំផ្សព្វផ្សាយ នូវសេចក្តីជូនដំណឹង ស្តីអំពីការសង់សំណង់រំលោភដីចំណីទន្លេនិងសង់ខ្ចុសបណ្តែតទឹកអានាធិបតេយ្យ ដែលជាហេតុធ្វើឲ្យមានការបាត់បង់សណ្តាប់ធ្នាប់សោភណ្ឌ និងបរិស្ថាន ពិសេសមានគ្រោះថ្នាក់ផ្សេងៗដែលកើតឡើងជាយថាហេតុ។
កិច្ចប្រជុំនេះប្រព្រឹត្តទៅនៅសាលាខណ្ឌជ្រោយចង្វាព្រឹកថ្ងៃទី១២ ខែសីហា ឆ្នាំ២០១៥ ដែលអញ្ជើញចូលរួមនាឱកាសនោះ ក្រោមវត្តមានលោកហ៊ុយសារុនអភិបាលរងខណ្ឌជ្រោយចង្វា លោកធិងិអភិបាលរងខណ្ឌជ្រោយចង្វារ តំណាងលោកឃ្លាំងហួត អភិបាលខណ្ឌជ្រោយចង្វា និងមន្ត្រីពាក់ព័ន្ធជាច្រើនទៀត រួមនឹងប្រជាពលរដ្ឋជាម្ចាស់ភោជនីយដ្ឋានជាង៤០នាក់។
កិច្ចប្រជុំនាឱកាសនោះ គឺផ្តោតសំខាន់ចំពោះអាជីវករដែលជាម្ចាស់អាជីវកម្មអាហារដ្ឋាននិងភោជនីយដ្ឋានទាំងអស់ ដែលមានទីតាំងនៅតាមដងទន្លេមេគង្គនៅក្នុងភូមិសាស្ត្រខណ្ឌជ្រោយចង្វា។ ព្រោះដោយសារបច្ចុប្បន្ន នេះមានម្ចាស់អាហារដ្ឋានមួយចំនួនបានសាងសង់រោងជាច្រើននៅលើដីច្រាំងទន្លេនិងនៅលើខ្ចុសបណ្តែតទឹកដើម្បីប្រកបអាជីវកម្មរបស់ខ្លួនយ៉ាងអានាធិបតេយ្យ ដែលរំលោភលើដីចំណីទន្លេនិងនៅក្នុងទឹកដែលជាទ្រព្យសម្បត្តិសាធារណៈរបស់រដ្ឋ ធ្វើឲ្យបាត់បង់សណ្តាប់ធ្នាប់របៀបរៀបរយ និងសោភណ្ឌភាពតាមដងទន្លេ ពិសេសធ្វើប៉ះពាល់យ៉ាងធ្ងន់ធ្ងរ ដល់បរិស្ថានដងទន្លេ និងអាចបង្កគ្រោះថ្នាក់ជាយថាហេតុដល់ សាធារណជនទូទៅ ដែលបានមកកំសាន្តលំហែនៅទីនោះ ដោយសារតែសំណង់មិនរៀបរយតាមលក្ខណៈស្តង់ដារបច្ចេកទេសត្រឹមត្រូវ។
ខ្លឹមសារនៃសេចក្តីជូនដំណឹង បានសង្កត់ធ្ងន់ថា ដើម្បីចូលរួមកែលំអ និងដើម្បីរក្សាបាននូវសោភណ្ឌភាព សណ្តាប់ធ្នាប់របៀបរៀបរយ និងការពារនូវបរិស្ថានការពារសម្បត្តិសាធារណៈរបស់រដ្ឋ ស្របតាមការណែនាំរបស់សាលារាធានីភ្នំពេញ និងក្រសួងដែនដីនគរូបនីយកម្ម និងសំណង់ អាជ្ញាធរខណ្ឌជ្រោយចង្វាបានតម្រូវឲ្យបងប្អូនប្រជាពលរដ្ឋដែលជាម្ចាស់អាជីវកម្មទាំងអស់ រុះរើសំណង់រោងនិងខ្ចុសអានាធិបតេយ្យទាំងអស់ ឲ្យអស់ពីច្រាំងនិងតាមដងទន្លេរបស់ខ្លួនចេញឲ្យអស់ដោយទុករយៈពេល១០ថ្ងៃ គិតចាប់ពីថ្ងៃទី១២នេះតទៅ។
សេចក្តីជូនដំណឹង បានបញ្ជាក់បន្ថែមថា ករណីដែលអស់លោក លោកស្រី មិនអនុវត្តតាមខ្លឹមសារជូនដំណឹងខាងលើនេះទេ សាលាខណ្ឌនឹងចុះអនុវត្តនូវវិធានការរដ្ឋបាល តាមផ្លូវច្បាប់ ដោយមិនទទួលខុសត្រូវ រាល់ការខូចខាត ឬបាត់ទ្រព្យសម្បត្តិអ្វីឡើយ។
លោក ហ៊ុយសារ៉ុន អភិបាលរងខណ្ឌ មានប្រសាសន៍ថា ម្ចាស់ហាងទាំងអស់ត្រូវរុះរើខ្ចុសបណ្តែតទឹកទាំងអស់មុនគេដោយខ្លួនឯងដោយទុករយៈពេល១០ថ្ងៃ ចាប់គិតពីថ្ងៃនេះតទៅ តែបើមិនមានការរុះរើទេ អាជ្ញាធរខណ្ឌនឹងចុះរុះរើដោយមិនទទួលការខូចខាតទ្រព្យសម្បត្តិរបស់បងប្អូនឡើយ។
គួរបញ្ជាក់ថា អាជីវកម្មលើអាហារដ្ឋានដែលរំលោភច្រាំងទន្លេនិងខ្ចុសលើទឹកទាំងអស់មានចំនួន៥១ទីតាំង ក្នុងខ្ចុសបណ្តែតលើផ្ទៃទឹកមានចំនួន១០ ទីតាំងដែលអាជ្ញាធរតម្រូវឲ្យរុះចេញមុនគេ។
លោក ឃ្លាំងហួត អភិបាលនៃគណៈអភិបាល ខណ្ឌជ្រោយចង្វាបានមានប្រសាសន៍ក្រោយពីប្រជុំចប់ថា សំណង់ខ្ចុស ទាំងអស់ដែលប៉ះពាល់ដល់ដីចណីទន្លេនោះត្រូវរុះរើចេញតាមការជូនដំណឹងរបស់សាលាខណ្ឌ បើមិនដូច្នេះទេអាជ្ញាធរនឹងចុះអនុវត្តតាមច្បាប់រដ្ឋបាលដោយមិនទទួលខុសត្រូវនូវការខូចខាតឬបាត់បង់ទ្រព្យសម្បត្តិអ្វីឡើយ ព្រោះករណីនេះវាខុសនឹងច្បាប់ទាំងស្រុង ហើយមិនអាចបណ្តែតបណ្តោយដូចបច្ចុប្បន្នបានទេ ដោយសារតែសំណង់អានាធិបតេយ្យមិនរៀបរយ អាចមានបញ្ហាប្រឈម៣ ទី១បញ្ហាបរិស្ថាន ទី២ ការសង់រំលោភលើដីចំណីទន្លេ និងទី៣ គឺបញ្ហាសុវត្ថិភាព របស់ភ្ញៀវ។
លោក បានបញ្ជាក់ថា ប្រសិនបើថ្ងៃណាមួយមានឧប្បត្តិហេតុកើតឡើងដូចជាបាក់ច្រាំងទន្លេចូលក្នុងទឹកបណ្តាលឲ្យរបួសមនុស្ស ម្ចាស់ហាងត្រូវទទួលទោសព្រហ្មទណ្ឌនិងទទួលខុសត្រូវចំពោះមុខច្បាប់។ ដូច្នេះជៀសវាងមានគ្រោះថ្នាក់ជាយថាហេតុ ក៏ដូចជារក្សាបាននូវសណ្តាប់ធ្នាប់របៀបរៀបរយ ម្ចាស់ត្រូវតែអនុវត្តនូវខ្លឹមសារសេចក្តីជូនដំណឹងនិងស្មារតីប្រជុំថ្ងៃនេះកុំបីខាន៕
ខណ្ឌជ្រោយចង្វាហៅម្ចាស់អាហារដ្ឋានប្រជុំផ្សព្វផ្សាយការសង់សំណង់រំលោភលើដីចំណីទន្លេ
0 Comments