ក្លិបកាំភ្លើងធំ Arsenalបានបរិច្ចាគថវិកា១ផោនបានមកពីការលក់រាល់សំបុត្រសម្រាប់ការជួបគ្នានៅការប្រកួត Premier League របស់ពួកគេជាមួយក្រុម Stoke City នៅក្នុងទឹកដី Emirates ដើម្បីជួយសង្គ្រោះជនភៀសខ្លួនស៊ីរី។
គួរឲ្យដឹងថា ក្លិបជាច្រើនដែលក្នុងនោះរួមមានទាំងក្លិប Real Madrid, Paris Saint-Germain និងក្លិប Bayern Munich បានសន្យារួចហើយថានឹងបរិច្ចាគវិភាគទាន ដើម្បីជួយអ្នកដែលរត់ភៀសខ្លួនពីជម្លោះនៅក្នុងប្រទេសស៊ីរី ហើយអ្នកដែលបានមកដល់ប្រទេសរបស់ពួកគេនីមួយៗ។
ខណៈនោះដែរ អ្នកចាត់ការរបស់ក្លិបកាំភ្លើងធំ Arsenalគឺលោក Arsene Wenger បានធ្វើការអំពាវនាវផងដែរដល់ក្លិបទាំងអស់នៅអឺរ៉ុបមេត្តាជួយចែករំលែកថវិការបស់ខ្លួនទោះតិចឬច្រើន ដើម្បីជួយដល់អ្នកដែលត្រូវការសង្គ្រោះបច្ចុប្បន្ន។
លោកបាននិយាយប្រាប់វេបសាយរបស់ក្លិបថា តម្រូវការគឺបន្ទាន់ខ្លាំងណាស់ ដូច្នេះហើយយើងត្រូវធ្វើការសម្រេចចិត្តជួយភ្លាម មិននៅរារែកចិត្តតទៅទៀតនោះទេ។
លោកបានបញ្ជាក់ទៀតថា អ្នករាល់គ្នាបានដឹងស្រាប់ហើយថា យើងតែងតែចូលរួមការងារមនុស្សធម៌ ហើយថែមទាំងមានមូលនិធិផ្ទាល់ខ្លួនទៀតផង ដូច្នេះហើយវាដល់ពេលដែលត្រូវបញ្ចេញស្នាដៃខ្លះហើយ ពិសេសគឺក្នុងគ្រាក្រដែលជនភៀសខ្លួនរាប់សែននាក់ កំពុងត្រូវការអ្នកជួយ។
គ្រូបង្វឹកសញ្ជាតិបារាំងម្នាក់នេះ បានបន្តទៀតថា វាគឺជាកាលៈទេសៈដ៏បន្ទាន់មួយ ហើយលោកពិតជាសប្បាយចិត្តខ្លាំងណាស់នៅពេលដែលក្លិបរបស់លោក បរិច្ចាគថវិកាខ្លះទៅឲ្យជនភៀសខ្លួន ដើម្បីជួយដោះស្រាយបញ្ហាមួយចំនួនដែលកំពុងតែកើតឡើងនៅតាមបណ្តាប្រទេសអឺរ៉ុបមួយចំនួន បើទោះជាថវិកាស្តួចស្តើងបន្តិចមែនយ៉ាងណាក្តី៕
ក្លិប Arsenalបរិច្ចាគថវិកា១ផោនសម្រាប់ជនភៀសខ្លួននៅស៊ីរី
0 Comments