ភ្នំពេញ ៖ ជនជាតិចិនម្នាក់ បន្ទាប់ពីបើករថយន្តស៊េរីទំនើបបុកម៉ូតូ១គ្រឿងធ្វើឲ្យ៣នាក់ឪពុក ម្តាយនិងកូនរងរបួសហើយបានលុតជង្គង់សំពះសុំអង្វរសុំកុំឲ្យអ្នកដែលឈប់មើលហេតុការណ៍ធ្វើបាបខ្លួន។
ប្រភពព័ត៌មានបានឲ្យដឹងថា គ្រោះថ្នាក់ចរាចរណ៍ដែលបង្កឡើងដោយជនជាតិចិន បានបើករថយន្តស៊េរីទំនើប ម៉ាក Alphard ទៅបុកជាមួយម៉ូតូមួយគ្រឿង កំពុងជិះឌុបគ្នា ៣នាក់ ឪពុក ម្ដាយ និងកូន បណ្ដាលឲ្យ ក្បាលឲ្យកូនរងរបួសធ្ងន់នោះនៅមុខទីស្ដីការគណៈរដ្ឋមន្ត្រី ហើយរថយន្តបង្កបានបើកបន្ថែមល្បឿនរត់គេចខ្លួន ទៅដល់ចំស្តុបវត្តនាគវ័ន ត្រូវបានប្រជាពលរដ្ឋ និងសមត្ថកិច្ចសហការគ្នាឃាត់បានតែម្តង។
ហេតុការណ៍គ្រោះថ្នាក់ចរាចរណ៍នេះ បានកើតឡើងនៅវេលាម៉ោងប្រមាណ២១និង៤០នាទីយប់ ថ្ងៃទី១៨ ខែកញ្ញា ឆ្នាំ២០១៨ នៅត្រង់ចំណុចខាងមុខទីស្តីការគណៈរដ្ឋមន្ត្រី ផ្លូវសហព័ន្ធ រុស្សី សង្កាត់ស្រះចក ខណ្ឌដូនពេញ។
ប្រភពព័ត៌មានពីកន្លែងកើតហេតុបានឲ្យដឹងទៀតថា នៅមុនពេលកើតហេតុគេឃើញរថយន្តស៊េរីទំនើបមួយគ្រឿង ម៉ាក Alphard ពណ៌ខ្មៅ ពាក់ស្លាកលេខ ភ្នំពេញ 2AD-8668 បើកបរដោយជនជាតិចិន ធ្វើដំណើរពីកើតទៅលិចលុះមកដល់ចំណុចកើតហេតុ ស្រាប់តែទៅបុកជាមួយម៉ូតូមួយគ្រឿងម៉ាក Honda Dream ពណ៌ខ្មៅ ពាក់ស្លាកលេខ ភ្នំពេញ 1DC-0883 ជិះឌុបគ្នា ៣នាក់ឪពុក ម្ដាយ និងកូន បណ្ដាលឲ្យកូនរងរបួសបែកក្បាល របួសធ្ងន់ ត្រូវបានបញ្ជូនតាមកង់បីទៅសង្គ្រោះបន្ទាន់នៅឯមន្ទីរពេទ្យ។ ភ្លាមៗនោះ រថយន្តបង្កមិនបានឈប់ទទួលខុសត្រូវនោះទេគឺបានបន្ថែមល្បឿនបើករត់គេចខ្លួន ទៅដល់ត្រង់ចំណុចស្តុបផ្លូវបត់ទៅវត្តនាគវ័ន្ត ហើយត្រូវបានប្រជាពលរដ្ឋដេញស្ទាក់ឃាត់បាន។ ហើយភ្លាមៗនោះបុរសជាឪពុកដែលជាជនរងគ្រោះ ក៏បានមកដល់ដែរ ទើបជនជាតិចិនដែលជាអ្នកបើករថយន្តបង្ក ចុះមកសុំទោស ព្រមទាំងលុត ជង្គង់ លើកដៃសំពះក្រាបក្បាលដល់ដី ជិតកន្លះម៉ោង បង្កការភ្ញាក់ផ្អើលយ៉ាងខ្លាំង។
ក្រោយពេលកើតហេតុសមត្ថកិច្ចមូលដ្ឋានបានចុះដល់កន្លែងកើតហេតុ រួចឲ្យភាគីទាំងសងខាងសម្របសម្រួលគ្នាមួយសន្ទុះដែរ តែការសម្របសម្រួលនោះមិនត្រូវគ្នាទើបរាយការណ៍បន្តទៅសមត្ថកិច្ចជំនាញផ្នែកចរាចរណ៍ឲ្យចុះមកយករថយន្តបង្កនោះទៅរក្សាទុកដើម្បីរង់ចាំដោះស្រាយពេលក្រោយបន្តទៀត៕
Source: Kampuchea Thmey Daily
0 Comments