សម្ដេចតេជោ ៖ ដើម្បីឲ្យប្រព័ន្ធផ្សព្វផ្សាយប្រកបដោយសក្តានុពលក្នុងការគាំទ្រសន្តិភាព និងប្រជាធិបតេយ្យ គឺទាមទារឲ្យអ្នកសារព័ត៌មានទាំងអស់ ប្រឹងប្រែងអភិវឌ្ឍន៍សមត្ថភាពយល់ដឹងរបស់ខ្លួន និងមានភាពស្មោះត្រង់ក្នុងវិជ្ជាជីវៈ ក្លាហានហ៊ាននិយាយការពិត

ភ្នំពេញ ៖ ថ្ងៃទី០៣ ឧសភានេះគឺជាទិវាសេរីភាពសារព័ត៌មានពិភពលោកលើកទី២៦។ នៅកម្ពុជាទិវាសេរីភាពសារព័ត៌មាននៅឆ្នាំ២០១៩នេះ ប្រារព្ធធ្វើក្រោមប្រធានបទ«តួនាទីប្រកបដោយសក្កានុពលរបស់សារព័ត៌មានក្នុងការគាំទ្រសន្តិភាពនិង ប្រជាធិបតេយ្យ»។ សម្តេចតេជោនាយករដ្ឋមន្ត្រីហ៊ុន សែន នៅថ្ងៃទី៣ឧសភានេះក៏បានលើកទឹកចិត្តឱ្យអ្នកសារព័ត៌មានទាំងអស់ហ៊ាននិយាយការពិតពីបញ្ហាផ្សេងៗនៅក្នុងសង្គម។

សារលិខិតរបស់សម្ដេចតេជោនាយករដ្ឋមន្ដ្រីត្រូវបានអាននៅក្នុងពិធីប្រារព្ធទិវាសេរីភាពសារព័ត៌មានពិភពលោកឆ្នាំ២០១៩ នៅសណ្ឋាគារឡឺរ៉ូយ៉ាល ក្រោមអធិបតីភាពលោកខៀវ កាញារីទ្ធ រដ្ឋមន្ដ្រីក្រសួងព័ត៌មាន កាលពីព្រឹកថ្ងៃទី០៣ ខែឧសភានេះ។

នៅក្នុងសារលិខិតអបអរសាទរទិវាសេរីភាពសារព័ត៌មានសកលលោកលើកទី២៦ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជាបានមានប្រសាសន៍ថា៖«ដើម្បីឲ្យប្រព័ន្ធផ្សព្វផ្សាយប្រកបដោយសក្តានុពលក្នុងការគាំទ្រសន្តិភាព និងប្រជាធិបតេយ្យ គឺទាមទារឲ្យអ្នកសារព័ត៌មានទាំងអស់ ខិតខំប្រឹងប្រែងបន្តទៀតនូវការអភិវឌ្ឍសមត្ថភាពយល់ដឹងរបស់ខ្លួន និងមានភាពស្មោះត្រង់ក្នុងវិជ្ជាជីវៈ ក្លាហានហ៊ាននិយាយការពិត ធ្វើការរិះគន់ក្នុងន័យស្ថាបនា និងហ៊ានទទួលយកការពិតដើម្បីឲ្យព័ត៌មានរបស់ខ្លួនក្លាយជាព័ត៌មានពិតហើយធ្វើការឆ្លុះបញ្ចាំងឲ្យឃើញគ្រប់តថភាពសង្គមដើម្បីចូលរួមចំណែកកសាងសង្គមមួយឲ្យមានភាពយុត្តិធម៌ សុខសន្តិភាព និងមានការអភិវឌ្ឍដែលជាបំណងប្រាថ្នារបស់មនុស្សជាតិនៅទូទាំងសកលលោក»។

សម្តេចតេជោនាយករដ្ឋមន្ត្រីបានឆ្លៀតឱកាសនេះដាស់តឿនដល់អ្នកសារព័ត៌ទាំងអស់ឱ្យអនុវត្តការងាររបស់ខ្លួនឱ្យបានត្រឹមត្រូវតាមក្រមសីលធម៌វិជ្ជាជីវៈ ជៀសវាងផ្សាយព័ត៌មានតែមួយជ្រុង ឬក៏ផ្សាយព័ត៌មានក្លែងក្លាយជូនដល់សាធារណជន។ ការជំរុញឱ្យអនុវត្តតាមក្រមសីលធម៌និងវិជ្ជាជីវៈនេះក៏ជាអ្វីដែលសមាគមសារព័ត៌មាន និង អ្នកសារព័ត៌មានជើងចាស់តែងតែក្រើនរំលឹកនិងបន្តជំរុញដល់អ្នកកាសែតផ្សេងទៀតដែរ។

សម្តេចតេជោនាយករដ្ឋមន្ត្រីក៏បានធ្វើការកត់សំគាល់ផងដែរថា៖ការបើកទូលាយនូវសេរីភាពសារព័ត៌មាននៅកម្ពុជាបានធ្វើឲ្យវិស័យព័ត៌មានមានការរីកចម្រើនលូតលាស់យ៉ាងឆាប់រហ័សទាំងសារព័ត៌មានបោះពុម្ពផ្សាយ សារព័ត៌មានអេឡិចត្រូនិក និងប្រព័ន្ធផ្សព្វផ្សាយតាមអនឡាញ ដែលមាននិន្នាការផ្សេងៗគ្នាស្របតាមស្ថានភាពនយោបាយនិងការវិវឌ្ឍនៃបច្ចេកវិជ្ជាទំនើបនាពេលបច្ចុប្បន្នដែលអាចផ្សព្វផ្សាយ និងចែករំលែកព័ត៌មានទូទាំងសកលលោកបានយ៉ាងឆាប់រហ័ស។

សម្តេចតេជោបានបន្តថា ក្នុងសង្គមប្រជាធិបតេយ្យសារព័ត៌មានត្រូវបានគេចាត់ទុកជាអំណាចទី៤ ដែលបានចូលរួមចំណែកយ៉ាងខ្លាំងសម្រាប់ពង្រឹងប្រជាធិបតេយ្យ ការគោរពសិទ្ធិមនុស្ស និងពង្រឹងយុត្តិធម៌សង្គមផងដែរ។ សម្តេចតេជោ ហ៊ុន សែន បានក្រើនរំលឹកដល់អ្នកព័ត៌មានថាដើម្បីឱ្យប្រព័ន្ធផ្សព្វផ្សាយប្រកបដោយសក្តានុពលក្នុងការគាំទ្រសន្តិភាព និងប្រជាធិបតេយ្យ គឺទាមទារឱ្យអ្នកសារព័ត៌មានខិតខំប្រឹងប្រែងអភិវឌ្ឍន៍សមត្ថភាព និងមានភាពស្មោះត្រង់ក្នុងវិជ្ជាជីវៈ និងហ៊ាននិយាយនូវព័ត៌មានពិត។

នៅក្នុងថ្ងៃនៃទិវាសេរីភាពសារព័ត៌មានសាកលនេះសម្តេចតេជោនាយករដ្ឋមន្ត្រីក៏បានអំពាវនាវដល់អ្នកសារព័ត៌មានជាតិ និងអ្នកសារព័ត៌មានបរទេសទាំងអស់ ដែលកំពុងបំពេញការងារនៅកម្ពុជា និងបំពេញការងារនៅបរទេសក្តី ត្រូវយកចិត្តទុកដាក់អនុវត្តឲ្យបានត្រឹមត្រូវតាមក្រមសីលធម៌វិជ្ជាជីវៈ ជៀសវាងការផ្សព្វផ្សាយព័ត៌មានតែមួយជ្រុងដោយមិនបានផ្ទៀងផ្ទាត់ព័ត៌មានឲ្យបានគ្រប់ជ្រុងជ្រោយ ហើយធ្វើការឆ្លុះបញ្ចាំងសភាពការណ៍ទាំងមូលដោយពុំបានគិតគូរអំពីក្រឹត្យក្រមក្បួនខ្នាតនៃការសរសេរព័ត៌មាន ឬការផ្សាយព័ត៌មានក្លែងក្លាយ ដើម្បីបំប៉ោងសភាពការណ៍ និងបន្ទុះបង្អាប់ ញុះញង់អុជអាលឲ្យមានការស្អប់ខ្ពើម ប្រកាន់ពូជសាសន៍ ពណ៌សម្បុរ ភេទ ជំនឿ សាសនា និន្នាការនយោបាយ ឬ ស្ថានភាពដទៃទៀត ដែលធ្វើឲ្យមានអរិភាពដល់ទំនាក់ទំនងជាមួយប្រទេសដទៃ បង្កឲ្យមានការបែកបាក់សាមគ្គីភាពផ្ទៃក្នុង ឬបង្កឲ្យមានទំនាស់ជាមួយបរទេសដែលធ្វើឲ្យអន្តរាយដល់ប្រទេសជាតិ ដើម្បីផលប្រយោជន៍ផ្ទាល់ខ្លួន។

សម្តេចតេជោ ហ៊ុន សែន ក៏បានទទូចឱ្យអ្នកសារព័ត៌មានត្រូវបន្តខិតខំអភិវឌ្ឍខ្លួនឲ្យមានសមត្ថភាពក្នុងការវិភាគសភាពការណ៍ទាំងព្រឹត្តិការណ៍ជាតិ និងអន្តរជាតិឲ្យបានស៊ីជម្រៅ ដើម្បីដើរទាន់ការវិវឌ្ឍសភាពការណ៍ទាំងនៅក្នុងប្រទេស នៅក្នុងតំបន់ និងនៅលើសកលលោកនាពេលបច្ចុប្បន្ន។សម្តេចតេជោ ហ៊ុន សែន ក៏បានអំពាវនាវឱ្យអ្នកសារព័ត៌មានរួមគ្នាប្រយុទ្ធប្រឆាំងទៅនឹងព័ត៌មានក្លែងក្លាយដែលបង្កឡើងដោយជនអគតិមួយចំនួន ដើម្បីបំរើមហិច្ឆតាលោភលន់របស់ខ្លួន ដែលកំពុងតែគំរាមកំហែងសុខសន្តិភាព ប្រជាធិបតេយ្យ និងការអភិវឌ្ឍនៅលើសកលលោកទាំងមូល។

នៅក្នុងពិធីអបអរទិវាសេរីភាពសារព័ត៌មានដែលធ្វើឡើងនៅថ្ងៃនេះ ក្នុងរាជធានីភ្នំពេញលោកខៀវ កាញារីទ្ធ រដ្ឋមន្ត្រីក្រសួងព័ត៌មានក៏បានសង្កត់ធ្ងន់ពីការឲ្យតម្លៃលើការលើកស្ទួយសេរីភាពនៃការបញ្ចេញមតិសេរីភាពខាងសារព័ត៌មានការការពារឯករាជ្យភាពប្រព័ន្ធផ្សព្វផ្សាយដោយគ្មានការជ្រៀតជ្រែក ហើយលោកក៏បានឧទ្ទិសផងដែរដល់អ្នកសារព័ត៌មានដែលបានបាត់បង់ជីវិតក្នុងការបំពេញភារកិច្ចនាពេលកន្លងមក។ លោករដ្ឋមន្ត្រីក្រសួងព័ត៌មានក៏បានទាញចំណាប់អារម្មណ៍ពីសារៈសំខាន់នៃការប្រយុទ្ធប្រ ឆាំងនឹងការផ្សាយព័ត៌មានក្លែងក្លាយដែលមានលក្ខណៈ «លាបពណ៌ការញុះញង់អុចអាលជេរប្រមាថដោយការស្អប់គ្នា ដើម្បីឲ្យមានការបែកបាក់សាមគ្គីផ្ទៃក្នុងដែលធ្វើឲ្យសាកលលោកមានចលាចល» រហូតដល់បង្កឲ្យមានអំពើហិង្សា និងជម្លោះប្រដាប់អាវុធទៀតផង។

នៅថ្ងៃទី ៣ ខែ ឧសភានេះដែរ សហភាពសហព័ន្ធអ្នកសារព័ត៌មានកម្ពុជាក៏បានបន្តជំរុញលើកទឹកចិត្តឱ្យអ្នកកាសែតធ្វើការងាររបស់ខ្លួនដោយឈរលើភាពត្រឹមត្រូវ ស្មោះត្រង់ សីលធម៌ វិជ្ជាជីវៈ សុចរិតភាព និង ដោយគ្មានការភ័យខ្លាច។ នេះបើតាមសេចក្តីថ្លែងការណ៍របស់សហភាពសហព័ន្ធអ្នកសារព័ត៌មានកម្ពុជា សម្រាប់ទិវាសេរីភាពសារព័ត៌មានពិភពលោកឆ្នាំ២០១៩នេះ។

ចំណែកលោកប៉ែន បូណា ដែលជាប្រធានក្លិបអ្នកកាសែតកម្ពុជាវិញបានលើកឡើងថាតម្លៃនៃសារព័ត៌មានគឺផ្តើមចេញពីអ្នកសារព័ត៌មានខ្លួនឯងមុនគេ។ លោកពន្យល់ថាពេលណាដែលអ្នកកាសែតឱ្យតម្លៃដល់អាជីពរបស់ខ្លួនដោយគោរពឱ្យបានខ្ជាប់ខ្ជួននូវក្រមសីលធម៌វិជ្ជាជីវៈនិងភ្ជាប់ដោយការទទួលខុសត្រូវខ្ពស់ ពេលនោះពួកគេនឹងទទួលបានតម្លៃដែលអ្នកដទៃផ្តល់ឱ្យ។គឺតម្លៃនោះហើយដែលជាអំណាចសារព័ត៌មាន និងជាគ្រឹះដ៏រឹងមាំសម្រាប់ពង្រឹងនិងពង្រីកលំហសេរីភាពសារព័ត៌មានដ៏ពិតប្រាកដមួយដែលអ្នកកាសែតគ្រប់រូបចង់បាន៕