អ្នកប្រដាល់ជើងខ្លាំងផល សោភ័ណ្ឌ ក្លិបតាឡីដំរីមានរិទ្ធ បានវាយចាញ់អ្នកប្រដាល់ជើងខ្លាំងថៃ យុគផេត ផេតកាសាម (Yokpetch Petchkarsam) ក្នុងការជួបប្រកួតគ្នា កាលពីយប់ថ្ងៃសុក្រ ទី០៣ ខែឧសភា ឆ្នាំ២០១៩ នៅលើសង្វៀនបាយ័នស្ទឹងមានជ័យ។
ផល សោភ័ណ្ឌ ត្រូវយុគផេត ផេតកាសាម ទាត់ និងកាច់ឲ្យដួលលើរេញជាញឹកញាប់ ដែលធ្វើឲ្យសោភ័ណ្ឌ ចាញ់ពិន្ទុ។ នៅក្នុងការប្រកួតទឹកទី៥ ដែលជាទឹកចុងក្រោយនោះ សោភ័ណ្ឌ បានចាញ់យុគផេត ដាច់តែម្តង ធ្វើឲ្យចប់ការប្រកួតផល សោភ័ណ្ឌចាញ់ យុគផេត ផេតកាសាម ដោយពិន្ទុ។
សូមបញ្ជាក់ថា អ្នកប្រដាល់ថៃ យុគផេត នេះ ជាជើងខ្លាំងម្នាក់នៅស្រុកថៃ។ គេធ្លាប់មកប្រកួតនៅស្រុកខ្មែរប្រមាណ៣-៤ដងហើយ ក្នុងនោះគេធ្លាប់ប៉ះជាមួយឃុន ឌីម៉ាពីរដង ដោយវាយស្មើពិន្ទុគ្នាម្តង និងចាញ់ឌីម៉ា ក្នុងទឹកទី២ម្តង , ឈ្នះចាន់ ស៊ីណាត ក្លិបនិរោធមានជ័យ ហើយគេវាយចាញ់ឡៅ ចិត្រា ក្លិបកងពលតូចទ័ពឆ័ត្រយោង៩១១ដោយពិន្ទុ និងចុងក្រោយនេះ យកឈ្នះផល សោភ័ណ្ឌ ដោយពិន្ទុទៀត។
ចំពោះអ្នកប្រដាល់ជើងខ្លាំង ធន់ ចាន់តាក់ សមាគមកីឡាប្រដាល់ក្រសួងការពារជាតិ បានប្រកួតឈ្នះអ្នកប្រដាល់ថៃ កូលាប ដាំ ប្រាន២៦(Kolabdam Phran26 ) ដោយពិន្ទុ ប្រផុតប្រផើយ បន្ទាប់ពីវាយគ្នា៥ទឹកពេញនោះ។
ធន ចាន់តាក់ ឈ្នះ កូលាប ដាំ ដោយប្រផុតប្រផើយប៉ុណ្ណោះ ព្រោះក្នុងការប្រកួត៥ទឹកនេះចាន់តាក់ ត្រូវកូលាបដាំ វាយត្រូវច្រើនចង់គាំងម្តងៗទៅហើយ។ តែយ៉ាងណា ចាន់តាក់ គេក៏មានប្រៀបលើ កូលាបដាំ ដែរ ដោយវាយចេញបានច្រើនជាង និងចំគោលដៅល្អជាងការវាយចេញរបស់កូលាបដាំដែរ។
សូមបញ្ជាក់ថា កូលាប ដាំ ប្រាន២៦ គេធ្លាប់មកស្រុកខ្មែរច្រើនលើកហើយកន្លងមក ដែលក្នុងនោះគេធ្លាប់ប៉ះប្រកួតជាមួយធន ចាន់តាក់ម្តង(១០ធ្នូ២០១៧) ដោយឈ្នះពិន្ទុចាន់តាក់។ អ្នកប្រដាល់ថៃនេះ កាលពីបីឆ្នាំមុន គេធ្លាប់ផ្តួលអ្នកប្រដាល់ជើងខ្លាំងរបស់កម្ពុជាបីរូប ដែលមកលើកទី១ គេបានវាយឈ្នះផាន់ គ្រាន់ ដោយពិន្ទុ(២៤មេសា២០១៦) លើកទី២ បានវាយឈ្នះសេក គឹមរួន អ្នកប្រដាល់ក្លិបអង្គរមានជ័យដោយពិន្ទុ(២៤កក្កដា២០១៦ ) លើកទី៣ថ្ងៃទី០៩ ខែតុលា ឆ្នាំ២០១៦ គេបានវាយឈ្នះសូត្រ ប៊ុនធី ជើងខ្លាំងក្លិបបក្សីស្លាបដែកដោយពិន្ទុ ហើយលើកទី៤ថ្មីៗកន្លងទៅនេះ គេបានវាយឈ្នះសេង ស្រឿន ក្លិបមហិទ្ធរិទ្ធមាសរថ្ងកខេត្តស្វាយរៀង ក្នុងទឹកទី៤ ឈ្នះចាន់ ប៊ុនលាភ ក្លិបនិរោធមានជ័យដោយពិន្ទុ និង គេវាយចាញ់ផល សោភ័ណ្ឌ ដោយពិន្ទុ។
ចំណែក ការប្រកួតរវាងអ្នកប្រដាល់រួមជាតិវិញ ឡាំង កូស៊ីន អ្នកប្រដាល់ក្លិបសៅយ៉ាន់នាគាខេត្តបន្ទាយមានជ័យ បានវាយឈ្នះ អេ អាំម៉ារិនភូថង អ្នកប្រដាល់ក្លិបអេភូថងកីឡា ដោយពិន្ទុ។ ពីរនាក់នេះ ជួបប្រកួតគ្នាក្នុងទម្ងន់៥៤គីឡូក្រាម។
ធួន បួន អ្នកប្រដាល់ក្លិបកងពលតូចទ័ពឆ័ត្រយោង៩១១ បានវាយឈ្នះ ជុំ មាន អ្នកប្រដាល់អាណាចក្រគុនខ្មែរ ដោយពិន្ទុ ក្នុងការប្រកួតទម្ងន់៥៤គីឡូក្រាមដែរ៕
Source: Kampuchea Thmey Daily
0 Comments