បន្ទាយមានជ័យ ៖ ក្មេងទំនើង៤នាក់បាននាំគ្នាទៅអុកឡុកក្នុងភូមិ នាឱកាសដែលអ្នកភូមិបានធ្វើពិធីអបអរសាទរបុណ្យភ្ជុំបិណ្ឌជិតថ្ងៃបង្ហើយ ត្រូវបានកម្លាំងអាវុធខេត្តបន្ទាយមានជ័យចុះធ្វើការបង្ក្រាប។
ក្មេងទំនើងដែលបង្ក និងអុកឡុកក្នុងពិធីជប់លៀងក្នុងឱកាសភ្ជុំបិណ្ឌនេះគឺនៅវេលាម៉ោង១ល្ងាច ថ្ងៃទី១១ ខែតុលា ឆ្នាំ២០១៥ ចំណុចភូមិឈូក សង្កាត់ម្កាក់ ក្រុងសិរីសោភ័ណ ខេត្តបន្ទាយមានជ័យ។
លោកឧត្ដមសេនីយ៍ត្រី ឱ បូរិន្ទ មេបញ្ជាការកងរាជអាវុធហត្ថខេត្តបន្ទាយមានជ័យបាននិយាយថា ក្មេងទំនើងទាំង៤នាក់នោះមាន ១-ឈ្មោះ ប៊ូ ច័ន្ទរះ ភេទប្រុស អាយុ១៨ឆ្នាំ។ ២-ឈ្មោះកុក កួយ ភេទប្រុស អាយុ១៩ឆ្នាំ។ ៣-ឈ្មោះ ដឿត ហឺ ភេទប្រុស អាយុ១៩ឆ្នាំ និង៤-ឈ្មោះ ខូយសាវង្ស ភេទប្រុស អាយុ១៩ឆ្នាំ ដែលអ្នកទាំង៤នាក់រស់នៅភូមិពង្រ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ។
លោកបាននិយាយបន្តទៀតថា យោងតាមពាក្យបណ្ដឹងរបស់ឈ្មោះ តេង សុផារ័ត្ន នៅភូមិបត់ត្រង ឃុំបត់ត្រង់ ស្រុកមង្គលបូរី ខេត្តបន្ទាយមានជ័យ បានប្តឹងជនជាប់ចោទទាំង៤នាក់ថា បានប៉ុនប៉ងប្រើអំពើហិង្សាមកលើរូបខ្លួន។
លោកបានបញ្ជាក់ទៀតថា មុនពេលកើតហេតុ ឈ្មោះ តេង សុផារ័ត្ន បាននាំមិត្តភ័ក្ដិទៅលេងផ្ទះគូរដណ្ដឹងឈ្មោះ ចេក ផ្លានីន ភេទស្រី អាយុ១៨ឆ្នាំ រស់នៅភូមិកើតហេតុខាងលើ នាឱកាសនោះដែរ ផ្ទះរបស់គូរដណ្ដឹងបានធ្វើពិធីជប់លៀងដើម្បីអបអរសាទរក្នុងឱកាសបុណ្យភ្ជុំបិណ្ឌ។ លុះនៅម៉ោង១ល្ងាច ថ្ងៃទី១១ ខែតុលា ស្រាប់តែមានក្មេងទំនើងមួយក្រុមមានគ្នា៤នាក់ បានចូលមកអុកឡុកក្នុងពិធីជប់លៀងនេះ ដោយស្រែកគំរាមថា ផ្ទះនឹងដែលបានជេរអញតាមទូរស័ព្ទ ពេលនោះក្មេងទំនើងទាំង៤នាក់មានទាំងដំបងឆក់ និងកាំបិត បានស្ទុះចូលទៅរកកាប់សម្លាប់មនុស្សក្នុងពិធីជប់លៀងយ៉ាងសាហាវ តែពេលនោះបានឪពុកខាងស្រីចេញមកឃាត់ ហើយបានទូរស័ព្ទទៅអាវុធហត្ថដើម្បីឲ្យចុះមកបង្ក្រាប។ លុះមួយសន្ទុះក្រោយមក គេបានឃើញមានអាវុធហត្ថមួយក្រុមដែលដឹកនាំដោយលោកវរសេនីយ៍ត្រី ព្រហ្ម ថេង ប្រធានមន្ទីរយុត្តិធម៌ចុះទៅបង្ក្រាបបានទាំងសំបុកយកមកទីបញ្ជាកងរាជអាវុធហត្ថខេត្តដើម្បីសាកសួរ។
លោកបញ្ជាក់ទៀតថា បើតាមធ្វើការស្រាវជ្រាវរបស់អាវុធហត្ថ រឿងនេះបណ្តាលមកពីការយល់ច្រឡំពីរឿងរ៉ាវស្នេហា ទើបក្មេងទំនើងទាំង៤នាក់នេះឈានប្រើអំពើហិង្សាយ៉ាងដូច្នេះ។ ជនជាប់ចោទទាំង៤នាក់ត្រូវបានកសាងសំណុំរឿងដើម្បីបញ្ជូនទៅតុលាការដាក់ទោសទៅតាមផ្លូវច្បាប់៕
ក្មេងទំនើង៤នាក់ចូលអុកឡុកពិធីជប់លៀងក្នុងឱកាសបុណ្យភ្ជុំបិណ្ឌ ត្រូវអាវុធហត្ថឃាត់ខ្លួន
0 Comments