នេះគ្រាន់តែជាចំណែកដ៏តូចមួយនៅក្នុងក្រុងសៀមរាបបានបង្ហាញថា ត្រពាំងបុរាណចំនួន៦ត្រូវបានគេនាំគ្នាចាក់ដីលុបដើម្បីធ្វើជាកម្មសិទ្ធ ក្នុងនោះមាន ត្រពាំងតាពេជ្រ ត្រពាំងអញ្ចាញ ត្រពាំងវែង ត្រពាំងតាចេក និងត្រពាំងប្រាសាទ ស្ថិតនៅក្នុងសង្កាត់ជ្រាវក្រុងសៀមរាប។ ត្រពាំងដែលបាត់បង់រូបភាពដើមនោះគឺ ត្រពាំងតាពេជ្រ ត្រពាំងតាចេក ក្រៅពីនោះគេចាក់ដីលុបអស់មួយចំនួនហើយតែត្រូវហាមឃាត់ទាន់ ប៉ុន្តែតែអ្វីដែលគួរឲ្យសោកស្តាយគឺត្រពាំងបុរាណមួយចំនួនត្រូវបានគេលុបរួចធ្វើកម្មសិទ្ធអស់ទៅហើយ។
ប្រភពពីពលរដ្ឋនៅតំបន់នោះបាននិយាយប្រាប់ដោយសុំមិនបញ្ចេញឈ្មោះថា ត្រពាំងប្រាសាទនេះគឺមានទួលប្រាសាទ១មានឈ្មោះ គោកយាយមាសដែលនៅជាប់នឹងត្រពាំងនេះ ហើយជាងនេះទៅទៀតគេសង្កេតឃើញមានអាជ្ញាធរចម្រុះបានចុះមកធ្វើការអភិរក្សនៅតំបន់នេះផងដែរតែហាក់ដូចជាមានការធូរលង់ពេកទើបធ្វើឲ្យមានជនឆ្លៀតឱកាសលួចចាក់ដីលុបអស់មួយផ្នែកទៅហើយ។
ប្រភពដដែលបន្តថា ផ្ទះពលរដ្ឋនៅជិតត្រពាំងនោះចំនួន៦គ្រួសារបាននាំគ្នាច្រិបយកដីត្រពាំងម្នាក់បន្តិចៗ។ ប្រភពបន្ថែមថា ត្រពាំងប្រាសាទបច្ចុប្បន្ននេះនៅសេសសល់ប្រៀបបាននិងក្រឡុកមួយប៉ុណ្ណោះ ទើបពួកគាត់នាំគ្នាព្រួយបារម្ភពីការបាត់បង់សម្បត្តិសាធារណៈដ៏កម្រនេះ
ព្រោះអីពីដើម ឡើយត្រពាំងនេះអាចជួយដោះស្រាយការលំបាកក្នុងជីវភាពប្រចាំថ្ងៃរបស់ពួកគាត់បានមួយចំណែកធំគឺសម្រាប់ស្រោចស្រពផលដំណាំនិងឲ្យទឹកគោក្របីផឹកជាដើម។ ទាក់ទិននិងករណីនេះលោកឆោម ឆែមមេភូមិវាល បានប្រាប់កម្ពុជាថ្មីថា ប្លង់ត្រពាំងនោះមានទំហំ៥០×១០០ ឥឡូវដូចជារួមមែននោះឯងតែរឿងចាក់ដីលុបនោះលោកអត់ដឹងនោះទេ តែលោកថា រឿងចាក់ដីនោះកើតមានយូរដែរហើយតែពេលថ្មីៗនេះលោកនៅមិនទាន់ដឹងនៅឡើយទេ ព្រោះកន្លង
មកលោកចុះវាស់តែខាងកើតត្រពាំងឯខាងលិចលោកអត់ដឹងដែរ។
លោកមិនស្គាល់ឈ្មោះម្ចាស់ដីនោះទេតែគ្រាន់តែដឹងថា នៅលក់ដូរម្តុំផ្សារជ្រាវ។ លោកក្អោប
រ៉ន ចៅសង្កាត់ជ្រាវ បានឲ្យដឹងនៅរសៀលថ្ងៃទី០៤នេះថា បើតាមការវាស់វែងឲ្យដឹងថា ដីនោះមាន
បណ្តោយ១០០ម៉ែត្រគុណនិង៥០តែឥឡូវវាស់បានតែ១០០គុណនិង៣០ ដូច្នេះវាបាត់ដីអស់មួយចំនួន។ លោកបន្តថា ដីនៅជិតៗនោះគ្មានប្លង់កម្មសិទ្ធិនោះទេព្រោះនៅក្រោមការគ្រប់គ្រងរបស់អាជ្ញាធរអប្សរា ហើយដល់ពេលគេត្រូវការរើនោះគឺត្រូវរើ។ លោកសូ ប្លាតុង អភិបាលក្រុងសៀមរាបមិនអាចទាក់ទងសុំការពន្យល់បានទេនៅរសៀលថ្ងៃទី០៤នេះដោយហៅចូលច្រើនដងតែគ្មានអ្នកទទួល។
ចំណែកលោក ឡុង កុសល ប្រធាននាយកដ្ឋានផ្សព្វផ្សាយនៃអាជ្ញាធរអប្សរាបានឲ្យដឹងនៅថ្ងៃទី០៤នេះថា ករណីនេះលោកអត់ទាន់ដឹងនោះទេ ចាំលោកប្រាប់អ្នកជំនាញឲ្យចុះទៅមើលសិន។
ទោះជាយ៉ាងនេះក្តី លោកឃឹម ប៊ុនសុង អភិបាលខេត្តសៀមរាប ក៏មិនអាចស្វែងរកសុំការពន្យល់ពីលោកបានទេនៅថ្ងៃនេះដោយទូរស័ព្ទទៅលោកចូលតែគ្មានអ្នកទទួល។ ដូច្នេះករណីចាក់ដីលុបត្រពាំងបុរាណមួយចំនួននៅក្នុងខេត្តសៀមរាបនៅតែជាក្តីចម្ងល់របស់មហាជនដដែល ព្រោះករណីនេះគេឃើញអ្នកលុបត្រពាំងចេះតែលុបទៅដោយគ្មានឃើញមានចំណាត់ការណា
មួយនៅឡើយទៅលើជនដែលឃុបឃិតលក់ទ្រព្យសម្បត្តិសាធារណៈទាំងនោះដែលគេឃើញដីមួយចំនួនគេធ្វើផ្ទះសំណាក់និងដីមួយចំនួនទៀតគេបំរុងធ្វើប្លង់កម្មសិទ្ធិបណ្តើរៗហើយ៕
ត្រពាំងប្រាសាទត្រូវបានគេចាក់លុបបណ្តើរៗហើយនៅគ្រាដែលអាជ្ញាធរពាក់ព័ន្ធមិនមានចំណាត់ការ
0 Comments