ភ្នំពេញ ៖ បុរស៣នាក់ដែលសារភាពថា បានប្រើអំពើហិង្សាលើតំណាងរាស្ត្រ គណបក្សសង្គ្រោះជាតិពីររូបបណ្ដាលឲ្យរងរបួស ត្រូវបានអនុរក្សពន្ធនាគារព្រៃសបញ្ជូនមកតុលាការ ដើម្បីធ្វើការសាកសួរបន្ថែមនៅព្រឹកថ្ងៃទី២ ខែធ្នូ ឆ្នាំ២០១៥នេះ។ ប៉ុន្តែទោះបីយ៉ាងណា លទ្ធផលនៃការសាកសួររវាងជនត្រូវចោទទាំង៣នាក់ និងលោកចៅក្រមស៊ើបសួរ អ៊ី ថាវរៈ ពុំត្រូវបានប្រភពព័ត៌មានណាមួយបង្ហើបឲ្យដឹងនោះទេ។
បុរសទាំង៣នាក់នេះទី១ឈ្មោះ ចាយ សារិទ្ធ អាយុ៣៣ឆ្នាំ មានទីលំនៅ សង្កាត់តាខ្មៅ ក្រុងតាខ្មៅ ខេត្តកណ្តាល ទី២ឈ្មោះ ម៉ៅ ហឿន អាយុ៣៤ឆ្នាំ មានទីលំនៅ ឃុំព្រែកខ្សាយ ស្រុកពាមរក៍ ខេត្តព្រៃវែង និងទីឈ្មោះ សុត វណ្ណនី អាយុ៤៥ឆ្នាំ មានទីលំនៅសង្កាត់កំពង់សំណាញ់ ក្រុងតាខ្មៅ ខេត្តកណ្ដាល ត្រូវបានលោកព្រះរាជអាជ្ញារង មាស ច័ន្ទពិសិដ្ឋ សម្រេចចោទប្រកាន់ចំនួនពីរបទល្មើសគឺបទហិង្សាដោយចេតនាមានស្ថានទម្ងន់ទោស និងបទធ្វើឲ្យខូចខាតដោយចេតនាមានស្ថានទម្ងន់ទោស។
យោងតាមមាត្រា២១៨ និង មាត្រា ៤១១ នៃក្រមព្រហ្មទណ្ឌឃើញថា ជនដៃដល់ទាំង៣នាក់ អាចប្រឈមមុខនឹងការជាប់ពន្ធនាគារពី៤ឆ្នាំទៅ១០ឆ្នាំ និងពិន័យជាប្រាក់ពី៨លានរៀល ដល់ ២០លានរៀល។
ពាក់ព័ន្ធករណីនេះ ត្រូវបានប្រភពព័ត៌មានច្បាស់ការណ៍បង្ហើបឲ្យដឹងថា បុរសទាំង៣នាក់នេះបានសារភាពប្រហាក់ប្រហែលគ្នាប្រាប់តុលាការថា កាលពីព្រឹកថ្ងៃទី២៦ ខែតុលា ឆ្នាំ២០១៥ ពួកគេទាំង៣នាក់បានអង្គុយផឹកកាហ្វេនៅម្តុំវិមានឯករាជ្យ ស្រាប់តែទទួលបានព័ត៌មានថា មានបាតុកម្មមុខរដ្ឋសភាទាមទារឲ្យទម្លាក់ លោក កឹម សុខា ចេញពីតំណែងអនុប្រធានរដ្ឋសភា។ ពេលនោះពួកគេក៏ធ្វើដំណើរមកខាងមុខរដ្ឋសភា ហើយចូលក្នុងហ្វូងបាតុករ ដើម្បីក្តាប់សភាពការណ៍អំពីរឿងហេតុនេះ។ លុះពេលបាតុកម្មត្រូវបានបញ្ចប់ ហើយបាតុករបានរំសាយជាបណ្ដើរៗនោះ ពួកគេពុំទាន់ទៅណាទេ ពោលគឺនៅរង់ចាំចេញក្រោយគេបង្អស់ ព្រោះពួកគេមិនមែនជាក្រុមបាតុករ។
បន្ទាប់មក តំណាងរាស្ត្រគណបក្សសង្គ្រោះចំនួន២រូបបានជិះរថយន្តចេញមក ហើយបើកកញ្ចក់រថយន្តស្រែកជេរថា “ពួកអាយ៉ងយួន” ទើបធ្វើឲ្យពួកគេមានកំហឹងក៏វាយលើតំណាងរាស្ត្រនោះតែម្តង។
ប៉ុន្តែ ទោះបីយ៉ាងណា តំណាងរាស្ត្រទាំងពីររូប គឺ លោក គង់ សុភា និង លោក ញ៉យ ចំរើន បានបដិសេធថា ពួកគាត់ពុំបានប្រើពាក្យថា “ពួកអាយ៉ងយួន” នោះទេ៕
គ្មានការបង្ហើបលទ្ធផលនៃការសាកសួរចម្លើយបុរស៣នាក់ ដែលបានវាយតំណាងរាស្ត្រ
0 Comments