ភ្នំពេញ ៖ នៅក្នុងពិធីបើកសន្និបាតបូកសរុបការងារ នៅទីស្តីការក្រសួងពាណិជ្ជកម្ម កាលពី លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានមានប្រសាសន៍ថា នៅឆ្នាំ២០១៩ ខាងមុខ ក្រសួងនឹងខិតខំយ៉ាងណារៀបចំហេដ្ឋារចនាសម្ព័ន្ធ រូបវ័ន្តទុន ក៏ដូចជាហិរញ្ញវត្ថុ ដើម្បីទប់មិនឲ្យតម្លៃកសិផលធ្លាក់ចុះនៅឆ្នាំ២០១៩ខាងមុខនេះ ដោយសារ រដ្ឋាភិបាល បាន ពង្រីកហេដ្ឋារចនាសម្ព័ន្ធតភជាប់ទៅកាន់ប្រទេសទី៣ ដោយខ្លួនឯង ដើម្បីឲ្យកម្ពុជាមានឯករាជ្យភាពលើសេដ្ឋកិច្ចរបស់ខ្លួន។
លោក ប៉ាន សូរស័ក្តិ បានបញ្ជាក់ថា ការធ្លាក់ចុះតម្លៃនៃកសិផលកន្លងមក ដោយសារតែដល់រដូវប្រមូលផល នៅប្រទេសជិតខាងក៏ប្រមូលដូចគ្នា នៅកម្ពុជាផងដែរ ដែលធ្វើឲ្យតម្លៃកសិផលមានការធ្លាក់ចុះ និងធ្វើឲ្យយើងមានបញ្ហា។ លោក រដ្ឋមន្ត្រី បានលើកឡើងថា ដើម្បីធ្វើឲ្យប្រសើរឡើងលើការងារនេះ ក្រសួងបានរៀបចំគោលដៅជួយកសិករ ផលិតករ ដើម្បីទទួលបាននូវឥណទានសមស្រប រកទីផ្សារ ផ្តល់បច្ចេកទេសដាំដុះ និងប្រមូលផល កែច្នៃ វេចខ្ចប់ និងបង្កើតយន្តការអចិន្ត្រៃយ៍សម្រាប់ជួយអន្តរាគមន៍ សំដៅរក្សាស្ថេរ ភាពថ្លៃនៅក្នុងរដូវប្រមូលផល ក៏ដូចជាធ្វើសន្និធិទំនិញយុទ្ធសាស្ត្រសំខាន់ៗ ដែលប៉ះពាល់ដល់ជីវភាពប្រជាពលរដ្ឋ និងរៀបចំយន្តការសម្រាប់ធានា ស្ថេរភាពថ្លៃ និងរក្សាតុល្យភាពនៃការផ្គត់ផ្គង់ និងតម្រូវការនៃទំនិញយុទ្ធសាស្ត្រទាំងនោះលើទីផ្សារជាដើម។
លោក សង្ឃឹមថា កិច្ចការទាំងនេះនៅឆ្នាំ២០១៩ខាងមុខ នឹងជាផ្លែផ្កាខ្លះៗបន្តបន្ទាប់ ដើម្បីដោះស្រាយនូវបញ្ហាប្រមូលកសិផលដែលជារដូវទទួលផលផងនោះ។ បញ្ហាតម្លៃកសិផលធ្លាក់ចុះនៅរដូវប្រមូលផល តែងតែកើតមានជារឿយៗ ដោយសារកម្ពុជាពឹងផ្អែកខ្លាំងលើទីផ្សារប្រទេសជិតខាង ដែលបញ្ហានេះអ្នកជំនាញសេដ្ឋកិច្ច បានជំរុញរដ្ឋាភិបាល ឲ្យពង្រីកហេដ្ឋារចនាសម្ព័ន្ធតភ្ជាប់ទៅកាន់ប្រទេសទី៣ ដោយខ្លួនឯង ដើម្បីឲ្យកម្ពុជាមានឯករាជ្យភាពលើសេដ្ឋកិច្ចរបស់ខ្លួន៕
Source: Kampuchea Thmey Daily
0 Comments