កំពង់ឆ្នាំង ៖ សមត្ថកិច្ចបានឲ្យដឹងថា អ្នកស្លាប់ដោយគ្រោះថ្នាក់ចរាចរណ៍ភាគច្រើនជាយុវវ័យចាប់ពីអាយុ១៥ឆ្នាំ ដល់អាយុ២៩ឆ្នាំ ដើម្បីកាត់បន្ថយករណីគ្រោះថ្នាក់ចរាចរណ៍ឲ្យនៅកម្រិតទាប និងផ្សព្វផ្សាយច្បាប់ចរាចរណ៍ថ្មីនៅព្រឹកថ្ងៃទី២២ ខែធ្នូ ឆ្នាំ២០១៥ ការិយាល័យនគរបាលចរាចរណ៍ផ្លូវគោកខេត្តកំពង់ឆ្នាំង បានធ្វើការផ្សព្វផ្សាយច្បាប់ដល់សិស្សានុសិស្សជិត២ពាន់នាក់នៅក្នុងវិទ្យាល័យ ប៊ុន រ៉ានី ហ៊ុន សែន រលាប្អៀរត្បូង ដោយមានការចូលរួមពីលោកគ្រូអ្នកគ្រូក្នុងវិទ្យាល័យផងដែរ។
លោក សៀង រុន អធិការរងទទួលការងារចរាចរណ៍ និងសណ្ដាប់ធ្នាប់នគរបាលស្រុករលាប្អៀរបានថ្លែងទៅកាន់សិស្សានុសិស្សថា ករណីគ្រោះថ្នាក់ចរាចរណ៍នាពេលបច្ចុប្បន្នបានក្លាយទៅជាឃាតករយ៉ាងសាហាវ ដែលប្អូនៗជាយុវវ័យមួយចំនួនមិនបានចាប់អារម្មណ៍ឡើយ។ ក្នុង១ថ្ងៃមានអ្នកស្លាប់ដោយករណីគ្រោះថ្នាក់ចរាចរណ៍រហូតដល់៥នាក់ ដែលភាគច្រើនជាយុវវ័យអាយុចាប់ពី១៥ដល់២៩ឆ្នាំ។ ករណីគ្រោះថ្នាក់ចរាចរណ៍ទាំងអស់ សមត្ថកិច្ចជំនាញបានរកឃើញថា បណ្ដាលមកពីកត្តាមនុស្សពី៧០ទៅ៨០ភាគរយ គឺការបើកជែងមិនប្រុងប្រយ័ត្ន ការបើកមិនគោរពសិទ្ធអាទិភាព មិនយោគយល់គ្នាពេលបើកបរ ការបើកបរក្នុងស្ថានភាពស្រវឹង និងការបើកហួសល្បឿនកំណត់ជាដើម។
លោកបានបន្តថា ដោយសារច្បាប់ចរាចរណ៍ផ្លូវគោកថ្មីនឹងត្រូវអនុវត្តចាប់ពីថ្ងៃទី០១ ខែមករា ឆ្នាំ២០១៦ឆាប់ៗនេះ ទើបថ្ងៃនេះការិយាល័យចរាចរណ៍ផ្លូវគោកខេត្តបានសហការជាមួយវិទ្យាល័យប៊ុន រ៉ានី ហ៊ុន សែន រលាប្អៀរត្បូង ចុះមកបញ្ជ្រាបច្បាប់ចរាចរណ៍ផ្លូវគោកថ្មីដល់ប្អូនៗជាសិស្សានុសិស្សក្នុងគោលបំណងធ្វើឲ្យមានសុវត្ថិភាពដល់អ្នកប្រើប្រាស់ផ្លូវទាំងអស់ក្នុងពេលបើកបរ និងកាត់បន្ថយបានការស្លាប់ដោយករណីគ្រោះថ្នាក់ចរាចរណ៍។
នៅក្នុងពិធីនេះ លោក ឈឹម សារុន នាយការិយាល័យចរាចរណ៍ផ្លូវគោកបានឲ្យដឹងថា នៅក្នុងឆ្នាំ២០១៥នេះ ករណីគ្រោះថ្នាក់ក្នុងខេត្តកំពង់ឆ្នាំងមានការថយចុះគឺនៅក្នុងឆ្នាំ២០១៥គ្រោះថ្នាក់ចរាចរណ៍កើតឡើងចំនួន១២៤ករណី ថយចុះ១០៦ករណី ក្នុងឆ្នាំ២០១៤ បណ្ដាលឲ្យស្លាប់ចំនួន៦៩នាក់ ថយចុះជាងឆ្នាំ២០១៤ ចំនួន៣៤នាក់។
ប៉ុន្តែទោះបីជាករណីគ្រោះថ្នាក់ចរាចរណ៍ និងអ្នកស្លាប់មានការថយចុះពិតមែន ក៏ការិយាល័យនគរបាលចរាចរណ៍ផ្លូវគោកខេត្តកំពង់ឆ្នាំង នៅតែធ្វើការបញ្ជ្រាបច្បាប់ចរាចរណ៍ដល់សិស្ស ប្រជាពលរដ្ឋ អ្នកបើកបររថយន្តដឹកកម្មករ និងអ្នកប្រើប្រាស់ផ្លូវទាំងអស់ក្នុងន័យជួយទប់ស្កាត់ និងកាត់បន្ថយករណីគ្រោះថ្នាក់ចរាចរណ៍ឲ្យថយមកនូវកម្រិតទាបនៅក្នុងខេត្តកំពង់ឆ្នាំង៕
សិស្សានុសិស្សវិទ្យាល័យជិត២ពាន់នាក់ បានទទួលការបញ្ជ្រាបច្បាប់ចរាចរណ៍ផ្លូវគោកថ្មី
0 Comments