តាកែវ ៖ មានជនរងគ្រោះម្នាក់បានស្លាប់ភ្លាមៗមួយរំពេច ដោយឡែកម្នាក់ទៀត ដែលរួមដំណើរខាងក្រោយ បានរងរបួសធ្ងន់ ក្រោយពីបើកម៉ូតូទៅបុករថយន្តធុនធំចំពាក់កណ្តាលខណៈដែលបើកចេញពីផ្លូវលំចូលផ្លូវជាតិមិនប្រយ័ត្ន។
ហេតុការណ៍នេះ កើតឡើងកាលពីវេលាម៉ោង១៤និង៣០នាទីរសៀលថ្ងៃទី១៨ ខែកុម្ភៈ ឆ្នាំ២០១៩ នៅលើផ្លូវជាតិលេខ២ ចន្លោះគីឡូម៉ែត្រ៩៤-៩៥ ស្ថិតនៅភូមិប្រាំបីមុំ ឃុំប្រាំបីមុំ ស្រុកទ្រាំង ខេត្តតាកែវ។
ប៉ូលិសស្រុកទ្រាំងបានប្រាប់ថា ពិតជាមានករណីគ្រោះថ្នាក់ចរាចរណ៍បង្កឡើងដោយម៉ូតូ១គ្រឿងបុកនឹងរថយន្តប្រាកដមែន ដែលភាគីម៉ូតូបើកបរដោយឈ្មោះ ប្រាក់ ភឿន ភេទប្រុស រស់នៅភូមិ ឃុំកើតហេតុខាងលើ បានស្លាប់នៅកន្លែងកើតហេតុ និងអ្នករួមដំណើរម្នាក់ខាងក្រោយ រងរបួសធ្ងន់ត្រូវបានបញ្ជូនទៅមន្ទីរពេទ្យខេត្តតាកែវ។ ចំណែករថយន្តម៉ាកហ៊ីយ៉ាន់ដាយពាក់ស្លាកលេខ តាកែវ 3A 2965 (អ្នកបើកបរគេចខ្លួនបាត់ក្រោយកើតហេតុ)។
ក្រោយកើតហេតុ ប៉ូលិសស្រុកទ្រាំង បានចុះវាស់វែងធ្វើកំណត់ហេតុ និងបានយកវត្ថុតាងទាំង២មករក្សាទុកនៅអធិការដ្ឋាននគរបាលស្រុកដើម្បីកសាងសំណុំរឿងតាមនីតិវិធី ចំណែកសពជនរងគ្រោះដែលស្លាប់បានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments