គ្រូបង្វឹករបស់ក្រុមជម្រើសជាតិម៉ាឡេស៊ី លោក Tan Cheng Hoe បាននិយាយប្រាប់ ESPNថា សារដែលផ្ញើឲ្យក្រុមកីឡាកររបស់គាត់ មុនការប្រកួតជើងទី២នៃការប្រកួតវគ្គផ្តាច់ព្រ័ត្រ AFF Suzuki Cup 2018 នាថ្ងៃសៅរ៍នេះ ជាមួយក្រុមជម្រើសជាតិវៀតណាម នៅក្នុងទីក្រុងហាណយ គឺត្រូវតែរំងាប់ចិត្តខ្លួនឯង បើទោះជាប្រឈមមុខនឹងការបង្ករឿងក៏ដោយ។
ក្រុមជម្រើសជាតិម៉ាឡេស៊ី បានតាមពីក្រោយគេ២គ្រាប់ ដើម្បីស្រេចបានលទ្ធផលស្មើ២-២នៅការប្រកួតជើងទី១នៅមុខក្រុមអ្នកគាំទ្រ៩ម៉ឺននាក់របស់ពួកគេ ក្នុងទីក្រុងកាឡាឡាំពួ កាលពីថ្ងៃអង្គារ។
ខណៈពេលដែលមានអារម្មណ៍រំភើងរីករាយ ក្រុមម្ចាស់ផ្ទះយល់ឃើញថា ក្រុមជម្រើសជាតិវៀតណាម បង្កកំហុសច្រើនខាងតាក់ទិកលេង ក្នុងនោះកីឡាករ Do Duy Manh គួរតែទទួលបានកាតក្រហម សម្រាប់ឲ្យកណ្តាប់ដៃប៉ុនប៉ងមកលើប្រធានក្រុមជម្រើសជាតិម៉ាឡេស៊ី គឺកីឡាករ Zaquan Adha។
លោក Cheng Hoe បាននិយាយថា យើងដឹងច្បាស់ពីវិធីដែលពួកគេលេង ហើយវាដូចគ្នាពេលដែលយើងបានជួបនៅដំណាក់កាលពូល ហើយវាដូចគ្នានៅការប្រកួតជើងទី១។
លោកបន្តទៀតថា ការបង្ករឿង វាគឺជាសញ្ជាតិនៃការប្រកួតរបស់ពួកគេ។ វានឹងធ្វើឲ្យយើងស្រងាកចិត្ត ហើយអ្នកនឹងអាចបាត់បង់ការផ្តោតអារម្មណ៍របស់អ្នក និងធ្វើឲ្យអ្នកមានកំហុស។ នោះហើយគឺជាអ្វីដែលអ្នកត្រូវតែចៀសវាងឲ្យបាន។
នៅមុខក្រុមអ្នកគាំទ្រ៤ម៉ឺននាក់ក្នុងទីក្រុងហាណយ គ្រូបង្វឹកម្នាក់នេះ រំពឹងថា នឹងមិនមានការបណ្ដែតបណ្ដោយនោះទេ ខណៈដែលក្រុមទាំង២ខិតខំដើម្បីឈ្នះជើងឯកជាលើកទី២មិនធ្លាប់ដែលមានរបស់ពួកគេនោះ៕
Source: Kampuchea Thmey Daily
0 Comments