ភ្នំពេញ ៖ គណៈកម្មាធិការសិទ្ធិមនុស្សកម្ពុជា បានអះអាងថា ខ្លួនបានបញ្ចប់ និងបានដាក់របាយការណ៍ទី៥ នៃការអនុវត្តកតិកាសញ្ញាអន្តរជាតិ ស្ដីពីសិទ្ធិពលរដ្ឋ និងសិទ្ធិនយោបាយជូនគណៈកម្មាធិការសិទ្ធិមនុស្សអង្គការសហប្រជាជាតិរួចហើយ តាមរយៈក្រសួងការបរទេស និងសហប្រតិបត្តិការអន្តរជាតិ កាលពីថ្ងៃទី០១ ខែមេសា ឆ្នាំ២០១៩។
ការបញ្ជាក់ពីការបញ្ចប់ និងការដាក់របាយការណ៍នេះ ត្រូវបានធ្វើឡើងតាមរយៈសេចក្ដីប្រកាសរបស់ខ្លួន កាលពីថ្ងៃទី០៤ ខែមេសា ឆ្នាំ២០១៩។
តាមគណៈកម្មាធិការសិទ្ធិមនុស្សកម្ពុជា ព្រះរាជាណាចក្រកម្ពុជា បានក្លាយជារដ្ឋភាគី នៃកតិកាសញ្ញាអន្តរជាតិ ស្ដីពីសិទ្ធិពលរដ្ឋ និងសិទ្ធិនយោបាយ កាលពីថ្ងៃទី២៦ ខែឧសភា ឆ្នាំ១៩៩២ និងបានដាក់របាយការណ៍លើកដំបូងជូនគណៈកម្មាធិការសិទ្ធិមនុស្សអង្គការសហប្រជាជាតិកាលពីថ្ងៃទី២៣ ខែធ្នូ ឆ្នាំ១៩៩៨។ របាយការណ៍ផ្គួប លើកទី២ ទី៣ និងទី៤ បានដាក់នៅក្នុងខែកញ្ញា ឆ្នាំ២០១២ និងត្រូវបានគណៈកម្មាធិការធ្វើការពិនិត្យក្នុងសម័យប្រជុំលើកទី៣១៥៧ នៅថ្ងៃទី៣១ ខែមីនា ឆ្នាំ២០១៥។ នៅក្នុងការពិនិត្យនោះ គណៈកម្មាធិការបានអនុម័តសេចក្តីសង្កេតសន្និដ្ឋាន ដែលបានផ្ដល់អនុសាសន៍ចំនួន៣១ចំណុច ស្នើឲ្យកម្មកម្ពុជាយកមកអនុវត្តបន្ត។
បន្ទាប់ពីទទួលបានអនុសាសន៍ទាំង៣១នេះ គណៈកម្មាធិការសិទ្ធិមនុស្សកម្ពុជា បានរៀបចំកិច្ចប្រជុំជាមួយក្រសួង ស្ថាប័ន ពាក់ព័ន្ធធ្វើការពិនិត្យសិក្សា និងពិគ្រោះយោបល់ ដើម្បីបែងចែកអនុសាសន៍ទាំងនោះដល់ក្រសួង ស្ថាប័ន ទទួលបន្ទុកយកទៅអនុវត្ត និងបញ្ជូនរបាយការណ៍ស្តីពីសមិទ្ធផលសម្រេចបានមកគណៈកម្មាធិការសិទ្ធិមនុស្សកម្ពុជាវិញ។
ជាលទ្ធផល គណៈកម្មាធិការសិទ្ធិមនុស្សកម្ពុជា បានប្រមូល និងចងក្រងរបាយការណ៍ឆ្លើយតប ស្ដីពីវឌ្ឍនភាព នៃការអនុវត្តអនុសាសន៍ខាងលើរបស់ក្រសួង ស្ថាប័ន ពាក់ព័ន្ធនីមួយៗទៅជាពង្រាងរបាយការណ៍លើកទី៥។ បន្ទាប់មកបានរៀបចំកិច្ចប្រជុំអន្តរក្រសួង កម្រិតបច្ចេកទេស ដើម្បីពិនិត្យ និងកែតម្រូវលើពង្រាងរបាយការណ៍នេះ រួចដាក់ធ្វើការពិភាក្សាជាមួយអង្គការសង្គមស៊ីវិល មុននឹងដាក់ជូនកិច្ចប្រជុំអន្តរក្រសួង កម្រិតនយោបាយពិនិត្យ និងសម្រេច ហើយជាក់ស្ដែងរបាយការណ៍លើកទី៥នេះ ត្រូវបានពិនិត្យ និងសម្រេចដោយកិច្ចប្រជុំអន្តរក្រសួង កាលពីថ្ងៃទី១២ ខែមីនា ឆ្នាំ២០១៩។
សូមបញ្ជាក់ថា ខ្លឹមសារសំខាន់ៗ ដែលបានដាក់បញ្ចូលទៅក្នុងរបាយការណ៍ខាងលើ ជាការបូកសរុប និងសង្ខេបទាក់ទងទៅនឹងច្បាប់ លិខិតបទដ្ឋានគតិយុត្តិ កម្មវិធីនយោបាយ ផែនការយុទ្ធសាស្ត្រ ផែនការសកម្មភាព តួលេខផ្សេងៗ បញ្ហាប្រឈម និងយុទ្ធសាស្ត្រជាដើម។
បន្ទាប់ពីការបញ្ជូនរបាយការណ៍ខាងលើរួចរាល់ហើយ គណៈកម្មាធិការសិទ្ធិមនុស្សកម្ពុជា បាននិងកំពុងត្រៀមលក្ខណៈដឹកនាំក្រុមការងារអន្តរក្រសួង ដើម្បីទៅការពាររបាយការណ៍នេះ នៅចំពោះមុខគណៈកម្មាធិការសិទ្ធិមនុស្សអង្គការសហប្រជាជាតិ នៅពេលដែលទទួលបានការជូនដំណឹងពីគណៈកម្មាធិការនេះ អំពីកាលបរិច្ឆេទនៃសម័យប្រជុំ ពិនិត្យលើរបាយការណ៍លើកទី៥របស់កម្ពុជា។
សេចក្ដីប្រកាសព័ត៌មានបានអះអាងថា ក្រៅពីរបាយការណ៍ ស្ដីពីសិទ្ធិពលរដ្ឋ និងសិទ្ធិនយោបាយគណៈកម្មាធិការសិទ្ធិមនុស្សកម្ពុជា មានភារកិច្ចក្នុងការធ្វើរបាយការណ៍សិទ្ធិមនុស្សចំនួន៤ផ្សេងទៀត សម្រាប់ដាក់ជូនអង្គការសហប្រជាជាតិ ដែលរួមមាន ទី១, របាយការណ៍ពិនិត្យជាសកលតាមកាលកំណត់ (UPR)។ ទី២, របាយការណ៍សិទ្ធិសេដ្ឋកិច្ច សង្គមកិច្ច និងវប្បធម៌។ ទី៣, របាយការណ៍ស្ដីពីការលុបបំបាត់រាល់ទម្រង់ នៃការរើសអើងពូជសាសន៍។ និងទី៤, របាយការណ៍ស្ដីពីការការពារជនគ្រប់រូបពីការបាត់ខ្លួនដោយបង្ខំ៕
Source: Kampuchea Thmey Daily
0 Comments