ព្រឹត្តិការណ៍ដណ្តើមពានរង្វាន់ជើងឯក TV5 Boxing Knock Out Series by K.cement ទម្ងន់៥៧គីឡូក្រាមនៅសង្វៀន TV5 ព្រែកកំពឹស នាយប់ថ្ងៃទី ២៣ កុម្ភៈ ២០១៩ នេះ បានឈានមកដល់វគ្គផ្ដាច់ព្រ័ត្រហើយ។
ម៉ន សាម៉េត អ្នកប្រដាល់ក្លិបកងចក្ររាជសីហ៍មានរិទ្ធ និង ធន អៀងឡៃ អ្នកប្រដាល់សមាគមកីឡាប្រដាល់ក្រសួងការពារជាតិ ពួកគេទាំងពីរនឹងត្រូវប្រជែងគ្នា ដើម្បីយកតំណែងជាម្ចាស់ពានរង្វាន់ជើងឯក TV5 Knock Out Series ទម្ងន់៥៧គីឡូក្រាមនេះ។
ម៉ន សាម៉េត ឆ្លងកាត់ការប្រកួតជម្រុះ៤ដំណាក់កាលកន្លងមក គេវាយឈ្នះទាំង៤ប្រកួត។ លើកទី១ គេឈ្នះ ឯម អ្នកប្រដាល់ក្លិបថ្មគោលពោធិសែនជ័យដោយពិន្ទុ , លើកទី២ ឈ្នះរឿន សុខលី ក្លិបការិយាល័យទី៥កងទ័ពជើងគោក ក្នុងទឹកទី២, លើកទី៣ ឈ្នះយុគ យក្សផ្លែ ក្លិបបូរីរាជសីហ៍មានរិទ្ធដោយពិន្ទុ និង លើកទី៤ ដែលជាការប្រកួតពាក់កណ្តាលផ្តាច់ព្រ័ត្រនោះ ម៉ន សាម៉េត បានឈ្នះគួន ប៊ុនហ៊ីម ក្លិបពន្លឺសាមគ្គីខេត្តបាត់ដំបង ក្នុងទឹកទី៥ ។
ចំពោះ អ្នកប្រដាល់ធន អៀងឡៃ វិញ គេឈ្នះទាំង៤ដំណាក់កាលដូចគ្នាដែរ។ លើកទី១ អៀងឡៃ វាយឈ្នះអ្នកប្រដាល់អេ រ៉ាវ៉ាន់ចាន់រាជ ក្លិបកុសលកីឡា ដោយពិន្ទុ , លើកទី២ ឈ្នះសេក គឹមសាន្ត ក្លិបអង្គរមានជ័យខេត្តសៀមរាបក្នុងទឹកទី១ , លើកទី៣ ឈ្នះសៀវ ង៉ុយ ក្លិបកងពលធំអន្តរាគមន៍លេខ២ ដោយពិន្ទុ និង លើកទី៤ ប្រកួតពាក់កណ្តាលផ្តាច់ព្រ័ត្រ វាយឈ្នះបឺត សង្ឃឹមក្លិបរ៉ាហាប់ស្វាយប៉ាក ក្នុងទឹកទី១។
រវាង ម៉ន សាម៉េត និង ធន អៀងឡៃ នេះ តាមការរំពឹងទុកនោះ ម៉ន សាម៉េត ប្រហែលជាអ្នកយកពានហើយ ។ តាមការកត់សម្គាល់នោះ អ្នកប្រដាល់ទាំងពីររូបនេះ ពុំមានប្រវត្តិធ្លាប់ជួបគ្នាទេ កន្លងមក ព្រោះសាម៉េត គេជាអ្នកប្រដាល់ជើងចាស់ ឯ ធន អៀងឡៃ ជាអ្នកប្រដាល់ស្រករក្រោយ។
ម៉ន សាម៉េត គេមានប្រៀបឈ្នះធន អៀងឡៃ ដោយសារគេមានស្នៀតកណ្តាប់ ជង្គង់ និងកែងល្អ ហើយពិសេសនោះ គេមានកលល្បិចក្នុងការប្រកួតដ៏ប៉ិនប្រសប់ ដែលអៀងឡៃពិបាកនឹងទប់ទល់ ។ ចាំមើល អ្នកដែលជាម្ចាស់ពានរង្វាន់ជើងឯក Knock Out TV5 Series ទម្ងន់៥៧ គីឡូក្រាមនេះ អាចជា ម៉ន សាម៉េត ឬ ?។
សូមបញ្ជាក់ថា ម៉ន សាម៉េត គេធ្លាប់ឈ្នះជើងឯកខ្សែក្រវាត់ ហេតុនេះគេមិនធម្មតានោះឡើយ ។ ចំណែកឯធន អៀងឡៃ គេជាអ្នកប្រដាល់ស្រករក្រោយ ដោយគ្រាន់តែគេវាយខ្លាំង និងមានចិត្តប្រដាល់ធំប៉ុណ្ណោះ។
ចំពោះ បឺត សង្ឃឹម អ្នកប្រដាល់ក្លិបរ៉ាហាប់ស្វាយប៉ាក ដែលត្រូវប្រកួតដណ្តើមយកលេខ ៣ ជាមួយ គួន ប៊ុនហ៊ីម ក្លិបពន្លឺសាមគ្គីខេត្តបាត់ដំបង នោះវិញ ពុំដឹងថា បានទៅនរណានោះដែរ។
គួន ប៊ុនហ៊ីម គេជាអ្នកប្រដាល់ជើងចាស់ ដូច្នេះមិនប្រាកដថាគេចាញ់បឺត សង្ឃឹម នោះទេ ។ តែប៊ុនហ៊ីម ក៏មិនច្បាស់ថាឈ្នះបឺត សង្ឃឹម ដែរ ។ ដូច្នេះ ចាំមើលតើ បឺត សង្ឃឹម ឬ គួន ប៊ុនហ៊ីម ដែលឈ្នះបានប្រាក់រង្វាន់លេខ ៣ នេះ ?។
គួរបញ្ជាក់ថា សម្រាប់អ្នកទទួលបានពានរង្វាន់ជើងឯក TV5 Knock Out Series ទម្ងន់ ៥៧ គីឡូក្រាមនេះ នឹងទទួលបានពាន ១ និង ទឹកប្រាក់រង្វាន់ចំនួន៤.០០០ដុល្លារ លេខ២ បានពាន១ និងរង្វាន់អម ២.០០០ដុល្លារ លេខ៣ ពាន និងរង្វាន់អម៧៥០ដុល្លារ ហើយលេខ ៤ បាន៥០០ដុល្លារ៕
Source: Kampuchea Thmey Daily
0 Comments