ភ្នំពេញ ៖ រថយន្តសាំងយ៉ុង បុកម៉ូតូកង់បីបណ្ដាលឲ្យមនុស្សរងរបួសធ្ងន់០២នាក់ ស្រាល០៣នាក់ កាលពីវេលាម៉ោង១៣ និង១០នាទី ត្រូវនឹងថ្ងៃទី១៨ ខែកុម្ភៈ ឆ្នាំ២០១៩ ត្រង់ចំណុចខាងជើងពេទ្យ លោកសង្ឃ លើផ្លូវជាតិ៥ ស្ថិតនៅភូមិគ្រួស សង្កាត់សំរោង ខណ្ឌព្រែកព្នៅ រាជធានីភ្នំពេញ។
សមត្ថកិច្ចមូលដ្ឋានបានឲ្យដឹងថា គ្រោះថ្នាក់ចរាចរណ៍នេះ កើតឡើងរវាងរថយន្តម៉ាក(សាំងយ៉ុង) ពណ៌ស ពាក់ស្លាកលេខភ្នំពេញ2U.8204 ធ្វើដំណើរលើផ្លូវជាតិលេខ៥ ក្នុងទិសដៅពីត្បូងទៅជើង អ្នកបើកបរឈ្មោះ មាស ផានិត ភេទប្រុស អាយុ ៤០ឆ្នាំ ស្នាក់នៅភូមិកំពង់ព្រីង ឃុំសិត្បូ ស្រុកស្អាង ខេត្តកណ្តាល។ ចំណែកម៉ូតូកង់បី ដែលរងគ្រោះនេះ (ម៉ូតូកង់បីអត់លេខ)អ្នកបើកបរ និងអ្នករួមដំណើរអត់ស្គាល់អត្តសញ្ញាណ។
ប្រភពដដែលបានឲ្យដឹងទៀតថា នៅមុនពេលកើតហេតុគេឃើញរថយន្តបង្កបើកបរលឿនដែលមានទិសដៅស្របទិសគ្នា លុះមកដល់កន្លែងកើតហេតុ បានបុកជាមួយម៉ូតូកង់បី០១គ្រឿង ម៉ូតូកង់បីអត់លេខ អ្នកបើកបរ និងអ្នករួមដំណើរ អត់ស្គាល់អត្តសញ្ញាណ ជនរងគ្រោះបានបញ្ជូនទៅមន្ទីរពេទ្យ ចំណែកអ្នកបើកបរត្រូវបានឃាត់ខ្លួន។
ករណីនេះ បណ្តាលឲ្យមនុស្សរងរបួសធ្ងន់ ០២នាក់ ស្រាល០៣នាក់ ខូចខាតរថយន្តស្រាល០១គ្រឿង និងម៉ូតូកង់បីធ្ងន់០១គ្រឿង មូលហេតុបណ្តាលមកពីអ្នកបើកបររថយន្ត បើកបរលឿនខ្វះការប្រុងប្រយ័ត្នទៅបុកពីក្រោយតែម្តង ហើយករណីនេះ កម្លាំងយើងបានប្រគល់ឲ្យការិយាល័យជំនាញនគរបាលចរាចរណ៍ផ្លូវគោក ចាត់ការបន្ត៕
Source: Kampuchea Thmey Daily
0 Comments