សៀមរាប ៖ សមត្ថកិច្ចបានឲ្យដឹងថា កុមារ២នាក់បងប្អូនជីដូនមួយ បានលង់ទឹកស្រះក្បែរផ្ទះស្លាប់យ៉ាងអាណោចអាធ័ម ធ្វើឲ្យឪពុកម្តាយកុមាររងគ្រោះយំសោកបោកខ្លួនស្តាយកូនយ៉ាងខ្លាំងដោយសារតែការធ្វេសបុករបស់ពួកគាត់។
ហេតុការណ៍នេះ បានកើតឡើងនៅវេលាម៉ោង១៧និង៤០នាទីល្ងាច ថ្ងៃទី២២ ខែមីនា ឆ្នាំ២០១៩ ស្ថិតក្នុងភូមិអូររូង ឃុំពង្រក្រោម ស្រុកជីក្រែង ខេត្តសៀមរាប។
លោកវរសេនីយ៍ឯក សុខ សុទ្ធាវុធ អធិការនគរបាលស្រុកជីក្រែង បានឲ្យដឹងថា មានករណីកុមារា និង កុមារី២នាក់បានលង់ទឹកស្រះនៅក្នុងភូមិអូររូង ឃុំពង្រលើ ស្រុកជីក្រែង បណ្តាលឲ្យស្លាប់។ ការធ្វេសប្រហែសរបស់ឪពុកម្តាយជនរងគ្រោះទាំង២ គឺដោយសារពួកគាត់(ក្មេងៗ)ទៅលេងផ្ទះជីដូន ហើយជីដូនស្មានតែចៅទៅផ្ទះទើបមិនបានចាប់អារម្មណ៍។
លោកបន្តថា ជនរងគ្រោះមានឈ្មោះទី១-ឈ្មោះជុំ រតនា ភេទប្រុស អាយុ៨ឆ្នាំ រស់នៅភូមិកើតហេតុក្នុងភូមិអូររូង ឃុំពង្រលើ ស្រុកជីក្រែង។ ទី២-ឈ្មោះជុំ សុផល ភេទស្រី អាយុ៦ឆ្នាំ នៅភូមិជាមួយគ្នា ពីរនាក់នេះត្រូវជាបងប្អូនជីដូនមួយនឹងគ្នា។
យោងតាមការបំភ្លឺរបស់លោកយាយដែលចៅរបស់គាត់ស្លាប់នេះ គាត់បាននិយាយថា នៅម៉ោង១២និង០០នាទីក្នុងថ្ងៃដូចខាងលើចៅទាំង២នាក់នេះបានទៅផ្ទះរបស់គាត់ហើយពួកវាបានទៅចុះលេងទឹកស្រះដែលនៅក្បែរផ្ទះរបស់គាត់ គឺលេងនៅកន្លែងរាក់ៗគាត់បានហៅឲ្យមកផ្ទះគាត់វិញលុះបន្ទាប់មកគាត់បានដេកលក់ភ្ញាក់ឡើងបាត់ចៅក៏ដើររកចៅដល់ផ្ទះរបស់វារកមិនឃើញក៏នាំមករាវរកទឹកស្រះហើយក៏បានឃើញនៅក្នុងទឹកជ្រៅទាំង២នាក់បានស្លាប់បាត់ហើយ។
លោកបន្តថា ការត្រួតពិនិត្យនិងធ្វើកោសល្យវិច័យពុំមានស្លាកស្នាមណាគួរឲ្យចាប់អារម្មណ៍រឿងផ្សេងឡើយ។
បន្ទាប់ពីត្រួតពិនិត្យរួចកម្លាំងនគរបាលជំនាញស្រុកជីក្រែងបានប្រគល់សពឲ្យទៅគ្រួសារជនរងគ្រោះចាត់ចែងធ្វើបុណ្យតាមប្រពៃណី៕
Source: Kampuchea Thmey Daily
0 Comments