ស៊ី​ហ្គេម​ឆ្នាំ​២០១៩ ដែល​ប្រទេស​ហ្វីលីពីន កំណត់​ឲ្យ​ចុះឈ្មោះ​កីឡាករ​លើស​អាយុ​ចំនួន២នាក់

​ព្រឹត្តិការណ៍​កីឡា​អាស៊ីអាគ្នេយ៍ (SEA Games 2019) ឆ្នាំ​២០១៩ ដែល​ធ្វើ​នៅ​ប្រទេស​ហ្វីលីពីន នឹង​អនុញ្ញាត​ឲ្យ​ក្រុម​ជាតិ​សមាជិក​ទាំង​១១​ក្រុម ​មាន​កីឡាករ​ចំនួន​២​នាក់ ដែល​មាន​វ័យ​លើស​អាយុ ២២​ឆ្នាំ (U22) អាច​ចូលរួម​ក្នុង​ក្រុម នេះ​បើ​យោង​តាម​ការ​បញ្ជាក់​រប​ស់​សហព័ន្ធ​កីឡាបាល់ទាត់​ប្រចាំ​តំបន់​អាស៊ីអាគ្នេយ៍ (AFF)​។



​លើ​វិ​ប​សាយ​របស់ AFF បាន​បញ្ជាក់​ថា ​យោង​តាម​មាត្រា ៣.៣ ក្នុង​ច្បាប់​នៃ​ការប្រកួត​បាន​ចែង​ថា មានតែ​កីឡាករ​ដែល​មាន​អាយុ​២២​ឆ្នាំ និង​ក្រោម​២២​ឆ្នាំ ( កើត​នៅ​ថ្ងៃទី​០១ ខែមករា ឆ្នាំ១៩៩៧ និង​ក្រោម​នេះ​) និង​កីឡាករ ២​នាក់​ដែល​កើតមុន​ថ្ងៃទី​០១ ខែមករា ឆ្នាំ​១៩៩៧ មាន​សិទ្ធិ​ចូលរួម​ប្រកួត​ក្នុង​ព្រឹត្តិការណ៍​ស៊ី​ហ្គេម​ឆ្នាំ​២០១៩ លើ​ប្រភេទ​កីឡាបាល់ទាត់​បុរស​។ ដូច្នេះ​បានសេចក្ដីថា ក្រុម​ទាំង​១១ ដែល​ចូលរួម​ក្នុង​ព្រឹត្តិការណ៍​ខាងលើនេះ អាច​នឹង​បន្ថែម​កីឡាករ​អាយុ​លើស ២២​ឆ្នាំ តាម​តម្រូវការ​របស់ខ្លួន​ចំនួន​២​នាក់​។



សូម​បញ្ជាក់​ថា ​ការប្រកួត​ស៊ី​ហ្គេម​លើក​ទី​៣០​នៅ​ប្រទេស​ហ្វីលីពីន នឹង​ប្រព្រឹត្តទៅ​ចាប់ពី​ថ្ងៃទី​៣០ ខែវិច្ឆិកា ដល់​ថ្ងៃទី​១១ ខែធ្នូ ឆ្នាំ​២០១៩ ដែល​មាន​៥២៣ វិញ្ញាសា​ប្រកួត​លើ​ប្រភេទ​កីឡា​ចំនួន​៥៦​។​សម្រាប់​ប្រភេទ​កីឡាបាល់ទាត់​រប​ស់បុរ​ស នឹងធ្វើ​ឡើង​នៅ​កីឡដ្ឋាន Rizal Memorial ក្នុង​ទីក្រុង ម៉ានីល ខណៈ​កីឡដ្ឋាន Binan Football Stadium ក្នុង​ទីក្រុង Binan និង Laguna គឺ​សម្រាប់​ប្រភេទ​កីឡាបាល់ទាត់​ស្ត្រី​។



ក្រុមបាល់ទាត់​បុរស​ម​ក​ពី​ប្រទេស​ថៃ ធ្លាប់​ឈ្នះ​មេដាយមាស​ច្រើន​ជាង​គេ​ក្នុង​ព្រឹត្តិការណ៍​កីឡា​ស៊ី​ហ្គេម​តាំងពី​បង្កើត​ឡើង​ដំបូង​ពី​ឆ្នាំ​១៩៥៩ មក​ពោល​គឺ​ចំនួន​១៦​លើក ខណៈ​ក្រុម​របស់​កម្ពុជា មិន​ធ្លាប់​ឆ្លង​ផុត​វគ្គ​ចែក​ពូ​ល​នោះ​ទេ​។ នៅ​ឆ្នាំ​២០១៩​នេះ គណៈកម្មការ​រៀបចំ​កា​រ​ប្រកួត​នៅ​មិនទាន់​ចាប់ឆ្នោត​ជ្រើសរើស​គូ​ក្នុង​ពូ​ល​នៅឡើយ​នោះ​ទេ ស្រប​ពេល​ក្រុម​នីមួយៗ​ជា​សមាជិក​ក្នុង​ប្រទេស​ប្រចាំ​តំបន់​កំពុងតែ​ពង្រឹង​កូនក្រុម​របស់​ខ្លួន​តាម​រយៈ​វគ្គ​ជម្រុះ​ពានរង្វាន់​បាល់ទាត់ 2020 AFC U-23 Championship៕

Source: Kampuchea Thmey Daily