ព្រះសីហនុ ៖ ការពាក់មួកសុវត្ថិភាព នៅក្នុងខេត្តសីហនុ អាចនឹងមានការកើនឡើងរហូតដល់ជាង៦០ភាគរយនៅថ្ងៃទី១ ខែមករា ឆ្នាំ២០១៦ ដោយសារទូទាំងប្រទេសកម្ពុជានឹងអនុវត្តយ៉ាងម៉ឺងម៉ាត់នូវច្បាប់ចរាចរណ៍ផ្លូវគោកថ្មី ក្នុងនោះនគរបាលចរាចរណ៍នឹងធ្វើការផាកពិន័យ១៥០០០រៀលចំពោះជនណាដែលមិនពាក់មួកសុវត្ថិភាព។
លោក អ៊ី សុខា ស្នងការរងនិងជាប្រធានការិយាល័យកណ្តាលសណ្តាប់ធ្នាប់សាធារណៈខេត្តព្រះសីហនុ បានមានប្រសាសន៍ដោយជឿជាក់ថា ការអនុវត្តច្បាប់ចរាចរណ៍ផ្លូវគោកថ្មីនៅថ្ងៃទី១ខែ១ឆ្នាំ២០១៦ខាងមុខនេះចំពោះការពាក់មួកសុវត្ថិភាពនឹងមានការកើនឡើង ដោយសារតែមានការចូលរួមផ្សព្វផ្សាយយ៉ាងសស្រាក់សស្រាំពីសំណាក់ប្រពន្ធ័ផ្សព្វផ្សាយពត៌មានជាតិនិងអន្តរជាតិរួមទាំងមានការចូលរួមដោយផ្ទាល់ពីប្រជាពលរដ្ឋនៅក្នុងខេត្តព្រះសីហនុ។ទន្ទឹមនឹងនោះគឺការអនុវត្តច្បាប់ចរាចរណ៍នេះបានធ្វើឡើងព្រមៗគ្នាទូទាំងប្រទេសកម្ពុជាតែម្តង។ លោកបញ្ជាក់ទៀតថា កាលពីមុន ប្រជាពលរដ្ឋគាត់បើកបរម៉ូតូពាក់មួកសុវត្ថិភាពប្រមាណតែ៣០ភាគរយតែប៉ុណ្ណោះ ប៉ុន្តែពេលនេះឃើញថាមានការកើនឡើងហើយលោកសង្ឃឹមថានៅថ្ងៃខាងមុខការពាក់មួកសុវត្ថិភាពនៅខេត្តព្រះសីហនុនឹងមានការកើនឡើងជាង៦០ភាគរយ។
លោក អ៊ី សុខា បានប្រាប់ឲ្យដឹងខណៈពេលដំណើរទស្សនកិច្ចរបស់អ្នកសារពត៌មានរួមនឹងមន្ត្រីនគរបាលចុះត្រួតពិនិត្យគោលដៅលើការអនុវត្តច្បាប់ចរាចរណ៍នៅខេត្តព្រះសីហនុកាលពីរាត្រីថ្ងៃទី២៣ខែធ្នូឆ្នាំ២០១៥។
យើងសង្កេតឃើញថា រយៈពេលប៉ុន្មានថ្ងៃចុងក្រោយជិតដំណាច់ឆ្នាំ២០១៥នេះការផ្សព្វផ្សាយអំពីការចាប់ផ្តើមអនុវត្តន៍ច្បាប់ចរាចរណ៍ផ្លូវគោកថ្មីបានធ្វើឡើងទូទាំងប្រទេសកម្ពុជាគ្រប់ស្ថាប័នដែលពាក់ព័ន្ធដើម្បីឲ្យមន្ត្រី ដែលមានសមត្ថកិច្ច មន្ត្រីនគរបាលចរាចរណ៍ អង្គការសង្គមស៊ីវិលនានា ត្រៀមខ្លួនជាស្រេចដើម្បីអនុវត្តន៍នូវច្បាប់នេះឲ្យមានប្រសិទ្ធភាពខ្ពស់នៅថ្ងៃទី១ខែមករាឆ្នាំ២០១៦។
ដោយឡែកនៅក្នុងខេត្តព្រះសីហនុក៏មិនខុសពីបណ្តាខេត្តផ្សេងទៀតនិងទីក្រុងភ្នំពេញនៃព្រះរាជាណាចក្រកម្ពុជាដែរ លោក សុខ ផន អភិបាលរងខេត្តព្រះសីហនុ បានមានប្រសាសន៍ឲ្យដឹងថា នៅក្នុងខេត្តព្រះសីហនុយើងក៏បានខំផ្សព្វផ្សាយអំពីការអនុវត្តច្បាប់ចរាចរណ៍នៅថ្ងៃទី១ ខែមករាឆ្នាំ២០១៦ទៅដល់សហគមន៍និងសាលារៀននានាដើម្បីឲ្យប្រជាជនគាត់បានយល់ អំពីគោលការណ៍នៃការអនុវត្តច្បាប់។ ជាពិសេសការផាកពិន័យ១៥០០០រៀលចំពោះជនណាដែលមិនពាក់មួកសុវត្ថិភាព និងអ្នកជិះពីក្រោយក៏ធ្វើការពិន័យផងដែរ៕
ការពាក់មួកសុវត្ថិភាព នៅក្នុងខេត្តសីហនុអាចនឹងមានការកើនឡើង នៅថ្ងៃទី១ ខែមករា ឆ្នាំ២០១៦ខាងមុខនេះ
0 Comments