កែប ៖ ក្នុងនាមជាអគ្គនាយកប្រតិបត្តិ នៃមូលនិធិ”ទឹកចិត្តទាំងបី” និងជាឯកអគ្គរដ្ឋទូតសុឆន្ទៈ នៃខេត្តកែប ប្រទេសកម្ពុជា អតីតបវរកញ្ញាជប៉ុនចំនួន៣រូប ដែលដឹកនាំដោយកញ្ញា Hisae Arai បវរកញ្ញា ឆ្នាំ២០១១ បានផ្ដើមយុទ្ធនាការប្រមូលសំរាមនៅលើឆ្នេរកែប ប្រទេសកម្ពុជា។
ព្រឹត្តិការណ៍រើសសំរាមលើឆ្នេរកម្ពុជា ក្រោមប្រធានបទ កែប សម្អាត កែប របស់អង្គការ ទឹកចិត្តទាំង៣ ដោយមានការសហការជាមួយសហព័ន្ធកីឡាវាយសីកម្ពុជាបានធ្វើឡើងកាលពីថ្ងៃទី១៩ ខែធ្នូ ឆ្នាំ២០១៥ នៅខេត្តកែប ដែលមានការចូលរួមពីលោក កែន សត្ថា អភិបាលខេត្តកែប កញ្ញា Hisae Arai បវរកញ្ញាជប៉ុន ឆ្នាំ២០១១ កញ្ញា kiko Arai បវរកញ្ញាឆ្នាំ២០១២ និងកញ្ញា Hana Oka បវរកញ្ញាឆ្នាំ២០១៤ និងទេព រិទ្ធីវិទ្ធ ជាអគ្គលេខាធិការសហព័ន្ធកីឡាវាយកូនបាល់កម្ពុជា ព្រមជាមួយមហាជន និងសិស្សានុសិស្សជាច្រើនរូប។
កញ្ញា Hisae Arai បានឲ្យដឹងថា នេះជាព្រឹទ្ធការណ៍លើកទីបីហើយ ដែលអង្គការទឹកចិត្តទាំងបី បានធ្វើឡើង បន្ទាប់ពីទទួលបានភាពជោគជ័យក្នុងដំណាក់កាលចំនួនពីរលើកមកនេះ។
កញ្ញាបញ្ជាក់ថា តាមរយៈកម្មវិធីនេះ បានចូលរួមបង្កើនសោភណភាព ភាពទាក់ទាញភ្ញៀវទេសចរឲ្យចូលទស្សនា និងកម្សាន្តឆ្នេរកែប និងខេត្តកែប នៃប្រទេសកម្ពុជាកាន់តែច្រើនឡើងៗ។ បើតាមកញ្ញា Hisae Arai ព្រឹត្តិការណ៍នាឆ្នាំនេះមានការចូលរួមពីបវរកញ្ញាជប៉ុនឆ្នាំ២០១១ និង២០១២ ក្នុងនោះក៏មានតារាសម្តែងរបាំដូរ្យតន្ត្រី និងជាបវរកញ្ញាជប៉ុនឆ្នាំ២០១៤ និងការច្រៀងចម្រៀងពីអ្នកស្រី ហ៊ឹម សុភី ផងដែរ។
ទីតាំងដែលត្រូវធ្វើការសម្អាតសំរាមមាន ផ្សារក្តាម ផ្សារកែប ឆ្នេរកែប និងផែ ដើម្បីបង្កើនសោភ័ណភាពបរិស្ថាន នៅក្រុងកែប និងតំបន់ឆ្នេរនៅទីនោះ។
លោក កែន សត្ថា អភិបាលខេត្តកែបបានសម្តែងការគាំទ្រនូវយុទ្ធនាការរបស់មូលនិធិទឹកចិត្តទាំង៣ រួមជាមួយថ្នាក់ដឹកនាំ មន្ត្រីរាជការរបស់ខេត្ត ក្នុងការចូលរួមចំណែកថែរក្សាសោភណភាពខេត្តកែបឲ្យកាន់តែមានសម្រស់ស្រស់ស្អាត ហើយសូមគាំទ្រនូវយុទ្ធនាការ កែប សម្អាត កែបនេះនឹងបន្តនាឆ្នាំក្រោយៗទៀត។
លោកបញ្ជាក់ថា យុទ្ធនាការនេះ គឺជាការឆ្លើយតបផងដែរទៅនឹងយុទ្ធសាស្ត្ររបស់ប្រមុខរាជរដ្ឋាភិបាលកម្ពុជា ដែលមានសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជាដែលបានចាត់ទុកទីក្រុងស្អាត គឺជាទីក្រុងដែលគ្មានថង់ប្លាស្ទិកហើរតាមខ្យល់។ សកម្មភាព កែប សម្អាត កែប នាពេលនេះ ក៏ជាការឆ្លើយតបទៅនឹងបញ្ហាជាសកល ពិសេសលក្ខណៈជាសម្បត្តិ ចំណាត់ថ្នាក់ទីក្រុងស្អាត ដែលខេត្ត/ក្រុងកែប បានទទួលជ័យលាភីផ្ការំដួល៣ទង ពីសម្តេចនាយករដ្ឋមន្ត្រី ស្របពេលដែលខេត្តមាត់សមុទ្របានប្រារព្ធពិធីបុណ្យសមុទ្រលើកទី៤ ក្រោមប្រធានបទ ឆ្នេរស្អាត សេដ្ឋកិច្ចរុងរឿងនាពេលថ្មីៗនេះ ដែលបានស្រូបទាញភ្ញៀវជាតិ និងអន្តរជាតិយ៉ាងច្រើនកុះករ។
គួរបញ្ជាក់ថា ព្រឹត្តិការណ៍ កែប សម្អាត កែប នាឆ្នាំនេះ គឺជាលើកទី៣ ដែលអង្គការ ទឹកចិត្តទាំងបី បានធ្វើឡើង ហើយនៅក្នុងឆ្នាំនេះមានសកម្មភាពថ្មីមួយទៀតគឺ ការឧបត្ថម្ភឡដុតសំរាមមួយដល់សាលាអនុវិទ្យាល័យសង្គមរាស្ត្រនិយមសម្រាប់ដុតសំរាម ហើយសង្ឃឹមថា សាលាមួយនេះនឹងក្លាយទៅជាសាលាគំរូមួយប្រចាំទីក្រុង៕
យុទ្ធនាការរើសសំរាមនៅឆ្នេរកែបកម្ពុជា ក្រោមប្រធានបទ”កែប សម្អាត កែប”
0 Comments