ភ្នំពេញ ៖ ការជំរុញនេះ បានធ្វើឡើងនៅក្នុងជំនួបរវាងលោកទេសរដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិកម្ពុជា ជាមួយលោក Panyarak Poolthup ឯកអគ្គរាជទូតថៃថ្មី ដែលចូលជួបសំដែងការគួរសម កាលពីព្រឹកថ្ងៃទី០៦ ខែមិថុនា ឆ្នាំ២០១៨ នៅទីស្តីការក្រសួង។
លោក ជុំ សុន្ទរី អ្នកនាំពាក្យក្រសួងការបរទេស និងសហប្រតិការអន្តរជាតិកម្ពុជា បានថ្លែងប្រាប់អ្នកសារព័ត៌មានក្រោយពីជំនួបនោះថា នៅក្នុងជំនួបពិភាក្សានោះ លោកទេសរដ្ឋមន្ត្រី ប្រាក់ សុខុន បានថ្លែងអំណរគុណចំពោះលោក Panyarak Poolthup ដែលត្រូវបានតែងតាំងជាឯកអគ្គរាជទូតថៃប្រចាំប្រទេសកម្ពុជា ហើយលោកបានវាយតម្លៃខ្ពស់ ចំពោះបទពិសោធន៍ និងការងារការទូតរបស់លោក Panyarak Poolthup ថានឹងអាចជួយលើកកម្ពស់ដល់ទំនាក់ទំនង និងកិច្ចសហប្រតិការរវាងប្រទេសទាំងពីរបន្ថែម។
ឡើងនៅក្នុងឱកាសជំនួបពិភាក្សានោះដែរ លោក Panyarak Poolthup បានសំដែងនូវការវាយតម្លៃខ្ពស់ ចំពោះការរីកចម្រើននៃទំនាក់ទំនងមិត្តភាព និងកិច្ចសហប្រតិការរវាងប្រទេសទាំងពីរ និងបានបញ្ជាក់ថា នឹងខិតខំបន្ថែមទៀត ដើម្បីលើកស្ទួយនូវកិច្ចសហការរវាងប្រទេសទាំងពីរ កម្ពុជា-ថៃ។
តាមលោក ជុំ សុន្ទរី នៅក្នុងជំនួបនេះដែរ លោកទេសរដ្ឋមន្ត្រី ប្រាក់ សុខុន និងលោកឯកអគ្គរាជទូតថៃប្រចាំកម្ពុជា ក៏បានពិភាក្សាគ្នាលើវិស័យជាច្រើនទៀតផងដែរ ហើយចំពោះទំនាក់ទំនងរវាងថ្នាក់ដឹកនាំនៃប្រទេសទាំងពីរ លោកឯកអគ្គរាជទូត បានលើកឡើងអំពីជំនួបចំនួនបួនដង នៅឆ្នាំ២០១៨ រវាងសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជាមួយលោក ប្រា យុទ្ធចាន់អូចា នាយករដ្ឋមន្ត្រីថៃ ដែលក្នុងនោះ មាន២លើក នៅប្រទេសកម្ពុជា និងពីលើកទៀតនៅឯបរទេស ហើយជំនួស៤លើកនេះ បានសំដែងឲ្យឃើញពីភាពជិតស្និទ្ធ និងទំនាក់ទំនងដ៏ល្អប្រសើរ រវាងនាយករដ្ឋមន្ត្រីនៃប្រទេសទាំងពីរ។ជំនួបទ្វេភាគីនេះ ក៏បានពិភាក្សាគ្នាផងដែរ អំពីការត្រៀមរៀបចំទទួលដំណើរទស្សនកិច្ចរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ទៅកាន់ប្រទេសថៃ នាពេលឆាប់ៗខាងមុខ ដើម្បីចូលរួមកិច្ចប្រជុំកិច្ចកំពូលនៅប្រទេសថៃ ហើយនៅទីនោះសម្ដេចតេជោ ហ៊ុន សែន ក៏នឹងធ្វើជាប្រធាននៃកិច្ចប្រជុំ CLMV ផងដែរ។
ចំពោះបញ្ហាពាណិជ្ជកម្មរវាងប្រទេសថៃ និងប្រទេសកម្ពុជា លោកទេសរដ្ឋមន្ត្រី ប្រាក់ សុខុន និងលោក Panyarak Poolthup បានសម្តែងនូវក្តីពេញចិត្តចំពោះការកើនឡើងយ៉ាងឆាប់នូវបរិមាណនៃការផ្លាស់ប្ដូរពាណិជ្ជកម្មរវាងប្រទេសទាំងពីរ ដែលនៅក្នុងឆ្នាំ២០១៧ កន្លងទៅបានកើនឡើងរហូតជាង៦ពាន់លានដុល្លារ ហើយទាក់ទងបញ្ហាពាណិជ្ជកម្មនេះ ភាគីទាំងពីរបានផ្លាស់ប្ដូរយោបល់គ្នា ធ្វើយ៉ាងណាអោយមានតុល្យភាពរវាងប្រទេសទាំងពីរ។
ដោយឡែកលើកិច្ចសហការផ្នែកទេសចរណ៍ លោកទេសរដ្ឋមន្ត្រី ប្រាក់ សុខុន ក៏បានវាយតម្លៃខ្ពស់ចំពោះការកើនឡើងនៃភ្ញៀវទេសចរណ៍ថៃ មកកាន់ព្រះរាជាណាចក្រកម្ពុជាផងដែរ ដែលក្នុងឆ្នាំ២០១៧ បានកើនឡើងរហូតជាង៤០ ម៉ឺននាក់ ហើយលោកក៏ចង់ឲ្យមានកិច្ចសហប្រតិការបន្ថែមទៀត រវាងក្រសួងទេសចរណ៍នៃប្រទេសទាំងពីរ ដើម្បីជំរុញបន្ថែមលើផ្នែកទេសចរណ៍នេះ។ លើបញ្ហាទេសចរណ៍នេះដែរ លោកឯកអគ្គរាជទូតបានសន្យាថា នឹងខិតខំជំរុញមានកិច្ចសហការរវាងក្រសួងទេសចរណ៍នៃប្រទេសទាំងពីរ ដើម្បីធ្វើការផ្លាស់ប្ដូរបទពិសោធន៍ពីគ្នាទៅវិញទៅមកសំដៅលើកកម្ពស់បន្ថែមទៀតនូវកិច្ចសហប្រតិការផ្នែកទេសចរណ៍នេះ។
ដោយឡែកលើផ្នែកហេដ្ឋារចនាសម្ព័ន្ធ ភាគីទាំងពីរក៏បានសំដែងនូវការរីករាយពេញចិត្តចំពោះគម្រោងនៃការផ្សារភ្ជាប់ផ្លូវរថភ្លើងរវាងប្រទេសទាំងពីរនាពេលឆាប់ៗខាងមុខ ដែលបានអះអាងថា គម្រោងផ្លូវរថភ្លើងនេះ នឹងជួយជំរុញបន្ថែមទៀតក្នុងការលើកស្ទួយការផ្លាស់ប្ដូរពាណិជ្ជកម្មរវាងប្រទេសទាំងពីរក៏ដូចជាសម្រួលដល់ការដឹកជញ្ជូនរវាងប្រទេសទាំងពីរ។
ទាក់ទងបញ្ហានេះដែរ ភាគីទាំងពីរក៏បានពិភាក្សាគ្នាអំពីការជំរុញឲ្យបើកច្រកអន្តរជាតិឆ្លងកាត់ព្រំដែនចំនួន៣បន្ថែមទៀត ដែលរដ្ឋាភិបាលនៃប្រទេសទាំងពីរបានឯកភាពគ្នារួចហើយ ដែលច្រកទាំង៣នោះ មានច្រកអានសេះ ស្ថិតនៅខេត្តព្រះវិហារ, ច្រកថ្មដា នៅខេត្តពោធិ៍សាត់ និងច្រកជប់គគី ស្ថិតនៅក្នុងខេត្តឧត្ដរមានជ័យ ដែលច្រកទាំង៣នេះ គណៈរដ្ឋមន្ត្រីនៃប្រទេសទាំងពីរបានសម្រេចរួចហើយនៅក្នុងកិច្ចប្រជុំចំរុះកាលពីឆ្នាំ២០១៧។
ដោយឡែកចំពោះបញ្ហាវិស័យអប់រំ លោកទេសរដ្ឋមន្ត្រី ប្រាក់ សុខុន ក៏បានវាយតម្លៃខ្ពស់ចំពោះការផ្តល់អាហាររូបករណ៍របស់ថៃ ដល់និស្សិតកម្ពុជា ដែលមាន១៦០៥ អាហារូបករណ៍ គិតត្រឹមឆ្នាំ២០១៧ ហើយលោកទេសរដ្ឋមន្ត្រី ក៏បានលើកឡើងពីការបង្កើតនៅវិទ្យាស្ថានការទូតរបស់កម្ពុជា និងមានបំណងផ្សារភ្ជាប់រវាងវិទ្យាស្ថានការទូតនៃព្រះរាជាណាចក្រកម្ពុជា និងវិទ្យាស្ថានការទូតនៃព្រះរាជាណាចក្រថៃ ដែលគំនិតនេះ ក៏ត្រូវបានទទួលការគាំពីលោកឯកទេសរដ្ឋទូតថៃផងដែរ៕
Source: Kampuchea Thmey Daily
0 Comments