កីឡាករ​របស់​ក្រុម​ឱ​ម៉ា​ល់​អែ​ហ្វ​ស៊ី ម្នាក់​រក​គ្រាប់​បាល់​បាន​១០​គ្រាប់​ម្នាក់ឯង​ក្នុង​១​ប្រកួត​ប្រចាំ​សប្ដាហ៍​ទី​១២​នៃ​ពានរង្វាន់​លី​គ​ហ្វូ​ត​សាល

ពានរង្វាន់​លី​គ​បាល់ទាត់​ក្នុង​សាលា​ឆ្នាំ​២០១៨ (National Futsal League 2018) ក្រោម​ការ​រៀបចំឡើង​ដោយ​សហព័ន្ធ​កីឡាបាល់ទាត់​កម្ពុជា ទើបតែ​បញ្ចប់​កម្មវិធី​ប្រកួត​សប្ដាហ៍​ទី​១២ របស់​ខ្លួន​ថ្មីៗ​នេះ ខណៈ​ក្រុម​ទាំង​៥​គូ​បាន​បំប៉ោង​សំណាញ់​ទី​គ្នា​ទៅវិញទៅមក​រហូតដល់​៨៤​គ្រាប់ ហើយ​ក្នុងនោះ​កីឡាករ​ម្នាក់​របស់​ក្រុម​ឱ​ម៉ា​ល់​អែ​ហ្វ​ស៊ី រកបាន​១០​គ្រាប់​ម្នាក់ឯង​ក្នុង​១​ប្រកួត​។

កីឡាករ​ដែល​រក​គ្រាប់​បាល់​ច្រើនជាងគេ​ក្នុង​សប្តាហ៍​ទី​១២​នេះ​ឈ្មោះ កៀ លី​ហៀ​ង រកបាន​១០​គ្រាប់​ម្នាក់ឯង ខណៈ​មិត្ត​រួម​ក្រុម​ឱ​ម៉ា​ល់ ២​នាក់​ទៀត​គឺ​កីឡាករ អ៊ា ឆាយ​ហ៊្វុង រកបាន​៧​គ្រាប់​ម្នាក់ ហើយ​កីឡាករ ខុ​ត សា​ឌី​ណា របស់​ក្រុម​ឆន្ទៈ​កីឡា និង​កីឡាករ រស់ រតនៈ របស់​ក្រុម Down Town Sport FC រកបាន​ម្នាក់​៤​គ្រាប់​។ ចំណែក​កីឡាករ កែ កុសល​រតនា របស់​ក្រុមយុវជន​៧​មករា កីឡាករ តាំង យ៉ា​ខេង របស់​ក្រុម​ឆន្ទៈ​កីឡា និង​កីឡាករ សេដ្ឋ សច្ច​បុត្រ របស់​ក្រុម​ឆន្ទៈ​កីឡា រកបាន​ម្នាក់​៣​គ្រាប់​តាម​ពីក្រោយ​។



​ងាក​មក​មើល​ចំណាត់ថ្នាក់​បណ្តោះអាសន្ន​ក្រោយ​ប្រកួត​បាន​១២​លើក​ម្នាក់​មក​ឃើញថា​ក្រុម Down Town Sport FC​ឈរ​លេខ​១ មាន​២៩​ពិន្ទុ តាម​ពីក្រោយ​ដោយ​ក្រុម​ឱ​ម៉ា​ល់ ឈរ​លេខ​២ មាន​២៤​ពិន្ទុ ក្រុម​Home Sport ឈរ​លេខ​៣ មាន​២៤​ពិន្ទុ ស្មើគ្នា​ជាមួយ​ក្រុម​លេខ​៤ ស​.​ស​.​យ​.​ក កំចាយមារ តែ​ខុស​គ្រាប់​បាល់​ចំណេញ​។ ក្រុម​លេខ​៥ អាណាចក្រ​បៃតង មាន​១៨​ពិន្ទុ ហើយ​ក្រុម​លេខ​៦ Fan Sport FT មាន​១៥​ពិន្ទុ​។ លេខ​៧ ក្រុម Panda FC មាន​១៤​ពិន្ទុ ហើយ​ក្រុមយុវជន​៧​មករា ឈរ​លេខ​៨ មាន​១១​ពិន្ទុ ក្រុម​ឆន្ទៈ​កីឡា ឈរ​លេខ​៩ មាន​១០​ពិន្ទុ និង​ក្រុម​B.A United លេខ​១០ មាន​៤​ពិន្ទុ​។

​សម្រាប់​ប្រកួត​បន្ទាប់​សប្ដាហ៍​ទី​១៣ នឹងធ្វើ​នៅ​ចុង​សប្ដាហ៍​នេះ​ដោយ​ថ្ងៃ​សៅរ៍ ទី​៩ ខែមិថុនា ក្រុម Home Sport FC ប៉ះ​ក្រុម​ស​.​ស​.​យ​.​ក កំចាយមារ នៅវេលា​ម៉ោង​២:៣០​នាទី ខណៈ​ក្រុម Down Town Sport ប៉ះ ក្រុម​ឆន្ទៈ​កីឡា នៅ​ម៉ោង​៤​ល្ងាច​និង​ក្រុម​អាណាចក្រ​បៃតង ជួប​ក្រុម Panda FC នៅ​ម៉ោង​៥:៣០​នាទី​ល្ងាច​។ ចំណែក​នៅ​ថ្ងៃអាទិត្យ ទី​១០ ខែមិថុនា ក្រុម Fan Sport ប៉ះ​ក្រុម B.A United នៅ​ម៉ោង​៤​ល្ងាច​និង​ក្រុម​ឱ​ម៉ា​ល់ ជួប​ក្រុមយុវជន​៧​មករា នៅវេលា​ម៉ោង​៥:៣០​នាទី​ល្ងាច​។

ការប្រកួត​លី​គ​ហ្វូ​ត​សាល​ជា​លើកដំបូង​នៅក្នុង​ស្រុក​នេះ​ធ្វើឡើង​ពីថ្ងៃ​ទី​០៣ ខែ មិនា រហូតដល់​ថ្ងៃទី​២៨ ខែ កក្កដា ឆ្នាំ ២០១៨ ខណៈ​ភាគច្រើន​ប្រកួត​នៅ​ថ្ងៃ​ចុង​សប្ដាហ៍ ដែល​មាន​ក្រុម​ជា​សមាជិក​ចំនួន​១០​ក្រុម​លើ​ទីលាន ដឹ​ប្លូ​ស្ព័ត (The Blue Sport) ម្តុំ​ទួលគោក​។ ការប្រកួត​មាន​រូបមន្ត​ជា​លក្ខណៈ​ប្រកួត​បែប​លី​គ តាម​ប្រព័ន្ធ​លី​គ​២​ជុំ (​វិលជុំ​សន្សំ​ពិន្ទុ​) ហើយ​ក្រុម​ដែលមាន​ពិន្ទុ​ច្រើនជាងគេ​នឹង​ដណ្តើមបាន​ជើងឯក​តែម្តង​។ ក្រុម​ជើងឯក​នឹង​ទទួល​បាន​ពានរង្វាន់​១ មេដាយមាស​ម្នាក់​១​និង​ប្រាក់រង្វាន់២០លាន​រៀល​ផងដែរ​៕

Source: Kampuchea Thmey Daily