ក្រុមបាល់ទាត់ខេមបូឌានថាយហ្គឺរ ជាបេក្ខភាពទី៣ ដែលមានឈ្មោះឡើងទៅលេងក្នុងពានរង្វាន់មិត្តហ្វូនខេមបូឌានលីក ២០១៥ (Metfone Cambodian League 2015) បន្ទាប់ពីបឹងកេតអង្គរ និង ភ្នំពេញ ក្រោយយកឈ្នះក្រុមអគ្គស្នងការដ្ឋាននគរបាលជាតិ ក្នុងវគ្គសន្សំពិន្ទុសប្ដាហ៍ ២២ ដែលជាចុងក្រោយ ដោយលទ្ធផល២ទល់១ លើទីលានពហុកីឡដ្ឋានជាតិ ខណៈក្រុមក្រសួងការពារជាតិ និងបៀលប្រាយយូណាយធីត ក៏សុទ្ធតែរកបាន៣ ពិន្ទុដូចគ្នា។
ជ័យជម្នះនៅល្ងាចថ្ងៃពុធទី២១ ខែតុលារបស់ក្រុមខេមបូឌានថាយហ្គឺរ រកបានដោយកីឡាករ សួង វីរៈ នៅនាទី៣៦ និងកីឡាករ Privat នៅនាទី៨៨ ខណៈកីឡាករ ទិត្យ ឌីណា បានរកគ្រាប់បាល់វាយបកឲ្យអគ្គស្នងការដ្ឋាននគរបាលជាតិ វិញនៅនាទី ៤៩។
នៅរសៀលដដែលនេះដែរ ក្រុមក្រសួងការពារជាតិ បានយកឈ្នះក្រុមវេស្ទើនភ្នំពេញ ដោយលទ្ធផល៣ទល់២ លើទីលានកីឡដ្ឋានវេស្ទើន។ កីឡាករ កែ វណ្ណៈ របស់ក្រសួងការពារជាតិ បានរកគ្រាប់បាល់នាំមុខនៅនាទី២០ ហើយកីឡាករ ទូច រ៉ូម៉ា បន្ថែមគ្រាប់បាល់ទី២ នៅនាទី ៣៩ ស្របពេល កីឡាករ លឹម យូ របស់វេស្ទើន បានរកគ្រាប់១គ្រាប់វិញនៅនាទី ៣២ មុនចប់តង់ទី១។ ចូលដល់តង់ទី២ នាទី ៨៣ កីឡាករ ច្រឹង ពលរដ្ឋ របស់ក្រសួងការពារជាតិ បានរកគ្រាប់បាល់នាំមុខ បន្ថែម តែកីឡាករMathew Osa របស់វេស្ទើន រកបាន១ គ្រាប់វិញទៀតដោយបាល់ទាត់ពិន័យ ១១ ម៉ែត្របានសម្រេចនៅនាទី៩០មុនចប់តង់ទី២។
ក្រសួងការពារជាតិ ក៏នៅតែបេក្ខភាពដ៏សំខាន់មួយ ថានឹងមានឱកាសឡើងទៅលេងវគ្គ ៤ ក្រុមចុងក្រោយឬយ៉ាងណា ដោយរង់ចាំមើលលទ្ធផលរវាង ណាហ្គាវើល ដែលជាគូប្រជែង ត្រូវប្រកួតជាមួយស្វាយរៀងអែហ្វស៊ី នៅល្ងាចថ្ងៃព្រហស្បតិ៍ នេះសិន។
ចំណែកមួយប្រកួតនៅថ្ងៃទី២១ដដែលនេះដែរ ក្រុមបៀលប្រាយយូណាយធីត ដែលជាក្រុមមិនត្រូវការពិន្ទុនោះ បានយកឈ្នះក្រុមអាស៊ីអឺរ៉ុបយូណាធីត ដោយលទ្ធផល ៧ ទល់ ៣។ ៧ គ្រាប់របស់បៀលប្រាយ រកបានដោយកីឡាករ Omokafe និង រ៉ីង ប៊ុនហៀង ម្នាក់ ២ គ្រាប់ កីឡាករ ប៉ែន មុន្នីឧត្តម, ស៊ឹម វុត្ដា និង ថៃ ផល្លា រកបានម្នាក់១គ្រាប់។ ចំណែក ៣ គ្រាប់របស់អាស៊ីអឺរ៉ុប រកបានដោយកីឡាករ Gorge Kelechi Stanley ២ គ្រាប់ម្នាក់ឯង និងកីឡាករ ម៉ាត់ ហូសាន់ ១ គ្រាប់៕
ខេមបូឌានថាយហ្គឺរជាបេក្ខភាពឡើងទៅវគ្គខ្វែង ក្រោយឈ្នះប៉ូលិស
0 Comments