កំពង់ឆ្នាំង ៖ សម្រាស់ធំ២កន្លែង១របស់ខ្មែរ និង១ទៀតរបស់វៀតណាម នៅក្នុងឃុំកំពង់ព្រះគគីរ ស្រុកបរិបូណ៌ នៅរសៀលថ្ងៃទី០៥ ខែកុម្ភៈ ឆ្នាំ២០១៥ ត្រូវបានគេហ៊ុំចាប់ត្រីយ៉ាងរំភើយ សមត្ថកិច្ចសង្កាត់ជលផលស្រុកបរិបូណ៌ឈរជើងនៅភូមិកោះតាម៉ូវមិនខ្ចីធ្វើឃើញឡើយ ទាល់តែប្រជាពលរដ្ឋរាយការណ៍ឲ្យលោកព្រះរាជអាជ្ញាទើបបែកសំបុក។
ប្រភពព័ត៌មានពីប្រជាពលរដ្ឋឃុំកំពង់ព្រះគគីរបានទូរស័ព្ទឲ្យដឹងថា សព្វថ្ងៃនៅក្នុងភូមិកោះតាម៉ូវ ឃុំកំពង់ព្រះគគីរ មានមន្ត្រីរដ្ឋបាលជលផលសង្កាត់បរិបូណ៌២ក្រុមឈរជើងការពារតំបន់អភិរក្ស ដែល១ក្រុមឈរជើងនៅចំណុចស្ទឹងពោធិ និង១ក្រុមទៀតគឺលោកនាយរងសង្កាត់ឈរជើងនៅក្នុងភូមិកោះតាម៉ូវតែម្តង។ ប៉ុន្តែនៅក្បែរៗកន្លែងឈរជើងនោះគឺសុទ្ធតែមានសម្រាស់យ៉ាងច្រើន ហើយប្រមាណ១០ថ្ងៃនេះ ជនល្មើសបាននាំគ្នាហ៊ុំចាប់ត្រីទាំងថ្ងៃទាំងយប់យ៉ាងរំភើយ សមត្ថកិច្ចជំនាញបិតភ្នែកធ្វើមិនដឹងមិនឮនោះឡើយ ដោយសារលុយបាំងភ្នែក។
ជាក់ស្តែងនៅរសៀលថ្ងៃទី០៥ ខែកុម្ភៈនេះ សម្រាស់ធំៗ២កន្លែងមានបណ្តោយជាង២០០ម៉ែត្រ និងទទឹង៣០ម៉ែត្រ ដែល១របស់ខ្មែរនិង១ទៀតរបស់វៀតណាម ត្រូវបានជនល្មើសនាំគ្នាហ៊ុំចាប់ត្រីយ៉ាងគគ្រឹកគគ្រេង។
នៅម៉ោង៥ល្ងាចប្រជាពលរដ្ឋបានលួចរាយការណ៍រឿងនេះឲ្យលោកព្រះរាជអាជ្ញារងខេត្តម្នាក់និងអ្នកកាសែតដឹងឮ ក្រោយមកលោកព្រះរាជអាជ្ញារងនោះបានបញ្ជាឲ្យលោកនាយរងខណ្ឌម្នាក់ខ្លាំងខាងបិតភ្នែកចុះទៅបង្ក្រាប ប៉ុន្តែមិនបាន២ម៉ោងរឿងនេះក៏បានបែកការដឹងដល់ក្រុមជនល្មើសទាំង២ក្រុមដែលកំពុងហ៊ុំសម្រាស់ចាប់ត្រី ហើយពួកគេបានសារសាច់អួនរត់នៅម៉ោង៦ល្ងាចរត់បាត់អស់ទៅ។ ចំណែកសមត្ថកិច្ចជលផលទៅដល់ចាប់បានតែកំប៉ោងនិងខ្យល់តែប៉ុណ្ណោះ ធ្វើមិចរឿងស៊ីលុយគេហើយគឺត្រូវតែធ្វើអញ្ចឹងហើយ។
ប្រជាពលរដ្ឋបានរិះគន់ថា នៅស្ទើរយតែគ្រប់ទីកន្លែងក្នុងភូមិសាស្ត្រស្រុកបរិបូណ៌ និងស្រុកកំពង់លែង អ្នកមានសម្រាស់រាប់រយនាក់បាននិងកំពុងនាំគ្នាលួចហ៊ុំចាប់ត្រីទាំងយប់ទាំងថ្ងៃឲ្យបានមុនបុណ្យចូលឆ្នាំចិនថ្ងៃទី១៨ ខែកុម្ភៈខាងមុខនេះ ដើម្បីយកលុយសែនចូលឆ្នាំចិន ដែលកន្លែងសម្រាស់ធំៗខ្លះគេចាប់ត្រីលក់បានរាប់ពាន់និងរាប់ម៉ឺនដុល្លារ។
រឿងខាងលើនេះគេបានឲ្យដឹងថា ឆ្លៀតពេលលោក ហោ អាត្រែត ហើយលោក សោម
ភិរុណ នឹងត្រូវប្រកាសជាប្រធានរដ្ឋបាលជលផលថ្មីនៅថ្ងៃទី១៣ ខែកុម្ភៈខាងមុខនេះ លោកនាយរងខណ្ឌដែលគេអាចឆ្លៀតស៊ីលុយពីជនល្មើសបានគឺគេត្រូវតែស៊ីហើយ រឿងនេះទម្រាំលោកប្រធានជលផលឡើងកាន់តំណែង គេស៊ីលុយពីសម្រាស់អស់ទៅហើយ។ ប្រជាពលរដ្ឋស្នើសុំលោក អេង ជាសាន ប្រធានរដ្ឋបាលជលផលថ្មីបញ្ចេញស្នាដៃទប់ស្កាត់ផង៕
(ថារិទ្ធ)
0 Comments