កំពូលតារា ចម្រៀង ព្រាប សុវត្ថិ និង កូនប្រុសទាំង៣ កំពុងជោគជ័យខ្លាំងលើទឹកដីសហរដ្ឋអាមេរិក

Cambodia News March 27, 2019

ភ្នំពេញ ៖ កំពូលតារាចម្រៀងប្រុសរបស់ផលិតកម្មហង្សមាស លោក ព្រាប សុវត្ថិ ថ្មីៗនេះ ត្រូវបានមហាជនដឹងហើយថា លោកបានដឹកដៃកូនប្រុសសំណព្វចិត្តទាំង៣នាក់របស់ខ្លួន ចេញទៅច្រៀងនិងសម្តែងនៅលើទឹកដីប្រទេសមហាអំណាចសហរដ្ឋអាមេរិក ដើម្បីចូលរួមបង្កបរិយាកាសរាំលេងកម្សាន្តសប្បាយជូនដល់បងប្អូនអាណិកជនខ្មែររស់នៅទីនោះ។

តាមការកត់សម្គាល់ចំពោះដំណើរឆ្លងទ្វីបរបស់ លោក ព្រាប សុវត្ថិ និងកូនៗទាំង៣ គឺ សុវត្ថិ មុនីវណ្ណ ,សុវត្ថិ មុន្នីនាគ និងសុវត្ថិ សេរីវុឌ្ឍ ដើម្បីចេញទៅច្រៀង-សម្ដែងនៅលើទឹកដីមហាសេដ្ឋកិច្ចសំបូរដុល្លារ នៃសហរដ្ឋអាមេរិកពេលនេះ គឺកំពុងតែទទួលបានការគាំទ្រខ្លាំងពីសំណាក់មហាជនជាមួយនឹងទេពកោសល្យបកស្រាយចម្រៀង និងការបង្ហាញក្បាច់រាំយ៉ាងរស់រវើកផងនោះ។

ជាក់ស្ដែង បើសង្កេតឃើញតាមរយៈការបង្ហោះវីដេអូពីទឹកដីសហរដ្ឋអាមេរិក អំឡុងពេលកំពុងបញ្ចេញសមត្ថភាពច្រៀង-រាំនៅលើឆាកតន្ត្រីវាង លោក ព្រាប សុវត្ថិ និងកូនៗទាំង៣របស់ខ្លួននោះគឺមិនត្រឹមតែទទួលបានការគាំទ្រស្រែកហោរកញ្ជ្រៀវយ៉ាងកងរំពងនោះទេ លោកព្រាប សុវត្ថិ និងកូនៗ ក៏ទទួលបានការស្វាគមន៍យ៉ាងកក់ក្តៅបំផុត ដោយការថតរូបអនុស្សាវរីយ៍ពីសំណាក់បងប្អូនខ្មែរអាណិកជននៅទីនោះ។

លើសពីនេះទៀតនោះ បើតាមការបង្ហើបឲ្យដឹងពីសំណាក់អ្នកធានាបើកផ្លូវឲ្យ លោក ព្រាប សុវត្ថិ និងកូនៗទាំង៣ បានចេញទៅកើបលុយនោះនិយាយថា តារាចម្រៀងប្រុសទាំង៤នាក់ ឪ កូនពេលនេះ មិនត្រឹមតែទទួលបានការគាំទ្រភ្ល្លូកទឹកភ្លូកដីនៅលើទឹកដីសហរដ្ឋអាមេរិកប៉ុណ្ណោះទេ គឺចំនួន នៃអ្នកចូលទស្សនាក៏មានច្រើនលើកការរំពឹងទុក។ ខណៈសំបុត្រចូលរួមទស្សនាលក់អស់គ្មានសល់ផងនោះ នេះបញ្ជាក់ថា វត្តមានរបស់ លោក ព្រាប សុវត្ថិ និង កូនៗ កាន់តែទទួលបានជោគជ័យ និងការគាំទ្រខ្លាំងពីអាណិកជនខ្មែរ ដែលរស់នៅទៅនោះ។

សូមបញ្ជាក់ថា ចំពោះដំណើរហោះហើរឆ្លងទ្វីបរបស់លោក ព្រាប សុវត្ថិ និងកូនៗទាំង៣នាក់ចេញទៅកើបលុយលើទឹកដីប្រទេសមហាអំណាចសហរដ្ឋអាមេរិកនាពេលនេះ គឺធ្វើឡើង មានរយៈពេល២ខែ ទើបវិលត្រឡប់មកប្រទេសកំណើតវិញ។ នេះជាដំណើរលើក៤សម្រាប់ លោក ព្រាប សុវត្ថិ ប៉ុន្តែជាលើកដំបូងដែលបានចេញជុំគ្នាជាមួយកូនៗទៅសហរដ្ឋអាមេរិក ដែលធ្វើឲ្យមានការរំជើបរំជួលខ្លាំង៕