ភ្នំពេញ ៖ បុរសជនជាតិចិនម្នាក់ ត្រូវបានស្ត្រីខ្មែរជាសង្សារ ប្តឹងសមត្ថកិច្ចឲ្យមកចាប់ខ្លួន ពីបទប្រើហិង្សា និងវាយបំផ្លិចបំផ្លាញទ្រព្យសម្បត្តិ កាលពីវេលាម៉ោង២រំលងអធ្រាត្រ ឈានចូលថ្ងៃទី១៤ ខែកុម្ភៈ ឆ្នាំ២០១៩ នៅសង្កាត់ភ្នំពេញថ្មី ខណ្ឌសែនសុខ។
ប៉ូលិសបានឲ្យដឹងថា បុរសដែលត្រូវបានឃាត់ខ្លួនខាងលើឈ្មោះ Xu Bo អាយុ៣៥ឆ្នាំ ជនជាតិចិនមុខរបរបុគ្គលិកក្រុមហ៊ុនរោងចក្រកាត់ដេរកាណាឌីយ៉ា ត្រូវបានឃាត់ខ្លួនតាមបណ្តឹងចោទរបស់ជនរងគ្រោះ ឈ្មោះ ព្រហ្ម សុធារ័ត្ន ភេទស្រី អាយុ២៧ឆ្នាំ មានទីលំនៅភូមិដីថ្មី សង្កាត់គោកឃ្លាង ខណ្ឌសែនសុខ។
តាមបណ្តឹងរបស់ជនរងគ្រោះបានរៀបរាប់ថា នៅមុនពេលកើតហេតុកាលពីល្ងាច ថ្ងៃទី១៣ នាងបានទូរស័ព្ទទៅបុរសជនជាតិចិនឈ្មោះ Xu Bo នោះ ដើម្បីសុំកាដូ ថ្ងៃបុណ្យ នៃសេចក្ដីស្រលាញ់ដោយសារតែទើបទាក់ទងគ្នាធ្វើជាសង្សារ នៅពេលនោះខាង ឈ្មោះ Xu Bo បានប្រាប់ឲ្យនាងមកយកឡាន ទៅដឹកខ្លួន មកដេកនៅឯផ្ទះនាងផង។
នាងបន្តថា នៅពេលធ្វើដំណើរតាមផ្លូវ ឈ្មោះ Xu Bo បានឈប់ទិញស្រាបៀ១កេស យកទៅផឹក ពេលផឹកអស់ ស្រាប់តែកូរ បង្កជម្លោះតែម្ដង នៅពេលនោះ ខ្មាសគេពេក នាងក៏បានលួងដឹកបុរសជាសង្សារនោះ យកទៅដាក់នៅរោងចក្រកាណាឌីយ៉ាវិញ ប៉ុន្តែនៅតែបង្កជម្លោះតាមផ្លូវរហូត លុះមកដល់ចំណុចមុខហាងអង្គរធំ នៅភូមិបាយ៉ាប សង្កាត់ភ្នំពេញថ្មី គេបានលូកដៃទៅទាញដៃហ្វ្រាំងរថយន្តឲ្យឈប់ រួចបើកទ្វារចេញក្រៅ ដោយរើសយកដុំថ្មមកគប់បំបែកកញ្ចក់រថយន្តរបស់នាងបែកអស់ម្ខាង និងប៉ុនប៉ងវាយតប់នាងទៀតផង។ ដោយទ្រាំមិនបាន នាងក៏បានប្តឹងសមត្ថកិច្ចឲ្យមកចាប់ខ្លួនតែម្តង និងបានដាក់ពាក្យប្តឹង ពីបទបំផ្លាញទ្រព្យសម្បត្តិ នៅវេលាម៉ោង២រំលងអធ្រាត្រ ឈានចូលថ្ងៃទី១៤ ខែកុម្ភៈ ឆ្នាំ២០១៩។
បច្ចុប្បន្ន ប៉ូលិស បានឃាត់ខ្លួនបុរសជនជាតិចិនរូបនោះ តាមបទល្មើសជាក់ស្តែង ហើយថាជនជាតិចិននោះ មិនចេះនិយាយភាសាខ្មែរទេ ហើយក៏គ្មានលិខិតឆ្លងដែនផងដែរ ដើម្បីបញ្ជូនទៅតុលាការតាមសំណើបណ្ដឹងចោទរបស់នាងរងគ្រោះ៕
Source: Kampuchea Thmey Daily
0 Comments