ភ្នំពេញ ៖ លើសង្វៀនTV3 ល្ងាចថ្ងៃទី០៨ ខែកុម្ភៈ ឆ្នាំ២០១៥ខាងមុខនេះ ឡុង សុភី អ្នកប្រដាល់ក្លិបសាលវ័ន្តកីឡានឹងត្រូវជួបប្រកួតជាមួយ Mario Vidolov Todorov អ្នកប្រដាល់មកពីរុស្សី។ អ្នកប្រដាល់ទាំងពីរនាក់នេះប្រកួតគ្នាក្នុងប្រភេទទម្ងន់៦៤គីឡូក្រាម។
Mario Vidolov Todorov អ្នកប្រដាល់រុស្សីរូបនេះពុំធ្លាប់មកប្រកួតនៅភ្នំពេញទេកន្លងមក។ អ្នកប្រដាល់រុស្សីរូបនេះ បើតាមអ្នកផ្គូផ្គងប្រចាំTV3បានឲ្យដឹងនោះថា គេមានស្ថិតិប្រកួតច្រើនគួរសមដែរ គ្រាន់តែមិនដឹងចំនួនប៉ុន្មាន។ អ្នកប្រដាល់រុស្សីនេះមានពិចនិចប្រកួតមិនចាញ់អ្នកប្រដាល់ថៃប៉ុន្មានទេ ដោយចេះកែង ជង្គង់ និងទាត់ស្ទាត់ ព្រោះគេហ្វឹកហាត់នៅក្នុងប្រទេសថៃ។
និយាយរួម Mario Vidolov Todorov គេចេះវ៉ៃប្រដាល់សេរីច្បាស់លាស់គួបផ្សំនឹងគេខ្ពស់ ដៃជើងវែងផងនោះ មិនដឹងថា ឡុង សុភី អាចយកឈ្នះបានឬអត់នោះទេ? ឡុង សុភី ជាមួយពួកបរទេសគេធ្លាប់ជួបច្រើនដងហើយ ដែលការប្រកួតចុងក្រោយនេះ គេវាយចាញ់អ្នកប្រដាល់ថៃRarueng Luk Chamoachai ដោយពិន្ទុ ។ ចាំមើលលើកនេះ តើ ឡុង សុភី អាចយកឈ្នះMario Vidolov Todorov នេះបានឬក៏យ៉ាងណា?
អ្នកប្រដាល់កម្ពុជាឈាន ហុង ក្លិបកីឡាក្រសួងការពារជាតិ ត្រូវអ្នកផ្គូផ្គងឲ្យជួបប្រកួតជាមួយVachira Wong Pakham អ្នកប្រដាល់ជនជាតិថៃ ដោយប្រកួតក្នុងទម្ងន់៦២គីឡូក្រាម។ ជាលើកទី១៦ សម្រាប់ឈានហុងហើយ ដែលឡើងប្រកួតជាមួយអ្នកប្រដាល់បរទេសនោះ។ តែបើនិយាយពីការប្រកួតជាមួយថៃ គឺសឹងតែទាំងអស់ ពោលគឺប៉ះ១១នាក់ដោយវាយឈ្នះ៥លើក ស្មើ២លើក និងចាញ់៤លើក ហើយធ្លាប់វាយឈ្នះចិន បារាំង បែលហ្សិកផងដែរ។
Vachira Wong Pakham មិនធ្លាប់មកប្រកួតនៅស្រុកខ្មែរទេ។ នេះជាលើកទី១សម្រាប់អ្នកប្រដាល់ថៃរូបនេះហើយ។ អ្នកប្រដាល់ជនជាតិថៃរូបនេះ បើតាមលោក ទី រ៉ាណាត អ្នកចាត់ចែងកម្មវិធីប្រដាល់ប្រចាំ TV3 និយាយឲ្យដឹងនោះថា គេពុំដែលមកវ៉ៃនៅលើរេញកម្ពុជានោះទេ។ បើតាមលោក ណាត និយាយឲ្យដឹងទៀតនោះ អ្នកប្រដាល់ថៃម្នាក់នេះ ជាជើងខ្លាំងនៅស្រុកថៃ ដែលផ្ដួលថៃគ្នាគេជាច្រើននាក់។
ទោះជាយ៉ាងណាមិនអាចទាយស្មានថាខ្លាំងឬខ្សោយបានទេ ព្រោះអ្នកប្រដាល់ថៃមកម្នាក់ណាក៏គ្រាន់បើដែរ។ អ្វីដែលជាលក្ខណៈពិសេសរបស់អ្នកប្រដាល់ថៃនោះ គឺកម្លាំងស៊ុហ្វខ្លាំង រឹងមាំជាងអ្នកប្រដាល់ខ្មែរយើង។ ដូច្នេះលើកនេះ ឈាន ហុង គេជួបអ្នកប្រដាល់ថៃជាលើកទី១២របស់គេហើយ។ ឈាន ហុង ជាអ្នកប្រដាល់ម្នាក់ដែលមានចិត្តតក់ក្រហល់ក្នុងការឈ្នះ ដោយក្នុងពេលប្រកួតគេវាយសម្រុកទៅលើគូប្រកួតមិនបណ្ដាក់ដៃទេ។ ជាអ្នកប្រដាល់ដែលប្រកួតបាន៦៤លើក ឈ្នះ៥៦លើក ចាញ់៥លើក និងស្មើ៣លើកនោះ ឈាន ហុងចង់ឈ្នះៗមិនទុកយូរទេឲ្យតែគូប្រកួតរបស់ខ្លួនរាងចាញ់ប្រៀបគេនោះ គេមិនប្រោះទុកយូរឡើយ។
ការប្រកួតចុងក្រោយនេះ ឈាន ហុង វាយចាញ់អ្នកប្រដាល់ថៃ Chesek ដោយពិន្ទុ។ ចាំមើល ការជួបជាមួយថៃ Vachira Wong Pakham នេះ តើឈានហុងអាចយកឈ្នះបានឬអត់? ចំពោះការប្រកួតរវាងខ្មែរនិងខ្មែរវិញនោះ ថៃ រិទ្ធី អ្នកប្រដាល់ក្លឹបបូរីរាជសីហ៍មានរិទ្ធនឹងជួបប្រកួតជាមួយ រឿង សារ័ត្នអ្នកប្រដាល់ក្លឹបកងពលតូចទ័ពឆ័ត្រយោង៩១១។ ពួកគេពីរនាក់នេះ ជួបគ្នាក្នុងទម្ងន់៦៥គីឡូក្រាម។ អ្នកប្រដាល់ រឿង សារ័ត្ន និង ថៃ រិទ្ធី នេះ ជាអ្នកប្រដាល់ដែលវាយខ្លាំងដូចគ្នា។ តែ រឿង សារ័ត្ន គេចាស់វស្សាជាងថៃ រិទ្ធី។ និយាយរួមពីរនាក់នេះ មានផ្លែល្អប្រហាក់ប្រហែលគ្នា បើទោះបីជាថៃ រិទ្ធី ទើបលេចមុខលើសង្វៀនក៏ដោយ។
ញ៉េ សិទ្ធ អ្នកប្រដាល់ក្លិបអេភូថងកីឡានឹងប៉ះជាមួយ ថៃ សាក់សារះ ក្លិបកងទ័ពជើងទឹក ក្នុងប្រភេទទម្ងន់៦០គីឡូក្រាម ខណៈដែល សេន វ៉ាន់ណេត ក្លិបតាព្រហ្មមានជ័យជួបប្រកួតជាមួយធូ សេនថៃ ក្លិបខ្លារខិនមានរិទ្ធ៕
0 Comments