Friday, February 6, 2015

និមិត្តសញ្ញា​ខេត្ត​ប៉ៃលិន​សំដៅ​ដល់​ទឹកដី​ពី​អតីតកាល​សំបូរ​ដោយ​រ៉ែ​ត្បូង​

ប៉ៃលិន ៖ ខេត្ត​ប៉ៃលិន​ជា​ខេត្ត​ថ្មី​ដែល​ត្រូវ​បាន​រាជរដ្ឋាភិបាល​កម្ពុជា​ប្រកាស​ជា​ខេត្ត​មួយទៀត ​ស្ថិតនៅ​ភាគ​ខាងលិច​ប្រទេស​ដែល​មាន​ចម្ងាយ​៣៧១​គីឡូម៉ែត្រ​ពី​រាជធានី​ភ្នំពេញ តាមផ្លូវ​ជាតិ​លេខ​៥​ និង​លេខ​៥៧។ ខេត្ត​នេះ​មាន​ព្រំប្រទល់​ខាងលិច​ជាប់​នឹង​ប្រទេស​ថៃ ,​ខាងជើង​ជាប់​នឹង​ស្រុក​កំរៀង ដោយ​ខាងកើត​ជាប់​នឹង​ស្រុក​រតនៈមណ្ឌល និង​ខាងត្បូង​ជាប់​នឹង​ស្រុក​សំឡូត​ខេត្តបាត់ដំបង។​
ក្នុង​នោះ​មាន​ក្រុងប៉ៃលិន​មាន​សង្កាត់​និង​ស្រុក​សាលា​ក្រៅ មាន​៤​ឃុំ​និង​មាន​ភូមិ​ចំនួន​៧៩​ភូមិ​ដោយមាន​ប្រជាជន​សរុប​ចំនួន​៧០.៤៨៦​នាក់ មាន​ដង់ស៊ីតេ​៦៦​នាក់​ក្នុង​១​គីឡូម៉ែត្រ​ការេ លើ​ផ្ទៃដី​១.០៦២​គីឡូម៉ែត្រ​ការេ។​
ទឹកដី​ខេត្ត​ប៉ៃលិន​បាន​ផ្សារភ្ជាប់​ទៅ​នឹង​ប្រវត្តិសាស្ត្រ​កទឹកកដី​ទៅ​ដោយ​មុខ​ជំនួញ​រ៉ែ​ត្បូង​នេះ​តែម្តង អាស្រ័យ​ដោយសារ​ព្រំប្រទល់​ខេត្ត​នេះ​ជាប់​នឹង​ប្រទេស​ថៃ ម្ល៉ោះហើយ​ការ​ប្រាស្រ័យ​ទាក់ទង​ដោះដូរ​សេដ្ឋកិច្ច​គ្នា​តាមរយៈ​ការរុករក​រ៉ែ​ត្បូង​មានតម្លៃ ដោយសារតែ​ខេត្ត​ប៉ៃលិន​ជា​ទឹកដី​សំបូរ​ធន​ធាន​ធម្មជាតិ​ដ៏​កម្រ​នេះ ហើយ​ឈ្មោះ​ខេត្ត​ដែល​មាន​ឈ្មោះ​ជា​រៀង​រហូត​មក​ក៏​ហាក់ដូចជា​ភ្ជាប់​ពី​ភាសា​ខ្មែរ​ទៅ​នឹង​ជនជាតិ​ថៃ​ដែល​ចេញ​ចូល​មក​រកស៊ី​នោះ​ដែរ។ ប្រវត្តិសាស្ត្រ​ខេត្ត​ប៉ៃលិន​បាន​កំណត់​ទៅតាម​រឿងព្រេង​ខ្មែរ ដែល​បាន​ដំណាល​ថា​ នៅក្នុង​សតវត្ស​ទី​១៩​មាន​អ្នកប្រមាញ់​ម្នាក់​បាន​ដេញ​ប្រមាញ់​សត្វព្រៃ​រហូតដល់​ទឹកដី​ប៉ៃលិន​ក្នុង​ព្រៃ​ស្រោង​ដ៏​សែន​ឆ្ងាយ បាន​ប្រទះឃើញ​សត្វ​ភេ​កំពុង​ហែល​ទឹក ពេល​ឃើញ​មនុស្ស​ចូល​ដល់​សត្វ​ភេ​ទាំងនោះ​ក៏​រត់ចេញ​អស់​ទៅ។ អ្នក​ព្រានព្រៃ​បាន​ដើរចូល​ទៅដល់​កន្លែង​ភេ​ប្រឡែង​លេង​ ស្រាប់តែ​ឃើញ​ដុំ​ថ្ម​តូចៗ​មាន​ពន្លឺ​ផ្លេកៗ​ល្អ​ឯក ក៏​រើស​យក​មក​បង្ហាញ​ឲ្យ​ញាតិមិត្ត​ក្នុងភូមិ​បានឃើញ​គ្រប់ៗ​គ្នា គ្រានោះ​មាន​ជនជាតិ​កូ​ឡា​ភាគតិច​ថៃ​បាន​ចេញ​ចូល​មកពី​ខេត្ត​ច័ន្ទ​បូរី​ប្រទេស​ថៃ​បាន​មក​ឃើញ​ត្បូង​ទាំងនោះ​ក៏​ទិញ​យក​ទៅ​កែច្នៃ​គ្រាប់​ត្បូង​មានតម្លៃ ហើយក៏​សួរ​នាំទៅ​ព្រានព្រៃ​ឲ្យ​នាំទៅ​មើល​កន្លែង​ភេ​លេង​ទឹក ឃើញ​ដូច្នោះ​ជនជាតិ​កូ​ឡា​តែង​ហៅ​ភេ​លេង​ជា​សំនៀង​ភាសា​ថៃ​ថា​(ផេ) រីឯ​ពាក្យ​លេង​ទៅជា​ឡិន ហើយ​ក្រោយ​មក​ទៀត​ក៏​ប្រែក្លាយ​ពី​(ផេ)​ឡិន​ទៅជា​ប៉ៃលិន​ជា​រៀង​រហូត​មក​។​
ក្រោម​គោលនយោបាយ​ឈ្នះ ឈ្នះ របស់​សម្ដេច​តេ​ជោ​នាយករដ្ឋមន្ត្រី​នៃ​ព្រះរាជាណាចក្រ​កម្ពុជា​បាន​ផ្សះផ្សា​បង្រួបបង្រួម​ជាតិ ដោយ​ការ​ធ្វើ​សមាហរណកម្ម​ខ្មែរក្រហម​ធ្វើ​ឲ្យ​ទីក្រុង​ប៉ៃលិន​មាន​ភាព​រីកចម្រើន​ឆាប់រហ័ស បើ​ទោះ​ជា​ប្រភព​ធនធាន​ធម្មជាតិ​រ៉ែ​ត្បូង​បាន​ធ្លាក់ចុះ​ក៏ដោយ ក៏​ទឹកដី​ខេត្ត​នេះ​បាន​ប្រែ​ក្លាយ​ទៅជា​ភោគផល​កសិកម្ម​ប្រកបដោយ​ដំណាំ​ដំឡូង ,​ពោត និង​ដំណាំ​ផ្លែឈើ​ហូប​ផ្លែ​គ្រប់​ប្រភេទ​ជួយ​លើកស្ទួយ​ដល់​កម្រិតជីវភាព​រស់​នៅ​របស់​ប្រជាពលរដ្ឋ។​
រូប​គ្រាប់​ត្បូង​ពេជ្រ​ដ៏​ធំ​ជា​និមិត្តរូប​របស់​ខេត្ត​ប៉ៃលិន​ដែល​សំដៅ​ដល់​ទឹកដី​សំបូរ​រ៉ែ​ត្បូង​ និង​កំពុង​ក្លាយជា​តំបន់​ទាក់ទាញ​ភ្ញៀវ​ទេសចរ​៕
កញ្ញា វ៉ាត​.

0 comments:

Post a Comment