អ្នកប្រដាល់ជើងខ្លាំងរបស់កម្ពុជារឿងសោភ័ណ្ឌ ក្លិបម្កុដរាជសីហ៍ នឹងត្រូវជួបប្រកួតជាមួយអ្នកប្រដាល់ថៃ Thut Tidath ដោយជួបប្រកួតគ្នាក្នុងប្រភេទទម្ងន់៦៩គីឡូក្រាម នាយប់ថ្ងៃទី២១ ខែកក្កដា២០១៨នៅសង្វៀនGanzberg របស់SEATV ។ រឿង សោភ័ណ្ឌ និង Thut Tidath មិនធ្លាប់ប៉ះគ្នាទេកន្លងមក។
Thut Tidath គេជាអ្នកប្រដាល់ថៃចំណូលថ្មី ។ គេជាជើងខ្លាំងគួរសមដែរ ដោយមិនធ្លាប់មកប្រកួតនៅកម្ពុជាម្តងណានៅឡើយទេ ។ អ្នកប្រដាល់ថៃរូបនេះ នៅស្រុកថៃគេមានអំនួតខ្លាំងណាស់ ដោយសារគេវាយឈ្នះអ្នកប្រដាល់រួមជាតិរបស់គេជាច្រើននាក់។ នេះបើតាមអ្នកដឹកនាំកីឡាករថៃមកប្រកួតអោយដឹងនោះ។
ប៉ុន្តែលើកនេះជួប រឿង សោភ័ណ្ឌ ក៏មិនជាធានាប៉ុន្មានដែរ ព្រោះសោភ័ណ្ឌ គេបានត្រៀមខ្លួនយ៉ាងល្អ សម្រាប់ការប្រកួតនេះ ។ យ៉ាងណា រឿង សោភ័ណ្ឌ លើកនេះ អាចថាគេមានការប្រុងប្រយ័ត្នជាងមុន ដែលធ្វើអោយ Thut Tidath ពិបាកសង្ឃឹមឈ្នះដែរ។
Thut Tidath មានកម្ពស់ខ្ពស់ជាងសោភ័ណ្ឌ គឺ១,៧០ម៉ែត្រ ខណះដែលរឿង សោភ័ណ្ឌគេមានកម្ពស់១,៦៥ម៉ែត្រ។ អ្នកប្រដាល់ថៃរូបនេះ មានកំនត់ត្រាប្រកួត៥៥លើក ឈ្នះ៤៥លើក ចាញ់១០លើក និងមិនដែលស្មើ។
ទោះជាយ៉ាងនេះក្តី រឿង សោភ័ណ្ឌ មិនអាចមើលស្រាលThut Tidath បានទេ ព្រោះគេធ្លាប់ឈ្នះអ្នកប្រដាល់រួមជាតិរបស់គេច្រើននាក់ហើយ គឺមិនធម្មតានោះឡើយ ។ សោភ័ណ្ឌ គេមានប្រវត្តិប្រកួតរហូតដល់១៦០លើក ក្នុងនោះឈ្នះ១៤០លើក ចាញ់១៧លើក និងស្មើ០៣លើក ហើយសោភ័ណ្ឌធ្លាប់ផ្តួលគូប្រកួតឲ្យសន្លប់ចំនួនជិត៦០លើក។យ៉ាងណា រឿង សោភ័ណ្ឌមិនអាចមើលងាយ Thut Tidath នោះឡើយ។
ចំពោះ អ្នកប្រដាល់ ហ៊ឹម សារ៉ាន់ នៃសមាគមកីឡាប្រដាល់ក្រសួងការពារជាតិ នឹងត្រូវឡើងតស៊ូជាមួយអ្នកប្រដាល់អ៊ីរ៉ង់ ដោយជួបគ្នាក្នុងប្រភេទទម្ងន់៦៥គីឡូក្រាម។
ហ៊ឹម សារ៉ាន ដែលកំពុងតែធ្លាក់ដុនដាបខ្លាំងនោះ ត្រូវជួបប្រកួតជាមួយអ្នកប្រដាល់ជនជាតិអ៊ីរ៉ង់ហាត់នៅស្រុកថៃឈ្មោះ So leiman ។ នេះជាការប្រកួតមួយ ដែលគេផ្ដល់ឱកាសឲ្យសារ៉ាន់ស្ដារកេរ្តិ៍ឈ្មោះដែលកំពុងតែបាត់បង់ ។សារ៉ាន់មានប្រវត្តិប្រកួតចំនួន៨៨លើក ឈ្នះ៦៧ដង ចាញ់១៦ លើក និងស្មើពិន្ទុ ៥ លើក។ ចំពោះ So leiman វិញ គេទើបតែធ្លាប់ឡើងសង្វៀនប្រកួតបាន១៨លើកប៉ុណ្ណោះ ដោយវាយឈ្នះ១៥ លើក និង ចាញ់៣លើក ។
ការប្រកួតមួយនេះ សារ៉ាន់គួរតែឈ្នះហើយ ព្រោះអាចនិយាយបានថា ជើងខ្លាំងនិងជាជើងចាស់ប្រកួតជាមួយជើងថ្មី ដែលទើបតែបានប៉ុន្មានដងនោះ តែបើចាញ់ទៀត គឺចប់ ហើយ ។ ទោះជាយ៉ាងនេះក្តី ហ៊ឹម សារ៉ាន់ ដែលមានកម្រិតសមត្ថភាពបច្ចេកទេសល្អនោះ គេប្រហែលជាមិនពិបាក ក្នុងការយកឈ្នះ So leiman នេះទេ ព្រោះអ្នកប្រដាល់កម្ពុជារូបនេះ ជាជើងចាស់និងធ្លាប់មានឈ្មោះល្បីនៅក្នុងប្រទេស។
ទោះជាយ៉ាងណាកាលពីជួបប្រកួតជាមួយអ្នកប្រដាល់អាមេរិកJustinដែលមានកំនត់ត្រាប្រកួតតែ១៩លើកនោះ សារ៉ាន់វាយចាញ់ដោយពិន្ទុដែរ កាលពីថ្ងៃទី២៧មិថុនា២០១៨។
ចំពោះការប្រកួតរវាងអ្នកប្រដាល់រួមជាតិវិញ ង៉ែត្រ រដ្ឋា អ្នកប្រដាល់ក្លិបតាព្រហ្មមាន ជ័យ ត្រូវគេផ្គូឲ្យជួបប្រកួតជាមួយ ប៊ី ចាន់ណា អ្នកប្រដាល់ក្លិបមហិទ្ធរិទ្ធមេសរថ្ងកខេត្តស្វាយរៀង ។ពីរនាក់នេះ ប្រកួតគ្នាក្នុងប្រភេទទម្ងន់៦៣,៥០០គីឡូក្រាម។
ហេង វាសនា អ្នកប្រដាល់ក្លិបព្រៃទទឹងខេត្តបាត់ដំបង នឹងជួបប្រកួតជាមួយប្រាក់ រស្មី អ្នកប្រដាល់ក្លិបតាឯកដំបងដែកមានរិទ្ធ ដោយប្រកួតក្នុងប្រភេទទម្ងន់៦៣,៥០០គីឡូក្រាមដែរ៕
Source: Kampuchea Thmey Daily
0 Comments